Suinicoltors furlans: il 2020 al promet ben
I furlans a disin che al è dibant sierâ il cjôt cuant che i purcits a son za scjampâts. Par fortune, fin cumò i purcits no mostrin di vê nissune intenzion di lassânus di bessôi
Cuntun faturât di 160 milion di euros, il compart de cjar al rapresente il 20% di dut il valôr de produzion agricule regjonâl. Tal ordin, a contribuissin a chest risultât massime lis cjars suinis (8,5%), cun daur chês bovinis (7,2%) e, tal ultin, dal polam (5,1%).
Ae fonde de produzion de filiere regjonâl dal purcit a son 737 arlevadôrs professionâi (a jerin 755 tal 2018) e plui di 241 mil bestiis arlevadis (mil plui dal an passât): 111 mil a son lis bestiis di riproduzion e 130 mil chês di ingràs. La densitât e je di 30,51 bestiis al km cuadrât, poc parsore de medie taliane che e je di 28,77.
Intai ultins dîs agns, par frontâ lis gnovis dinamichis dal setôr, la tindince e je stade chê di slargjâ i cjôts: si va di fat viers di une diminuzion graduâl dal numar dai arlevaments, ma intant il numar des bestiis che a vegnin tiradis sù al reste simpri compagn. Par dâ valôr al lôr lavôr, i purcitârs duncje a àn sielzût di lâ inte direzion di fâ cressi i arlevaments, pluitost che moltiplicâju. Di un pont di viste economic, tal 2019 l’andament dai presis al è stât compagn dal 2018, ma cuntun bon increment dal presit de cjar di purcit tai ultins trê mês dal an. Cemût mai? Salacor tantis bestiis forestis a son stadis vendudis in Cine (par vie de epidemie di peste suine africane che e à obleât a copâ milions di purcits malâts) e, cussì, la domande de cjar taliane e je cressude, sburtant i presits insù.
E à tignût bot une vore ben ancje la filiere dal persut di San Denêl Dop (Denominazion di origjin protete), che nol è dome une des cjars suinis di nivel plui alt in Friûl, adun cul persut di Sauris a Indicazion Gjeografiche Protete, ma al reste un baluart insostituibil par dut il compart talian dal purcit.
Il gnûf dissiplinâr al va incuintri aes dibisugnis dai produtôrs. Di fat, lis liniis gjenetichis autorizadis pai purcits a son stadis dutis confermadis: e par sigûr e je une buine gnove la pussibilitât, par chei che a produsin il persut di Parme Dop, di podê comprâ lis cuessis di purcit ancje in Friûl: si vierç un gnûf piçul marcjât in plui che al podarà tornâ bon soredut tai moments di… magre.
A son jentradis in vore ancje gnovis normis sul benstâ dai animâi, che a àn fat calâ il numar dai purcits che si puedin tirâ sù par unitât di superficie, e che cussì a dan plui cualitât ae cjar parcè che lis bestiis a cressin miôr, e in cheste maniere no àn masse bisugne di cjoli medisinis.
Par ce che al inten la salût des bestiis, une altre robe une vore positive dai purcits di chenti e je che a son i unics in Italie a jessi imuns de malatie di Aujeszky (o sin la prime regjon in Italie a no vê plui bisugne de vacine di pueste).
Si che duncje, si pues dî che il clime che si respire tra i purcitârs furlans al somee jessi chel di un otimisim prudent par un discret 2020. ❚