✽✽ O sin aromai intal plen dai events uficiâi che a ricuardin il taramot dal 1976 e za cualchi conclusion su cemût che si è volût celebrâ il 50m aniversari di chê date o podìn metile neri su blanc. Prin di dut, no falavin nô e tancj altris che a pensavin che e sarès stade une enfatizazion dal rûl dai Stâts e dai siei aparâts sedi civîi che militârs. No falavin nancje cuant che o segnavin la Regjon – cu la sô sigle “Fvj” dominante su ogni acjadiment – disint che si sarès intestade la paternitât di une ricostruzion, e duncje de sô imagjin e des carateristichis unitariis che la zonte di vuê si sint erêt. Une ereditât che invezit no corispuint ni aes carateristichis politichis di chê epoche, ni ai valôrs che a costituivin la sô base ideâl. Intal memento imediât e sucessîf al disastri, nancje la zonte di chê volte, vuidade di Comelli, e jere stade ae altece de situazion, ma bisugne ricognossii che e à savût dopo, cualchi volte adatantsi a cualchi brut tîr, contentant lis justis domandadis che a vignivin dal bas, de organizazion des tendopolis, de riscuvierte di une cussience comunitarie e identitarie antighe, tacant un cjamin di colaborazion cun chei sindics che a son deventâts la anime fuarte e mestre de rinassite.
✽✽ O vevin reson cuant che o domandavin che lis manifestazions par chest cincuantenari no deventassin une scjate vueide, jemplade di avigniments efimars, cuant che o pretindevin che un ricuart dovût aes vitimis no si trasformàs in spetacul e vonde, e che no bastàs la presince dal cjâf dal Stât a significâ il ricognossiment a chei che si àn batût in chei agns par che dut al tornàs “cemût che al jere e dulà che al jere”.
✽✽ Ve, o partirès propit di cheste peraule di ordin de nestre int par smitizâ la conte che vuê che o sin vitimis: nissun nol à di dismenteâ cemût che intai dîs dopo de devastazion, su chel elicotar des autoritâts che al jere daûr a svolâ sore des areis taramotadis, e someave za cjapade la decision di fâ vanzâ lis pacaris sui nestris paîs. Si pensave ae ricostruzion dilunc de Pontebane, a une “deportazion” des popolazions da pît des monts fint ae Cjargne. Ve il model Friûl che a jerin daûr a sielzi, un progjet blocât de popolazion.
✽✽ “Insume, o disìn la veretât – al scriveve Mauro Tosoni, diretôr dal gjornâl “In Uaite” e puartevôs des tendopolis dopo la manifestazion dai 5000 taramotâts dai 7 di Zenâr dal 1978 a Udin. – Nus àn ridusûts a fâ une bataie di difese, a lâ jù în place no pe ricostruzion, ma pes jentradis de ricostruzion. A domandâ bêçs inte sperance che no si fermin ducj intes borsis dal clientelisim e dal nudriment des impresis, cuant che invezit o varessin vût di dedicâ lis nestris energjiis fisichis e inteletuâls a decidi la cualitât de ricostruzion, par miorâ in plui che par ricostruî. No come prime, al jere stât dit daurman dopo il taramot. Cumò, a planc – al leve indevant Mauro – si stin usant ae idee che e sarà za tant se o rivarìn a jessi come prime. E je une logjiche che e covente crevâ se no volìn jessi cjapâts sot. Une vie di jessude e je ancjemò pussibile, ma dome se i furlans che no vignaran comprâts dal clientelisim, la grande maiorance, a savaran unîsi e mostrâ la muse”.
✽✽ Cheste e je la storie vere, no il conciert di Bocelli. ❚
