Ai furlans che a crodin

A 6 di Mai dal 1976 il Friûl al vignive sdrumât dal taramot e 50 agns daspò i furlans no dismentein chei moments e ducj chei che nus àn judât. 990 muarts, 2607 ferîts, 18 mil cjasis devastadis e 75 mil inabitabilis: a son chescj i numars che a van tramandâts di gjenerazion in gjenerazion par fâ capî a chei che a vignaran ce che “di scjas in scjas” la nestre tiere nus puarte cuntune frecuence medie – nancje a fâ di pueste – propit di 50 agns.
◆ Nuie pôre. In chê volte la ricostruzion e à fat tant par ridusi l’impat de sismicitât: ma il lavôr di adeguament nol finìs mai e tantis robis a vegnin dadis par scontadis. Cun di plui, ancje la Protezion Civîl, che e je la ereditât principâl di chei timps dificii, nus jude a pensâ di jessi sigûrs. Il fat al è che al taramot si zontin altris menacis de nature, dai slacs aes diluvions che il cambiament dal clime si mene daûr. De tampieste di Vaia a chê di Mortean, de aluvion di Viarse ai slacs di Breçan, ancje tal gnûf milenari o vin viodût che no podìn stâ mai sigûrs.
◆ E alore, ce fâ? Al sarès di lavorâ su la prevenzion, prin di dut: ma al è un lavôr che, se si vûl che al resti, al passe simpri pal recupar de memorie e dal sens di identitât. A son dimension necessaris par frontâ il presint e l’avignî, e su chest noaltris de Patrie o cirìn di tignî dûr, come che i nestris vons a àn tignût dûr tes disgraciis che la Storie ur à metût devant.
◆ Par no pierdi la memorie di cui che al à indreçade la ricostruzion 50 agns indaûr, o vin volût meti in pîts un ricuart dal moment forsit plui significatîf di chê rinassite. Ducj a ricuardin il sproc “Prima le fabbriche, poi le case, poi le chiese”: e tancj sal intestin come se al fos stât inventât di lôr. Lis cjartis a disin invezit che i paris di cheste formulazion a son i predis di Glesie Furlane. Ai 9 di Mai, trê dîs dopo dal scjas, si derin dongje e a scriverin un document indreçât “Ai Furlans che a crodin”: doi dîs dopo lu presentarin al Vescul Battisti, e a ducj i predis de Diocesi. Il rest al è storie: il Vescul lu à fat so e chel test, jessût su “La Vita Cattolica” ai 22 di Mai, al è deventât il prin modon de ricostruzion.
◆ Al diseve che il popul furlan “nol domande ni compassion ni limuesine. Al crôt di vê dirit a un tratament compagn di chei altris di bande dal Stât” ma ancje di podê “sielzi e decidi di bessôi cemût ricostruî la nestre tiere su la fonde di une esperience di popul madressude intai secui”. Al auspicave la union dai Partîts e al domandave di doprâ lis casermis par dâ un tet a cui che no lu veve plui. Soredut, al diseve che il prin pont de rinassite al jere dâ puescj di vore ai furlans intai lôr paîs par no favorî une gnove emigrazion. Dopo si veve di pensâ a dâur une cjase a ducj, e dome intun secont moment al coventave tornâ a tirâ sù lis glesiis, “libris vierts su la nestre storie”. L’ultin pont, che no si ricuarde mai, al jere che za in chel document si pensave ae Universitât, che e je deventade dopo dal taramot une bataie identitarie. Se la int e à tacât a tirâ sù firmis sot des tendis al è parcè che la Glesie e à poiât chê lote.
◆ Par memoreâ chel moment straordenari dulà che la Glesie Furlane e je stade tant profetiche e visionarie, o vin inmaneât inte Glesie di Sante Marie sul Cjistiel di Udin une Messe propit ai 11 di Mai e il vescul di Udin bonsignôr Riccardo Lamba al à volût jessi cun nô, propit par ricognossi la fuarce che i predis di chê volte a verin tal cjalâ indenant e tal no tirâsi indaûr rispiet ae lôr mission. Par nô al è un onôr.
◆ Magari cussì no, a chel apontament nol pues jessi presint pre Tonin Cjapielâr, colone di Glesie Furlane e de “Patrie”, che nus à lassâts il prin di Avrîl. La sô firme su chestis pagjinis e jere garanzie di une leture profonde de realtât, la sô peraule pe nestre redazion e jere simpri risultive di determinazion intal difindi la identitât dai vons. Al à dade la sô vite “Ai Furlans che a crodin” intun avignî dulà che la identitât cristiane e furlane di cheste tiere no sedi bandonade.
Ancje se no tu sês plui cun nô, la tô ispirazion no vignarà pierdude. Cungjò, pre Tonin. ❚