La sfide di Rebecca: fâ cressi la famee e une aziende su pes monts

La imprenditore Rebecca Gortani e ven di Cjabie, e à 26 agns e e à 3 fruts piçui (il prin di 5 agns, chel tal mieç di 3 e la piçule di 1 an) e di cualchi mês e vîf cu la sô famee a Somp Cuers (fra Dimpeç e For Disot) a 1000 metris di altitudin, a 1 km de strade statâl e a 1 km de prime cjase de frazion.
◆ “O vin comprât cheste grande largjure di teren, il bosc, la cjase e la stale cirche 3 agns indaûr ca sù, dopo vê zirât ator pe Cjargne un biel pôc. La idee e jere chê di cjatâ un puest di pâs, isolât, cun prâts indulà fâ cressi la nestre famee e lu vin cjatât achì: sot de mont e indulà che o sin dome nô. Po dopo o vin ristruturât la cjase e la stale.
O ai 7 vacjis di lat (il lat lu puarti te latarie), uns pocjis di gjalinis e cumò o sin daûr cjoli cualchi purcit di tirâ sù par dopo vendi i lôr prodots.
Il gno om mi da une grande man: al à un lavôr di mieze zornade, cussì chê altre mieze mi jude inte mê ativitât.
◆ O scuen precisâ che jo no soi nassude cun cheste passion, no le ai vude tal sanc come il gno om, ancje se mê none, gno pari e gno barbe a àn simpri vût vacjis e compagn ancje a cjase dal gno om che al è di Murùs. Finide scuele o ai lavorât par un pôcs di agns in fabriche, dopo mi soi licenziade e o ai viert cheste mê ativitât agricule cu la idee di rivâ a gjestîmi di bessole.
◆ Dongje des vacjis si dedichìn ancje ae agriculture: chest an o vin semenât dut il nestri cjamp (cirche 2.000 metris cuadrâts) a cartufulis e fasûi. La racuelte e je lade benon e o vin podût vendi.
Pal moment al è cussì ancje parcè che o ai 3 fruts piçui e o scuen organizâmi.
◆ O vin un altri stabil che o vin di pensâ di comedâlu. Jessint une imprenditore zovine, par 5 agns o ai agjevolazions e cualchi contribût. A son za passâts 3 agns e mi tocjarà pensâ ben ce fâ, o ai intal cjâf diviersis ideis. Une e je chê di fâ un laboratori pe lavorazion dal lat; la mê intenzions e sarès chê di fâ un pocje produzion di prodots particolârs tant che la brume cuete (tal. panna cotta), jogurt e scuete, o fâ cjamocis par tirâ sù purcits.”
◆ Rebecca e je une zovine plene di morbin, i vin domandât “ce dificoltâts âstu vût pal fat di vivi in mont?” – “No ‘nd ai, par cemût che o soi fate jo! Il gno pinsîr al jere pai fruts: jessint usâts a vivi intun paîs cui lôr amiuts, o vevi pôre che a fasessin fature intun ambient gnûf, invezit si son ambientâts benon. No sint la solitudin, ancje parcè che o soi simpri cun cualchidun. Se o ai bisugne di alc, o cjol la machine e o voi… o soi a stâ fûr ma o ai dut a puartade di man. Jo e il gno om o vin fate une sielte coragjose, cu la voie di lassâ alc di diferent ai nestris fruts. Cumò a son ducj che a decidin di sierâsi dentri intune scjatule di apartament…
◆ I fruts di vuê – mi somee di cjacarâ come une di 70 agns – a son plens di impegns, ju metìn a scuele dut il dì, dopo a àn mil ativitâts extra come se a vessin la vite za programade, ma parcè? A àn une vite devant par jessi tormentâts e impegnâts a fâ ce che la societât ur impon. La zornade che si cope il purcit i miei fruts a stan cjase par vivi chest moment. Chest al è ce che ur volarès trasmeti. La mê e je stade une sielte cuintri corint, che e vûl dî di no lassâju a slas, cence nissune regule, ma cirî di no programâur subit tant la vite… fâur viodi che di là dal parc dai zûcs a ‘nd è tante altre biele robe di viodi e di imparâ. No vûl che si stressin tant adore e che a vivin une vite ingredeade, dulà che no si impensin indulà che a àn poiât une tace: a àn di fermâsi, pensâ un moment, cjalâ a viodi ce biel che al è chel arbul alì. Dopo, il fat di savê di dulà che e ven la robe che si mangje par me al è impuartant. Jo o ai miôr tirâ sù il purcit savint ce che al mangje pluitost che lâ a comprâ une cragne. Il fat che i miei fruts a capissin e a savedin di dulà che e ven la fete di salam che a mangjin, al è alc di valôr. Al è stât biel viodiju cuant che insiemi o vin semenât i fasûi, ju vin cjapâts sù e cumò ju stin scosolant par vendiju.
◆ Nissun mi à dit brave par cheste sielte, anzit, o ai vût plui di cualchi persone che su la mê sielte mi à fat vignî plui dubis che altri. Ma jo o soi contente di ce che o ai fat. La uniche robe che mi fâs pôre e je la nêf: mi àn dit che achì e je zone di tante nêf… viodarìn chest prin Invier.” ❚