La scuele furlane si prepare a vê un biel trop di insegnants di fûr Regjon: ve parcè

Insegnants in regjon nol è che a no ’nd sedin avonde e ancje cu lis carateristichis par insegnâ – lis abilitazions necessariis, agns di lavôr precari tes scuelis statâls e vie indevant –, ma no jerin tes listis justis, chês che il Guvier al à decidût che a vevin di jessi cjapadis in considerazion par fâ passâ miârs e miârs di docents intun puest di lavôr definitîf.
Un procès meritori tal principi ma – come che spes al sucêt – tra la teorie e la pratiche e passe une cierte diference. E cussì i numars plui inzornâts, viôt la tabele te pagjine, a disin che in Friûl-Vignesie Julie a son puescj par 825 assunzions, ma si è podût fant dome 571 par vie che tes listis indicadis dal ministeri no jerin plui insegnants a disposizions. Ma chest vuelial ancje dî che i insegnants a jerin finîts? E che tocje fâju vignî di fûr?

PESCJÂTS DI FÛR
“Ma nancje par insium”, al dîs Mario Pittoni, responsabil federâl Istruzion de Lega Nord e bielzà senatôr, che di scuele si è simpri interessât. “A Udin, par esempli, 42 catedris no podaran jessi cuviertis e a finiran te cjalderie nazionâl” e a fasin part dai 254 puescj che a varan di jessi ocupâts di int che e ven di fûr e che e jentrarà in rûl par mieç dai trois b) e c) individuâts dal ministeri, dopo che il troi a) al jere chel des graduatoriis a esauriment. “O vin di lâ a pescjâ di fûr si ben che chenti o vin insegnants une vore esperts e formâts”, al va indevant Pittoni. “Al sarès bastât che il Guvier nol ves escludût lis graduatoriis di istitût. Si à volût pescjâ i insegnants di une uniche liste, escludint chei ancjetant brâfs, presints in altris listis”.
IL REFUDAMENT DE CISL
Al refude il plan di assunzion de “Buine scuele” tant che proviodiment “fat di corse, incomplet e injust” il segretari regjonâl de Cisl Scuele, Donato Lamorte. “O continuarìn a vê dibisugne di suplents – al dîs – e no si capìs parcè che no si à volût stabilizâ chei in organic, obleant lis personis a trasferiments”.
Cun di fat, chei insegnants che a vignaran di fûr par no pierdi il puest, magari no viodin la ore di tornâ di dulà che a son vignûts, parcè che magari a àn lassade la famee. In Friûl-Vignesie Julie dome un tierç di chei che a varessin podût fâ domande par viodi se a rivavin a vê un puest cuissà mai dulà ator pe Italie le àn fate: 980 su 2.700 precaris. “Miôr precaris che esui”, si à titolât in chês zornadis.
fli
SCJARSE RAZIONALITÂT
“Cemût si fasial a dî che al è un capriç o che si cîr dome il vivi cuiet – al tone Lamorte -. Cemût si fasial a no tignî cont che in tancj no àn acetât di lâ cuissà indulà par impediments che cualsisei nol varès di fâ fadie a imagjinâ”.  Pal sindicalist, cheste mobilitât obleade e je dome “un dai efiets di une scjarse razionalitât”. Ancje il segretari regjonâl de scuele de Cgil, Adriano Zonta, al à criticât il sisteme, domandantsi se cui che lu à metût in pîts “al cognòs pardabon la scuele o se a disin di cognossile dome par vêle frecuentade”. Dut câs, Zonta al è stât dûr cun chei precaris dal Friûl-Vignesie Julie che no àn presentade domande par jessi assunts vie pe Italie. “Si trate di un puest di vore e la domande e lave interpretade tant che une oportunitât. No lamentâsi po se i puescj a saran ocupâts da insegnants dal Sud”.
Lamorte, par finî, nol dismentee nancje il personâl Ata (Aministratîf, Tecnic e Ausiliari): “O domandìn che si fasin imissions in rûl almancul par cuvierzi chei che a van vie par pension e a van disponudis lis suplencis di ducj i puescj disponibii, par consintî un inviament normâl dal an scolastic”.❚
Antonella Lanfrit