EDITORIÂL – In Regjon a àn voie di fânus fâ la fin dai cunins te padiele

✽✽ Di pôcs dîs si son tornadis a vierzi lis scuelis e il nestri pinsîr al pues dome che lâ a chês miârs di fameis che ancje chest an a àn dit di sì al insegnament dal furlan. No cate dut, o zontìn nô, viodudis lis tantis lacunis che, ancjemò vuê, il studi de marilenghe al presente inte sô ativazion pratiche. No molarìn mai di denunziâ chei dirigjents che a scuindin lis domandis intai scansei, che no fasin informazion e che mâl a sopuartin lis domandis rivadis. O chei docents, e e je chê altre muse de medaie, che a svilissin i cors, metint di mieç ae serietât de didatiche la facilonarie de filastrocje.
✽✽ Ancjemò une volte al è il popul, intindût tant che insiemi cussient di personis diviersis tra di lôr, ma cun lidrîs comunis, plui indenant de politiche e des istituzions. La adesion al furlan e dimostre cemût che il ricognossiment de identitât nol sedi peraule vueide o voie inteletuâl, ma propit un ricognossi la realtât, cence tancj zîrs di peraulis o precisazions.
✽✽ Une art straordenarie chê des precisazions che e je daûr a rivâ ai siei nivei massims cuant che in bal a son leçs e decrets che a rivuardin lis minorancis linguistichis dal stât talian. Scomençant de definizion stesse di minorance. Su chest pont preliminâr si à di ribati che il furlan al è la lenghe de maiorance dai abitants di cheste regjon e di chest o varessin di visâsi plui dispès cuant che, cjapâts di un “bonisim pervers”, si drecìn difensôrs di chês altris lenghis presintis sul teritori, masse voltis no ricambiâts in cheste atenzion des lôr associazions e organizazions politichis e economichis.
✽✽ L’ultin câs al rivuarde la Rai e la sô riforme: al Senât e je passade la tutele dome par todescs, francês e slovens. Il fat plui grâf nol è che il stât talian si môf in cheste direzion discriminatorie, no je une novitât, ma une ciertece, ma che i senatôrs  furlans no vedin dite une peraule: o compliçs o incapaçs, no si viodin alternativis.
✽✽ Dal rest, chest al somee che al sedi aromai un mût di procedi consolidât, soredut intal partît di maiorance, il Pd: si mostrisi vierts al plurilinguisim ai festivai de Unitât e intes cunvignis, si esprim fintremai la presidence dal orghin istituzionâl massim di poie al furlan, la ARLeF,  si apelisi, l’onorevul Pegorer, par che la Italie e ratifichi la Cjarte europeane des minorancis, ma intant si tâs, no si oponisi a un dissen clâr di prevaricazion.
✽✽ E che nol vegni a dî, simpri Pegorer, che dut chest al sucêt parcè che daûr di todescs dal Sud Tirôl, francês de Val di Aoste e slovens dal F-VJ, a son acuardis internazionâi cun stâts forescj. La Cort costituzionâl – cemût che al à visât ben il neu president de Comunitât linguistiche furlane, il sindic di Cjarlins Diego Navarria – e à precisât che “no je ametude nissune discriminazion tra lis dodis lenghis tuteladis de Costituzion”. Dut inte logjiche di ridusi la impuartance, se no fintremai dineâ lis resons des autonomiis speciâls.
✽✽ Intal ultin mês,  de distribuzion dai seçs cul Italicum ae riforme des Uti,  la cussience di cjatâsi  su pe taule un svuacet ae furlane al è palês.
Ae Expo a àn dedicade une zornade al cunin nostran. Cirìn di nol fâ la stesse fin.. ❚
Dree Valcic