La place dal marcjât par fâ viodi dut ce che o vin di bon

Il stand di Ersa, che al sarà grant tant che e je grande la place, al sarà caraterizât da lis scritis dal “Tipicamente Friulano” e cui colôrs de marche regjonâl. Intal stand, si podarà çerçâ e comprâ ducj i prodots agroalimentârs e i tancj vins de nestre tiere e si podarà viodi dal vêr diviersis lavorazions e tantis degustazions, cumbinant vin e formadi o altris prodots di ecelence tant che il persut di Sant Denêl, il Montasio, la trute, pes tant che salams e altris golosets.
Par ducj i cuatri dîs intal stand di Ersa si cjataran ducj i Consorzis de nestre regjon: lis siet Doc dal vin, i produtôrs di bruade, il figo moro, il Consorzi pal Persut di Sant Denêl, lis patatis dal Friûl, la Vacje Flore (par talian clamade “Pezzata rossa”, ndr), ducj i prodots fats cul lat – formadi di sigûr ma ancje lat e gjelât e dut ce che al ven diretamentri de nestre tiere.
Il diretôr di Ersa, al conte cussì l’intent che la Agjenzie e à voie di puartâ indenant, soredut cu la promozion dal Tipicamente friulano.
“Cheste marche e nas cu la volontât di meti sot di une bandiere ugnule dut chel che o viodìn nassi, cressi inte nestre campagne, e dut ce che al ven trasformât intes nestris braidis e aziendis furlanis!”
“Il Tipicamente friulano al è insieme tradizion, esperience, teritori, coltivazion, arlevament, insome, dut ce che al rapresente lis nestris produzions di alte cualitât e di ecelence. Dut chest si podarà cjatâ, in Place Sant Jacum tal cûr di Udin, dai 15 ai 18 di Setembar, te vetrine plui impuartante che o vin par fâ cognossi lis nestris ricjecis. Vignît in place par Friuli Doc, o restarês di sigûr contents”.
Cinzia Collini