LA PARABULE DAL MÊS

LA PARABULE DAL SEMENADÔR
(Mt 13,3-9. 18-23)
Lis parabulis a son des storiutis, des similitudinis gjavadis de vite di ogni dì, che Gjesù al contave al popul par fâsi capî, e palesâ alc di chel misteri che lui al clamave ‘Ream di Diu’. Un mût inteligjent e fin ancje sul plan pedagogjic par dâ une olme, une idee dal progjet di vite di chel Diu che al reste par nô incognossibil, ma che ancje il plui sempliç al pues intuî. O scomençin cuntune parabule che Gjesù al spieghe diretamentri.
Il semenadôr
Mc 4,3-9; Lc 8,5-8
Ur disè: “Ve: un semenadôr al saltà fûr par semenâ. 4Tal butâ la semence, une part e colà dilunc fûr pe strade; a rivarin i ucei e le mangjarin. 5Une part e colà tun teren dut plen di claps, là che no jere cuissà ce tiere; e cussì, par vie che la tiere no jere fonde, e nassè daurman. 6Cuant che però al jevà il soreli, si arsinì e, no vint lidrîs, si secjà. 7Une part e colà framieç des spinis e chês, cul cressi, le scjafoiarin. 8Par ultin, une part e colà sul teren bon, che di fat e butà di une bande il cent, di un’altre il sessante e di un’altre ancjemò il trente. 9Chel che al à orelis, che al scolti!”.

La semence e je la peraule dal ream
Mc 4,13-20; Lc 8,11-15
18Vualtris duncje o capîs la parabule dal semenadôr. 19Se un al scolte la peraule dal ream e no le capìs, al ven il trist e al puarte vie ce che al è stât semenât intal so cûr: cheste e je la semence colade dilunc fûr de strade. 20Chê colade sul teren plen di claps e je il spieli di chel che al scolte la peraule e le ricêf daurman cun gjonde, 21dome che nol à in sè lidrîs ni tignince; a pene che e capite une tribulazion o une persecuzion par colpe de peraule, al cêt dal moment. 22Chê colade framieç des spinis e je il spieli di chel che al scolte la peraule ma dopo, midiant che lis preocupazions di chest mont e la passion pes ricjecis a scjafoin la peraule, al reste cence prodot. 23Chê invezit che e je colade sul teren bon e je il spieli di chel che al scolte la peraule e le capìs; chel al bute e al rint di une bande il cent, di un’altre il sessante e di un’altre ancjemò il trente”. ❚
✒ pre Roman Michelot