Il vanzeli, tune imagjin trionfâl, nus presente il judizi sui oms e su la storie. No sino simpri sot judizi? La nature, cun tantis sieltis sbaladis che o fasìn, no nus staie judicant? La miserie e la fam tal mont no sono un judizi cuintri la rapine e la massepassuderie? Cuâl isal il criteri di judizi, ce cjalial chest judiç? Nol cjale se o vin preât tant o pôc, se o vin difindude la religjon magari cu la sclope. Nol bade se o vin difindût principis astrats o ‘valôrs no negoziabii’. Ma al sentenzie sul amôr vêr, concret, su la vite vivude cun umanitât e rispiet, se si sin impegnâts pal ben dal om e par dut ce che lu jude a vivi cun dignitât.
Pre Roman Michelotti
Pioris e rocs
Mt 25,31-46
31Cuant che il Fi dal om al vignarà te sô maestât, compagnât di ducj i siei agnui, alore si sentarà su la sô sente di glorie 32e denant di lui a saran dadis dongje dutis lis nazions; lui ju dividarà un di chel altri, come che il pastôr al divît lis pioris dai rocs, 33e al metarà lis pioris a la sô diestre e i rocs invezit a la sô çampe. 34Alore il re ur disarà a di chei che a son a la sô diestre: Vignît ca, benedets di gno Pari, a cjapâ paronance dal ream prontât par voaltris di cuant che al è stât fat il mont. 35Parcè che o ai vude fam e mi vês dât di mangjâ; o ai vude sêt e mi vês dât di bevi; o jeri pelegrin e mi vês sotetât, 36crot e mi vês vistût, malât e o vês viodût di me, o jeri in preson e o vês stât a cjatâmi. 37Alore i juscj i disaran: Signôr, cuant ti vino viodût plen di fam e ti vino dât di mangjâ, plen di sêt e ti vino dât di bevi? 38Cuant ti vino viodût pelegrin e ti vino sotetât? Crot e ti vino vistût? 39Cuant ti vino viodût malât o in preson e vino stât a viodi di te? 40E il re ur rispuindarà: Us al dîs in veretât: dut ce che o vês fat a un dai plui piçui di chescj miei fradis, mal vês fat a mi. 41Po ur disarà a di chei che a son a la sô çampe: Lait lontans di me, maladets, tal fûc eterni, prontât pal diaul e pai siei seguaçs. 42Parcè che o ai vude fam e no mi vês dât di mangjâ, o ai vude sêt e no mi vês dât di bevi, 43o jeri pelegrin e no mi vês sotetât, crot e no mi vês vistût, o jeri malât e in preson e no vês stât a cjatâmi. 44Alore i rispuindaran ancje lôr disint: Signôr, cuant ti vino viodût plen di fam o di sêt, pelegrin o crot, malât o in preson e no vino viodût di te? 45Alore ur rispuindarà disint: Us al dîs in veretât: ce che no vês fat a un di chescj plui piçui, no mal vês fat a mi. 46E chei chi si ‘nt laran tal cjastì eterni, i juscj invezit a la vite eterne”.
