Sfuei Mensîl Furlan Indipendent
Archivi de Patrie

La ostarie, la cjase plui sclete dai furlans

............

Se us domandin cuâl che al è il puest – tal vuestri imagjinari o te vuestre memorie – che al rapresente miôr la comunitât dal paîs furlan, dal sigûr us vignaran iniment tantis robis: la place, la glesie, il municipi, la latarie, la canoniche, il plaçâl de sagre… E va ben, dutis rispuestis che a àn un sens. Ma o sin pronts ancje a scometi che la rispueste di tancj e sarà “la ostarie”.
Parcè che – ancje lassant de bande la vecje e strache iconografie dal furlan cjochele “simpri ator pai bars” – al jere te ostarie (massime une volte, cuant che il bar de vile al jere cuasi simpri ancje il negoziut di alimentârs…) che la int si cjatave par fevelâ des robis dal paîs. Al jere li che si tontonave cul sindic par cualchi alc che nol tornave, al jere li che i coscrits a fasevin la riunion par organizâ la sagre dal paîs o il bal, al jere li che lis feminis si cjatavin ogni dì par comprâ il pan, par fâ une babade e par dâi un cuc ae pagjine dai muarts sul gjornâl. Timps li che – memorie di un vecjo bancjari – la ostarie le clamavin in maniere scherçose “ufficio liquidi”, tant a dî che ai furlans par solit ur ven miôr a discori di bêçs denant di un tai, pluitost che intun ufizi anonim.
Disìnsi la veretât, la ostarie par nô furlans no à nuie a ce fâ cu la fieste de sabide di sere, cun chê che i disin “movida”. Parcè che te culture furlane la ostarie e je alc che al à a ce fâ cun ogni dì, plui di dì che di gnot, al massim prime di misdì o sot sere, prime o dopo di gustâ; al è chel puest dulà che si scuen passâ, o prime o dopo, par savê ce che al sucêt tal paîs, ce che e je daûr a organizâ la Pro Loco o fintremai cui che si maride cun cui…
Po dopo, tocje ancje jessi onescj cui timps di vuê, che a contâ robis tant che la ostarie di paîs di une volte si riscje di semeâ nostalgjics dal “piçul mont antîc”, e no si fasarès onôr al Friûl di vuê (massime cumò che, dopo agns di corse ae modernitât a ducj i coscj, ancje tra i zovins al somee che e torni la voie di discuvierzi i costums de proprie identitât…), e ancje a chei che ancjemò cumò a lavorin par tignî viertis lis ostariis ator pe Patrie.
Parcè che al è dibant cjapâsi pal cûl, i timps a son cambiâts, e in dì di vuê la ostarie e à di competi cuntun marcjât di ristorazion simpri plui ferbint e complicât, e – tant che i bars plui “normâi” – cun tassis e burocrazie (e di cumò indenant forsit e sarâ ancjemò plui dure, se e je vere che lis variis Tares, Tarsu e Service Tax a saran un brut colp massime propit pai piçui esercizis).
Vuê un paron di ostarie al à di scombati cun tantis dificoltâts, e cuasi cuasi si pues rivâ a capî chei che, par cirî di tirâse fûr, si fasin cjapâ de tentazion di disnaturâ chel che al jere un locâl di famee, di provâ a cambiâ la lôr vecje ostarie magari intun “wine bar” plui ae mode, par provâ a fâ casse cun vins di etichete supierbeôs o cun “spritz” futuristics, pluitost che sperâ di rivâ insom dal mês a colps di taiuts di vin di cjase in tacis di veri grues, di platuts di pan e formadi o di zeuts plens di ûfs dûrs.
Un grant merit – su chest argoment – al è dal sigûr di ricognossi a di chei che, in chescj agns, si son spindûts par difindi la ereditât storiche che chescj locâi àn simpri rapresentât – in primis il Comitât pe Difese des Ostariis Storichis dal mitic Enzo Driussi, ma ancje il pûr limitât contribût de normative regjonâl sui locâi storics, che forsit al è stât e al reste un piçul incoragjament par fâ passâ la voie a cualchi gjestôr di cambiâ la lampadine cuntun neon fluoressent o il vecjo bancon di len contun di plexiglas e metal.
Ma, dut câs, chê che e pues mantignî ancjemò vivarose cheste part integrante de nestre culture e je la int, che cu la sô frecuentazion e pues ancjemò tignî vîf chest mont. Declinât, magari, in cualchi maniere plui moderne, cun chel cimi di inteligjence di rivâ a tignî dongje i zovins cui lôr guscj plui cosmopolits, ma ancje i plui vecjos, cui lôr rais di briscule, la musiche zovine di un dj “di stîl” cun cualchi vecje vilote, magari sunade cu la armoniche. Parcè che la carateristiche storiche des ostariis e je propit chê che a son transgjenerazionâls. Nus plâs la idee di une ostarie cun tais di neri, ûfs dûrs e briscule, ma magari – parcè no – furnide cuntun modernissim servizi wi-fi… ❚
Margherita Timeus

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +