LA OPINION. La politiche de muart cuiete de lenghe furlane

Dopo vot agns che e je sparide, forsit e covente fate un pocje di memorie su ce che e podarès jessi la planificazion linguistiche pal furlan.
La planificazion linguistiche, daûr des liniis classichis, e je une pratiche di azions coordenadis che si disglagnin in trê cjamps:
• status: par fâ cressi la concezion che la int e à de lenghe.
• corpus: par dâ ae lenghe dutis lis pussibilitâts espressivis che i coventin (grafie uficiâl, lenghe standard, neologjisims, lessic codificât, e v.i.).
• acuisizion di gnûfs locutôrs: par che il numar di chei che le fevelin al cressi (soredut cu la scuele) o che al resti a nivel, se di no cu la muart naturâl di chei che le fevelin, e simpri mancul che le imparin, une lenghe e va a pierdisi.
Di vot agns incà la planificazion e je sparide. No je plui nissune strategjie, nissune continuitât: dopo finîts i lavôrs za inviâts, cuasi nuie di gnûf, pierdudis lis professionalitâts che si jerin formadis. Dut al à cjapât la forme di events isolâts (esemplâr la leture de Biblie): cjapâts un par un, a puedin plasê o no, ma tal complès a piturin un desert politic, culturâl e morâl.
Merit de Zonte Tondo, contrarie al furlan, merit de oposizion, cidine e ignorante come i siei aversaris de maiorance, merit de Zonte Serracchiani, che ancje se no rive a fâ piês di Tondo, e va de stesse bande.
Merit di une Arlef che invezit di meti in vore une planificazion linguistiche pal furlan, si impegne a meti in vore la politiche regjonâl pal furlan: e si scuen rindisi cont che no je la stesse robe.
La planificazion linguistiche pal furlan e volarès fâ deventâ il furlan une lenghe normâl; la politiche regjonâl pal furlan e vûl rivâ ae muart dal furlan, in osservance de tindince politiche statâl taliane. Dome che viodût che la Regjon e à di rindi cont ai furlans, e à di fâ murî la lôr lenghe intune maniere che si puedi acetâ.
La politiche regjonâl pal furlan e permet di vê risultâts su status e corpus (ma se a son masse bogns e bloche sù dut), ma no vûl in nissune maniere la acuisizion di locutôrs.
Lis leçs a disin tantis robis, ma si aplichin dome chês no pericolosis pal monolinguisim talian: furlan a scuele, te television, certificazion des competencis linguistichis, plan gjenerâl di politiche linguistiche, a son letare muarte, cun Stât, Regjon, Arlef, Rai, Universitât, scuelis e v.i. che a van a plen cuintri de leç.
Cence acuisizion di locutôrs, la politiche linguistiche e denunzie la ipocrisie di cui che al spint ancje alc (simpri mancul), ma a pat che il furlan al ledi a pierdisi.
L’obietîf al è stâ cuiets e fâ stâ cidins chei che al furlan i tegnin: Stât e Regjon a son cuiets parcè che a metin leçs e cuatri francs; la Arlef e je cuiete parcè che, cul so “dream team” di furlaniscj inutii, e zire cjartis e e fâs cualchi azion simboliche; i gjenitôrs a son cuiets parcè che a domandin il furlan a scuele, cence pericul che lu insegnin.
Ducj cuiets po, parcè che la politiche taliane e regjonâl e vûl la muart cuiete dal furlan: nol murirà in 50 agns, cemût che a previodevin lis statistichis agns indaûr. Che al fasi cun calme, magari in 100 agns, e al murirà ancje in buine salût (cuntun bon status, rispietât e amât di ducj), inte bondance (cun imprescj linguistics che i varessin permetût di vivi); ma cence flât e za tant timp prin di murî nol varà plui rilevance sociâl.
Cheste e je la politiche regjonâl de muart cuiete de lenghe furlane: e contente ducj, gjavant chei che a vuelin pardabon une planificazion linguistiche pal furlan. ❚
Sandri Carrozzo