La nestre lenghe e la nestre culture tes scovacis

Cualchi volte une imagjin e vâl plui di cetantis peraulis. Par chest si pues domandâsi se la foto achì dongje fate a Midun – che e je rivade tai social media bielzà vie pe Primevere dal an passât, ma che e je rivade ancje fûr dal zîr de comunitât locâl dome tai ultins dîs – e segni une proiezion visive de considerazion pe nestre lenghe e pe nestre culture in cetantis zone dal Friûl-Vignesie Julie e no dome dal Friûl di là da la aghe.
◆ Pal sigûr al fâs bote viodi tes scovacis cartei par talian e par furlan. Si podarès pensâ che magari a son dome masse vecjos e che ju vedin butâts vie parcè che ju àn cambiâts cun cartei bilengâi plui gnûfs e plui biei… E invezit no, al somee che chei cartei, fats gnûfs agns indaûr, no sedin mai stâts metûts sù – ancje se a son passâts plui di vincj agns di cuant che e je stade fate buine la leç di tutele 482/99 di tutele des lenghis minorizadis.
◆ La sindiche dal Comun di Midun, Marina Crovatto, che e fevele furlan e che e veve viodût ancje jê la foto tai social media bielzà te Primevere stade, nus à fat savê di no savê nuie di cheste situazion. La sô aministrazion comunâl, anzit, si sta interessant par meti gnûfs cartei bilengâi. In merit ai cartei te foto, ae nestre redazion e à declarât di vê fat verifichis tal magazen comunâl. Chei cartei a son stâts recuperâts cun chê di tornâ a doprâju.
◆ Ma tai agns stâts, magari di cualchi aministrazion comunâl di Midun passade, i cartei vecjos a son stâts ordenâts, e ordenâju midiant des leçs e dai bêçs dal Stât par dopo no metiju sù al è un dam erariâl. Come che dam erariâl e no dome straçarie al è lassâju difûr a ruvinâsi cence jessi doprâts. ❚