Cutuardis tocs musicâi di scoltâ, une testemoneance audio e un booklet di novante pagjinis cui tescj des cjançons e cun altris contignûts di lei e di cjalâ, tra citazions leterariis, poesiis, fotografiis de epoche, ilustrazions di autôr e doi contribûts che a introdusin la scolte e la leture. Al è dut ce che si cjate dentri di “Lis Lotis dal Cormôr 1950 – Lis Cjançons dal Cormôr 2020”, opare coletive là che si dan dongje la ispirazion artistiche, la documentazion storiche e la volontât di memoreâ une pagjine impuartante dal Nûfcent furlan, ancje cun chê di vê i indicazions buinis pal presint e pal avignî.
◆ Il cd al fâs part de golaine BlockNota de etichete discografiche Nota, e pes sôs carateristichis si presente tant che un candidât naturâl pe Targhe Tenco pes oparis coletivis. La publicazion e je une des iniziativis dedicadis al storic “siopar par ledrôs” fat inte Basse Furlane inte Vierte dal 1950, che a son stadis promovudis de bande de rêt di entitâts e di istituzions, coordenade de associazion Artetica e de Anpi Premoli che a ‘nt fasin part ancje Anpi Udin, Auser Udin e Auser Turgnan, Cgil Udin, Ifsml, Cirf e Dium de Universitât dal Friûl, Primacassa F-VG, Informazione Friulana, Teatro della Sete, associazion APS Klaris, Radio Onde Furlane e i Comuns di Cjarlins, Cjasteons di Strade, Çarvignan, Muçane, Palaçûl, Prissinins, Roncjis, San Zorç di Noiâr e Tor di Zuin.
◆ Il disc si vierç cuntun bocon di une interviste de fin dai agns Setante cun Loris Fortuna, che al conte dai fats e dal spirt di chê mobilitazion coletive, e al presente une rie di contribûts sonôrs par opare di grups e di soliscj de sene musicâl furlane contemporanie. Si partìs cu la corâl feminine La Tela, che e presente, cu la “benedizion” di Giovanna Marini, “La Canzone del Cormôr”. Po dopo a rivin lis gnovis composizions, che a cjapin ispirazion dai fats de Vierte dal 1950, firmadis di Jacopo Casadio, Franco Giordani, Nicole Coceancig, Alessio Velliscig, Simone Piva, Renzo Stefanutti, Guido Carrara e Lussia di Uanis, Alvise Nodale, Prospettiva Rolaz, Devid Strussiat, Stefano Montello, Loris Vescovo e Lino Straulino. Al è pardabon un mosaic di sonoritâts e di atmosferis che, di un toc a di chel altri, a scjavacin rock, blues, pop, folk e cjançon di autôr. In chel istès si ricognòs ben la personalitât di ogni autôr e interprete e si vualme ancje un fîl comun, in gracie dal fat che dut il cd al è stât regjistrât e produsût di Leo Virgili.
◆ Al è pardabon un concept album, cemût che si capìs ancje inte part “no musicâl” de opare. Intal booklet che al compagne il cd, cu la sô vieste grafiche elegante curade di Caterina Vignaduzzo, si puedin preseâ i intervents introdutîfs di Lorenzo Fabbro e di Pauli Cantarut, i tescj di dutis lis cjançons, lis poesiis di Francesco Indrigo, Stiefin Morat, Maurizi Mattiuzza, Zuan Laurin Nardin e Cristina Micelli, la conte “di flum” di Lucia Pinat, lis ilustrazions di Guido Carrara “Quisco” e uns pocjis di fotos de epoche.
◆ Daûr dal lunari, il setantesim inovâl des Lotis dal Cormôr al è finît. Ma la memorie, tant che dirit, tant che dovê e tant che oportunitât par vivi il presint e fâ sù un avignî miôr, dal sigûr al reste, ancjemò di plui vive e plui fuarte. E lis cjançons dal 2020 a sunin ben ancje par chest an. Par savênt di plui: www.lottedelcormor.eu e www.nota.it. ❚
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +