Il sens dal “finî” al devente il plui rivoluzionari dai dissens di redenzion
CJANT – Dute la opare di Pasolini e je imbombide di muart. E dome une leture superficiâl e puarte – come simpri! – a indreçâ il sens dal so messaç, tant milenaristic che “escatologjic”, di une altre bande. Il sens dal “finî” al somee deventâ in efiets il plui rivoluzionari di ducj i dissens, la prospetive plui anarchiche che si puedi imagjinâ pe redenzion dal mont e dal om. Come un eretic de Ete di Mieç l’Autôr al pâr sunsurâ dentri te orele dai potents che ae fin e sarà dome chê siore vistude di nuie a vinci su la lôr arogance e prepotence: e sarà propit jê a inverâ chê promesse di avualance universâl che nancje la dutrine marxiste e à mai rivât a realizâ cu lis sôs rivoluzions. Propit come che e cjante la Laude dal 1200: “papis e imperadôrs, cardinâi e grancj siôrs fâs la muart compagnâ”. Une vôs di ribelion popolâr, di lidrîs profonde duncje, che si fâs alegoriche fin di “La Morteana”, chê sclese di teatri butade jù tal 1945 e mai finide, là che Muart, Agnul e Diaul si contindin propit il cuarp di un muart.
◆ Il cjant-preiere e invocazion di popul al spiete la fin, inte opare mestre “I Turcs tal Friûl”, dulà che si fâs rispueste poetiche potente e bielissime di une comunitât che si strenç insiemi devant de fin che e sta par vignî. Sperance cuintri evidence. Fede tant che utopie. Pier Pauli, di inteletuâl grant e fin, al rive duncje a piturâle in dutis lis sfumaduris, cheste fuarce universâl che nissun al podarà mai evitâle: la muart rituâl e ancestrâl dal mît, in “Medea”; chê mistiche e sacrâl dal Crist proletari intal “Vangelo secondo Matteo”; chê sporcje e bandonade de int des perifariis cjantade in maniere tragjiche in “Mamma Roma”, cun Ettore, il zovin protagonist, metût in crôs – sene potente e teribile – sul jet di contenzion, trasformât intun Cristat dal Mantegna, ma popolâr, sublimât de lûs frede di une telecjamare che e pararès mote di Caravaggio, il sôl coment pussibil, cence peraulis, al scjafoiament de Redenzion. In “La ricotta”, la muart e ven distilade tant che sensazion straneante di marum che e reste in bocje cuant che l’alt e il bas si cambiin di puest, fasint inçopedâ il mont par che al coli, cul cûl pal aiar, finalmentri ledrôs in dute la sô evidence miserabile. In “Porcile”, il pinsîr de muart si lu percepìs fin de prime sene, là che lis epigrafis a son la concretizazion des tombis dal pinsîr uman. E la trame, eversive, canibaliche, barbariche, e devente la condane visionarie di une societât, chê borghese, che e pues murî dome se si “sbrane”, par rivâ a berlâ: “Ho ucciso mio padre, ho mangiato carne umana, tremo di gioia”. Ae fin, la ultime peraule e reste inte bocje dai purcits!
◆ La muart e je ancje chê politiche, coprofagjiche, umiliante e pervertide de ditature: il mût di pensâ fassist che nol è dome dal fassisim, e par chest si fâs atualizazion pericolose di ogni degradazion ideologjiche. E o stoi fevelant, come che si pues capî, di “Salò”. La muart, in chest câs, e je chê de redenzion umane, midiant de violence cjalcjade sul cuarp crot dal inocent che al devente ancje lui colpevul, pierdint la sô dignitât di om libar. E, par finîle, intal romanç mai completât e publicât postum, “Petrolio”, la muart e devente chê industriâl, ossene, inacetabile, inconcepibile di un Paîs, la Italie, che al è za popolât di muarts, ancje se no son bogns di capîlu: int cence scrupui, cence etiche e morâl, ignorante e prepotente, maliziose e malfidade. Insome, “la borghesie plui stupide e analfabete di Europe”, come che Pasolini le definive, che ancje in dì di vuê e somee jessi protagoniste dai nestris timps malâts e muarts. Duncje e je propit la muart a jessi la grande interprete de poetiche pasoliniane, ancje se lui, Pasolini, om di contradizion e di incoerence profonde, al ripeteve dispès che – tant che marxist – lui la muart no le cjapave nancje in considerazion. E pûr la conclusion de sô vite e somee jessi la sene plui teatrâl di dute la sô produzion, la sintesi perfete de sô opare: il cuarp massacrât, savoltât e insanganât in chê albade grise dai 2 di Novembar, zornade dai Muarts, al incjarne in chê passion laiche e rivoluzionarie dute la vicende umane, morâl, leterarie e inteletuâl di Pier Pauli Pasolini. Anime in crôs. Muart come un lari. Ma al cjant des cjampanis: “Co la sera a si pièrt ta li fontanis / il me país al è colòur smarít. / Jo i soi lontàn, / recuardi li so ranis, / la luna, il trist tintinulà dai gris./ A bat Rosari, pai pras al si scunís:/ jo i soj muàrt al ciant da li ciampanis. / Forèst, al me dols svualà par il plan, /no ciapà pòura: jo i soj un spirt di amòur /che al so país al torna di lontàn”. ❚
………………………………………………………………..
Letare a PPP
DISCJANT. Mandi Pier Pauli. No ti domandi cemût che e va, parcè che la rispueste e sarès scontade. E tu, lis peraulis che no coventin, no tu lis âs mai dopradis. Ti scrîf parcè che o sintivi la bisugne di fâlu, ae fin di cheste rubriche ledrose e impertinente a ti dedicade, ma soredut di une anade pasoliniane là che ducj, ma propit ducj, ti àn ricuardât in mil manieris diferentis, par solit santificant la tô persone e duncje tradint, profondementri, propit chel spirt che tu nus âs lassât in ereditât, ven a stâi “la voglade critiche sul mont”. Chê triste, forsit, ma simpri oneste, cence parons o parochie, fûr di ogni sagristie, salot politic, cubie inteletuâl: e par chest braurose di jessi bastiancontrarie. Ti confessi che la “Orgjie” (par citâ une tô opare cetant intrigante!) di une anade pasoliniane come cheste che si invie a concludisi – finalmentri, no fidavi plui la ore! –, e tacave propit a ingomeâmi.
◆ Come che simpri al sucêt cuant che si domande di incensâ par dodis mês il stes personaç produsint l’efiet contrari: il dotoreç che al puarte al revoc. Al va a finîle che si fevele simpri dome che di lui – e bon, i contribûts a fasin simpri gole, no mo? – ma cirint di jessi origjinâi si cole tal ridicul. O vin viodût e sintût di dut. Al mancjave dome che cualchi associazion di miedis gastroenterolics al proponès un dibatit sul “Il piloro di Pasolini, questo sconosciuto”, e o varessin fat cincuine. Par chest, cui amîs de “Patrie”, che e reste une des pocjis lenghis cence glove – o vin pensât di dedicâti sì il “cjant”, ma ancje il “discjant”. E ti confessi che ogni volte che lu butavi jù, il “discjant”, mi someave di vioditi a riduçâ cun chê plee che ti vignive fûr su la muse magre e sgjavade che tu vevis e che e rint, ore presint, inconfondibil il to profîl dissident di inteletuâl disorganic.
◆ Mi someave une sodisfazion però, e no di fote. E o domandi scuse pe presunzion. In efiets tu sês simpri stât om di dialetiche. Tant che la tô vite, la tô opare, il to destin, come che o speri che al sedi vignût fûr mês par mês, al è un grop strent di fuarcis contrariis. O varès voie di domandâti perdon, però, in chest ultin scrit, no tant par vê cirût lis tôs creturis, che a son cetant plui interessantis di une parêt monde, ma par vê sustât plui di cualchidun che al à strissinade la sô vite inte contemplazion de tô figure. O amet e o confessi che mi soi divertît a pensâju rabiôs, intristîts, sconciertâts. Ma cui crodial mai di jessi cheste tortorele di un Floramo par tirâ jù i sants dal Paradîs? Ve chi, Pier Pauli. No covente che tal spieghi a ti. Disìn che o soi stât simpri convint che il Paradîs nol sedi un puest par int come te e come me. Nô o vin miôr il pantan de vite. Se ti ai strissinât jù, al è stât dome che par tornâti al mont, dal moment che mai come cumò il mont al varès bisugne di un come te! Pal rest, tenti di cont. ❚
