La mont furlane e cîr rispuestis

Preseât President, o ai let, cun cetante atenzion, la sô racuelte dai siei editoriâi intal gnûf volum publicât de “Patrie”, “Indenant”. Lets ducj intune volte, i articui a trasmetin la idee di un Friûl braurôs, ma ancje problematic e inciert, cun tante int che si impegne, ma che nol rive a decidisi su la strade che al à di cjapâ par no restâ metût in bande rispiet a cualsisedi prospetive di un futûr plui o mancul globalizât. Jo o volarès a chest rivuart pontâ la nestre atenzion sul stât reâl de mont furlane che o volìn, e soredut o scugnìn, meti sot de lint. E je une situazion par sigûr problematiche ma ancje solide inte sô struture.
◆ O provi a ricuardâ dome cualchi element in struc. La popolazion reâl e je une vore ridote e di fat no je buine di bessole di gjestî in maniere corete il teritori; l’indiç di vecjaie al è al massim; la prospetive demografiche e je chê di zonis inviadis ad implen viers dal spopolament e cuntune fuarce lavôr in jessi che no baste nancje pal dì di vuê, figurâsi par imagjinâ un svilup teritoriâl; no si rive a garantî servizis sanitaris o di formazion professionâl eficients.
◆ A chest si scuen zontâ altris valutazions, a partî de sensazion, cuasi inevitabil, di un futûr che nol viôt tantis pussibilitâts di jessi indreçât, ma al sarà subît e sopuartât plui che acetât: la vite de comunitât e je ridote e apatiche e, in struc, ducj a pensin che “ce che al sucedarà dopo di me nol è un gno probleme e a saran altris che a varan di risolvilu”. Chest al puarte ancje a vê te plui part des fameis un lessic aromai ridot, dispès sot des 300 peraulis fondamentâls.
◆ Purpûr te mont furlane i citadins a gjoldin di un benstâ economic mai viodût te sô storie cun tancj stipendis sigurâts e tantis pensions: i fenomens leâts ae puaretât a risultin margjinâi e dut câs di podê gjestî. Ma il fenomen che al preocupe di plui e je la cundizion di isolament che no permet di reagjî.
◆ Se si cjale il lavôr, che un timp al jere un valôr distintîf de int di mont, cumò al è deventât simpri mancul un teren di identificazion. Il sens dal sacrifici che al prodûs risultât e che ti da un puest inte comunitât si è pierdût, e cumò si fevele dome de fadie di puartâ indevant une ativitât. Se po si cjalin lis scuelis sieradis (e no simpri par fuarce), cheste mancjance e à puartât ancje ae fin di une classe di mestris che dispès e deve cussience ae int dai siei valôrs e che e strissinave il cambiament intai paîs.
◆ La Glesie no cîr plui la int ma e vûl jessi cirude: in cheste maniere e rinunzie al so rûl di indreçament morâl. La politiche locâl po si è simpri plui sierade in cerclis che a crein plui barieris che facilitazions ae partecipazion de int. Il disinterès e il fren aes relazions di comunitât a son il risultât.
◆ Ae fin, o stin purtrop pierdint chel concet dut furlan di lavorâ simpri e di continuâ a fâlu come se la vite no ves mai fin; chel volê plantâ un arbul savint ben che magari no si rivarà a cjapâ sù ce che al fasarà cressi. Ma in pocjis desenis di agns si rivial adore a scancelâ i valôrs costruîts vie pai secui? ❚