La mont e torne a discuti sul so doman

E sarà forsit la cuinte, seste volte che tai ultins dîs, cuindis agns o vin sintudis lis peraulis “rilanç”, “svolte”, “gnûf cors”, dutis riferidis ae mont dal Friûl. Plui o mancul a ogni gnove zonte regjonâl o a ogni tornade aministrative. Ma dopo, il copion al è simpri chel: biei pensîrs, grancj dissens, cunvignis su cunvignis, peraulonis, progjets su progjets, cualchi ent o consorzi di screâ par svecjâ ce che al jere prin, e po dopo alc di bon dut câs al salte fûr; ma al zîr di gjostre des elezions daspò, si torne a meti dut in discussion. Un cjapiel chest che nol vûl jessi chel dal solit bastian contrari, ma invezit chel di un alarme necessari par meti in vuardie i otimiscj incurabii, cumò che de Cjargne a son partîts i tredis “tweets”.
IL SBURT DI BROLLO
Che il gnûf sindic di Tumieç al vedi man cu la comunicazion no son dubis: lu stan imparant ancje chei che no lu cognossevin prime des elezions de Primevere stade. E che Brollo al rivi a fevelâ in maniere di scjaldâ cui che aromai al jere za rassegnât, al è un altri dât di fat. Ducj però cumò i fasin la paisse: dal sigûr, plui int al rivarà a coinvolzi, plui pussibilitâts di sucès al podarà vê, tignint di voli soredut la Regjon che intant – cu la Serracchiani – e à tacât a costruî il percors viers i Stâts Gjenerâi de Mont. Brollo al à fat tredis propuestis, tacant dal butâ il non di Tumieç tant che candidât a citât alpine dal an pal 2015; po dopo il Zoncolan, come cjase dai sports di mont, no dome di schi e biciclete ma ancje di deltaplan, parecleve e downhill. Passant ae economie, si è tornade a tirâ fûr la propueste che aromai ducj a van predicjant di un pâr di agns in ca, vâl a dî chê de burocrazie zero e dai disgravis fiscâi. Impensìnsi che la presidente Serracchiani, tal film di Spinotti e à dit a clâr che l’acuardi cul guvier al è in pratiche fat. Viodarìn. Lant indenant, Brollo al à pensât ancje a une gnove fieste par esaltâ la cusine, l’artesanât e la agriculture de Cjargne; a une scuele di musiche e a une dal len, plui une scuele di alte profession inmaneade de Universitât; al mini idroeletric tes roiis; al completament de bande largje cul svilup di un “puart digjitâl” a Damâr…
LIS REAZIONS DAI COLEGHIS
Il prin a rispuindi al è stât Renato Carlantoni, sindic di Tarvis, che al à volût prime di dut ricuardâ la unicitât de Mont dal Friûl, che e va dal Plan dal Cjaval al Peralbe, di Fusinis aes vals dal Nadison. Ancje lui al à fevelât di defiscalizazion al 50% par impresis e fameis, de necessitât di lavorâ par aumentâ e par miorâ albiercs e struturis turistichis, di pensâ a une riorganizazion dai comuns che no tegni cont dome dal numar di abitats ma ancje de estension teritoriâl, e de necessitât di pensâ prime che al grant a nivel di formazion universitarie ae difese des scuelis superiôrs che a riscjin di sparî.
Ancjemò plui concret il sindic di Forgjarie, Pierluigi Molinaro: secont lui si dovarès ricognossi contribûts particolârs ai zovins che a cirin cjase, come pûr a chei che a decidin di vierzi une gnove ativitât; si varès di previodi sconts pal autobus e pes mensis dai fruts che a van a scuele tai paisuts; si dovarès pontâ sul ricognossiment economic di cui che te protezion civîl si propon par tignî simpri sot voli lis magagnis dal teritori. E, po dopo, la provocazion finâl: zone francje par dute la mont, par metile ae prove se finalmentri e rive a cambiâ mentalitât une volte par dutis.
IMPRESARIS E SINDICÂTS
Al samee strani ma su tancj aspiets i rapresentants des categoriis e i sindacaliscj de Cisl dal Friûl de Alte e di Cgil le pensin te stesse maniere. Par esempli, su la ricualificazion des cjasis e dai paîs che al podarès jessi il mieç par rilançâ la edilizie; cussì come su pe filiere dal bosc e de energjie, dulà che la delegazion dai Industriâi de Mont di Confindustria e à za pront un progjet di massime. Ancje su pe formazion professionâl si resone te stesse direzion, domandant une ufierte di scuelis che e sedi prontade su lis esigjencis des impresis, intant che pal turisim al è di tornâ a cjapâ in man il sisteme di promozion e di comercializazion.❚
David Zanirato