Sfuei Mensîl Furlan Indipendent
Archivi de Patrie

Apel de CISL: plui atenzion ai problemis sociâi

............

Inte Segretarie de CISL di Udin o ai la deleghe a chel che al ven definît il “sociâl”, e duncje o ai il compit di monitorâ lis dibisugnis sociâls, e di cirî di dâur cualchi rispueste.
O ai verificade sul cjamp une cressite esponenziâl de “domande” di protezion sociâl e la dificoltât consecuente di rivâ a organizâ une “ufierte” che e podès rispuindi aes mil e une esigjencis, vecjis o gnovis che a sedin. Insiemi cui agjents sociâi de FNP, sindicât dai pensionâts, pardabon ben organizât tal teritori, mi cjati cun istituzions locâls come Provincie, Ambits e Comuns propit par ufrîur il nestri bagai di cognossincis e di propuestis, dutis finalizadis a fâ front a cheste situazion simpri plui complicade, ancje tal nestri Friûl. Di fat, si confrontìn cu lis istituzions dal teritori propit inte fase di predisposizion dai belançs par orientâ lis scjarsis risorsis publichis viers obietîfs socialmentri rilevants, tant che la sanitât, il socioassistenziâl, la fiscalitât locâl, i presits, lis tarifis e v.i. I temis frontâts de CISL di Udin e de FNP a son une vore, e a van des fameis in crisi pe mancjance di lavôr e duncje di redit a chês in dificoltât par vie che no rivin a garantî, se no cun sacrificis grandonons, une juste cure e assistence ai lôr familiârs no autosuficients, de solitudin dai vielis aes mensis scolastichis dai scuelârs, e v.i. Chest lavôr continui e indurant di  “concertazion sociâl” al smire a fâ in maniere che lis istituzions locâls, chês che a  “incuintrin” i citadins, a sedin inmò plui atentis a chei che plui a àn di bisugne, e che a doprin lis lôr risorsis massime par dâ rispuestis a chestis categoriis di personis. Dut chest par fâ in mût che lis nestris comunitâts a sedin pardabon comunitâts, e che si cjapin sù il caric di chei che a son in pericul di restâ indaûr e di pierdis dal dut. Par dî la veretât, o ai cjatade atenzion e scolte di bande di cualchi aministrazion su lis tematichis sociofamiliârs, de cjase, e v.i., e di fat o vin rivât a firmâ diviers Protocoi di Intese che a svilupin il welfare locâl e/o di comunitât, come a Udin, Martignà, Puçui, Pavie, Sant Zorç, Çarvignan, Tavagnà.
O pensi che e sedi dibisugne di plui atenzion ai problemis sociâi, stant che cheste crisi economiche e lavorative cence fin – ben lontane dal cjatâ inmò une soluzion – ju stice simpri di plui.
Ancje tal nestri Friûl la gravitât des cuistions e impon di fâ scuadre par frontâlis miôr e par  risolvilis. Nissun (ni lis istituzions, ni la economie, ni la societât), di bessôl, al pues rivâ. Al covente il concors responsabil e solidari di ducj.
Par chest, la CISL e fasarà di dut par jessi scoltade ancje in chês realtâts che, pal moment, no àn stimât di vê di confrontâsi cul sindicât. ❚
Renata Della Ricca, Segretarie UST CISL di Udin

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +