La aziende agricule “Le tre rose” di Innocenzo Tavano e di Sonia Cavallo e je stade vierte tai agns 90. La sede principâl e je a Orgnan di Basilian e chê distacade e je, nuie che mancul, a Zuviel di Ravasclêt.
◆ “I miei gjenitôrs – e conte Pamela Tavano che insiemi cun sô sûr Rosy a dan une man – a àn començât cu la produzion di rosis e dopo, cul lâ dal timp, planc planchin a àn slargjade la produzion cun altris gjenars di flôrs, simpri di chei “taiâts”, o ben che si conservin te aghe. Cualchi an fa o vin slargjade la aziende vierzint la sede di Zuviel. Rivâ achì e je stade une casualitât: o cognossevin i proprietaris di chê che e jere la baite (a jerin amîs di famee), e dopo un pôc nus àn proponût di comprâ, e nô o vin acetât. E je stade une idee dai miei gjenitôrs che a àn il spirt imprenditoriâl. Di solit a son lôr che a stan daûr di plui ae sede di Zuviel. Jo e mê sûr o sin un grum impegnadis inte Basse.
A Zuviel o vin capît che al jere il clime ideâl pe coltivazion dai zîs, che a son deventâts il nestri prodot plui impuartant e si puedin cjatâ ancje di Istât.
Il zi al ame lis temperaduris frescjis e i salts termics (inte Basse di fat ju rivìn a coltivâ fin in Mai, invezit a Zuviel ju podìn vê dute la stagjon). Simpri a Zuviel, di pôc o vin tacât cu la coltivazion des cerniculis: un prodot che in Cjargne si cjate tal so abitat e la produzion e je buine.”
◆ La famee Tavano e cîr di mantignî la vere identitât de aziende agricule: vendi i prodots de lôr produzion, o ben lis rosis “taiadis”, dome ai privâts. “No sin une buteghe di florist – e spieghe Pamela – e i nestris prodots a van ben par ogni ocasion: matrimonis, batisims, compleans, ricorencis particolârs e v.i.”
◆ “Il limit plui grant in Cjargne – e va indenant Pamela – al è chel dal numar bas dai abitants. Ma la sede di Zuviel par nô e je impuartante soredut pe coltivazion di zîs. La Cjargne e je un puest bielonon! Cualchi volte al è stât un ambient un pôc dûr, intal sens che i cjargnei a àn di fidâsi, e cuant che si tachin a fidâ a deventin il client perfet. E o vin notât che nus è volût un pôc prime di vê la lôr fiducie.
Cumò o vin a Zuviel un responsabil cjargnel che intun ciert mût al à scurtât lis distanziis… Une robe che mi à colpît tant al è che i cjargnei a son cetant atîfs sui social e atents aes novitâts de aziende agricule.
Disìn che il marcjât cjargnel al è diferent di chel di Udin; clâr che al è un bacin plui piçul ma no mancjin mai di dânus sodisfazions! Il nestri lavôr al dipent des anadis: a son anadis che nus puartin tancj prodots e altris che o ‘nt vin di mancul.
Al è un mistîr un grum apassionant e biel, ma tal stes timp particolâr: o ti plâs, o se no al devente un pês. Nô o sin contents.”
◆ Par cualsisedi altre informazion e curiositât su la Aziende Agricule a conduzion familiâr “Le tre rose” si pues lâ su la pagjine facebook: https://www.facebook.com/LeTreRoseSocietaAgricola.
◆ Dal sigûr, la robe miôr e je chê di passâ di persone a Zuviel, un piçul paisut dal Comun di Ravasclêt, indulà che il zi al è il protagonist di chest lûc e di cheste aziende agricule. ❚
La maravee dai zîs di Zuviel inte Aziende Agricule “Le tre rose”
Marta Vezzi