La mape dai “transfrontalîrs”

Austrie, Slovenie, Cravuazie. La gjeografie dai traliçs “transfrontalîrs” e conte 19 progjets depositâts in Regjon. Ju à metûts su mape il Cordicom, il Coordinament dai Comitâts dal Friûl-VJ pal ambient e la cualitât de vite. A chescj progjets a van zontadis dôs liniis internis: la Redipuie – Udin Sud e ancje la Cordignano (Trevîs) – Siest. E po la “merchant line”, la nomenade Wurmlach – Somplât, linie comerciâl par puartâ energjie a industriis privadis, promovude de societât Alpe Adria Energia e che e à tirât dongje intune uniche infrastruture trê singui progjets (Ferriere Nord, Fantoni e Burgo) che in principi a forin presentâts separâts. Par chest ultin, si è in spiete de Valutazion di impat ambientâl di Rome, daspò il bon acet de Regjon, rivât ai prins dîs dal 2013 – pandint conturbie in dute la Cjargne.
Che al sedi clâr: a son dutis liniis privadis, ma la merchant line e je a servizi complet di cui che le à tirade sù, cu la pussibilitât di vendi sul marcjât ce che ur vanze e cul’oblic di passâ liniis e traliçs al Stât daspò 10 agns. I 19 progjets a son in mans a gjestôrs di rêts eletrichis che a vendin energjie sul marcjât, seont la borse eletriche. E di fat ducj a son partecipâts in misure societarie variabile dal Grtn, il Gjestôr di rêt di trasmission nazionâl, o de Enel.
Dai 19, la maiorance si distribuissin a est de Regjon. Seonts i dâts in man al Cordicom, fint a doi agns za fa la Slovenie e regjistrave un surplus di produzion, ma jessint in fuarte cressite economiche e je prevedibile une limitazion dal export e di conseguence une cressite dal import. Plui complicade la situazion sul front nord. “Par scomençâ, la Basse Austrie e je a pâr tra consum e produzion, e duncje al è dificil che si meti a vendi corint ai talians. Po dopo al è un fuart partît ambientalist che nol vûl altris infrastruturis, nancje par colegâ il Sud dal paîs ae part plui alte, siore te produzion” al spieghe Luciano Zorzenone dal Cordicom. “Si che duncje – si domande – l’interès dai nestris industriâi a volê chê linie comerciâl nol è che al sedi par vie che un doman a volaran lôr puartâ corint in Austrie e no il contrari? E je dome une mê teorie: ma se e je vere, i puescj di lavôr e i coscj no centraressin plui”.
✒ Oscar Puntel