Lis fantasimis, lis scomençà a scjassâ, bielzà tal 1981, Andrea Pittini: “Se i siôrs politics no lu àn ancjemò capît, lu disìn a clâr. O stin finint la benzine”. Plui o mancul ce che al va ripetint dal 2002 in ca. Po, si à zontât Fantoni: “Rispiet ai altris paîs de Europe, la bolete nus coste il 40% di plui, in Italie”. Par ultin, si zontà Mr. Danieli. L’ad, Gianpietro Benedetti, sul eletrodot pe Abs di Cjargnà: “O si varà energjie e si podarà zontâ plui machinis, o no ‘ndi sarà. E inalore o larìn a fâ investiments di une altre bande”. Tertium non datur est. Cheste energjie e coste pes sachetis dai industriâi furlans, i sorestants de economie di cjase nestre. Il probleme al è: se dut chest al è vêr, trop ur costie di plui? E indulà isal che il presit al va sù, se in dut il mont i pâi de lûs a son simpri chei e il valôr de corint al ven stabilît di une borse di tratazion mondiâl?
✽✽ Contrats e presits
“Prin di dut lôr a varessin di jessi plui clârs – continue Zorzenone – Lôr a disin: “E coste masse”. Dacuardi… ma di ce coscj stino fevelant? Coscj sul marciât de energjie? Coscj di produzion? O ce che al paie un privât? Però no disin mai che lôr a àn contrats speciâi. Nô invezit o paìn il 30% di plui dal rest de Europe. Dentri de bolete a finissin: tassis, contribûts pal fotovoltaic e pes biomassis, i coscj di rêt, falopis comprindudis”. L’esponent dal Cordicom al partìs di une storiute, capitade 3 agns za fa: “Bot e sclop e mancjà corint a Pittini, Fantoni, Burgo e Abs. Blackout energjetic, nuie produzion par cualchi ore. E començà a zirâ la vôs che a fracarin il boton par vie che e mancjave corint eletriche tal rest dal Friûl. Ce jerial sucedût? E esist une tipologjie di contrat cun Enel pas grandis industriis, il “contrat cun distac”, un scont ae bolete in funzion di trop che tu consumis. Enel e da energjie, ma a un ciert pont a bloche il rifurniment, su la poie di siei parametris. Une opzion si clame “distac daurman”. Il gjestôr al clame e al vise: “O distachìn la distribuzion ca di une ore”. In chel câs tu âs scont fint al 30%. In chê volte al sucedè propit cussì”. Ce che no si dîs, magari cussì no, al è che chest scont lu pain i consumadôrs ultins, nô, dentri de bolete, viodi ae vôs “dispacciamento”. Culì e ven spalmade.
In struc, e je vere che la bolete e coste cetant ai industriâi di aziendis “energjivoris” ma no seont i numars che nus contin lôr. E dut câs e coste ancje ai piçui consumadôrs. I dâts Eurostat dal Otubar 2012, intun rapuart de Autoritât pe Energjie. Si lei: “Al net des impuestis, i presits pes industriis a son superiôrs aes mediis europeanis par dutis lis classis di consum (da 20 MWh a 150mil MWh), cun diferenziâi che a son comprindûts jenfri il 15% e il 27% (al sporc, lis diferencis a son tra il 21% e il 33%)”. Restant ca di nô, tignît simpri iniments 100 euros di partence (tant che coscj di produzion e distribuzion), la stesse famee par 3000 kWh consumâts si viôt zontâ tassis, caric gjenerâls dal sisteme, Iva e coscj comerciâi, fint a salâ la bolete a 206,69 euros. Il dopli.
Chestis diferencis a rimandin a une anomalie dute taliane. “La bolete salade no si pues dineâ ancje pai imprenditôrs” al zonte Aldevis Tibaldi, dal Comitât pe vite dal Friûl rurâl. “Vin presits a regjim di monopoli, tassis che a incidin pal 30% il profit dai monopoliscj al è masse alt e injustificât”. In barbe ae liberalizazion dal setôr. Franceschino Barazzutti, dal Comitât tutele des aghis dal bacin montan dal Tiliment: “Cemût che si forme il presit de Enegjie in Italie al è un misteri. Ma un misteri volût! Vulial la mê teorie? Clâr che cualchidun a fâs la creste! I nestris industriâi a varessin di vierzi une vertence, ni cul teritori, ni cui politics, ma cun cui che al definìs lis tarifis. Daûr no pues jessi che une lobby dai produtôrs”.
✽✽ La dibisugne energjetiche
A chest pont la domande e je: dutis chestis infrastruturis decidudis di imperi sono justificadis? Il nestri teritori isal in deficit o in surplus di produzion? Zorzenone dal Cordicom si presente sot braç cuntun libron che al tire dongje dute la documentazion pe scriture dal Plan energjetic regjonâl, che ancjemò nol esist. 571 pagjinis di tabelis e leçs, scuasit 2 kg di cjarte. Il “pac” al è dal 2006 (none legjislature) e al ten dentri i ultins dâts uficiâi. “O ai metût dongje trê numars, un struc dal struc” al sclarìs. “Il modon di sfueis e tabelis al fotografave la situazion di chê volte. Tal 2003, i implants in Regjon a cuvierzevin l’84% de dibisugne e a vevin un deficit dal 16%; ma la ufierte energjetiche e sarès aumentade tal zîr di pôcs agns, cu la gnove centrâl di Tor di Zuin. E adiriture tal 2010, la produzion di corint e varès tocjât 78%. In zonte al 84% che o disevi prime. Specifichìn che Tor di Zuin no lavore a plen, vuê, par vie dal incuinament de Lagune, ma viodût che lôr a fasin i discors e lis stimis sul avignî, cuant che cheste e sarà a regjim o varìn un surplus incredibil. E alore a ce coventino ducj chescj eletrodots?” al dîs Zorzenone. A viodi ben e je ancjemò une cuistion di palanche: “Lait a viodi cui che al à in man lis centrâls idroeletrics o a gas in Italie” al vise Barazzutti. “O scuvierzarês che lis fasin funzionâ no in funzion de sêt energjetiche dal teritori, ma par massimizâ lis lôr jentradis dai lôr belançs”.
✽✽ Un compromès pussibil?
In dute cheste suaze cuâl isal il compromès pussibil? “La maniere di procedi dal avignî – al vise Aldevis Tibaldi –, lu vin za sclarît, a son i “smart grid”, lis gridelis inteligjents, rispiet ai “super grid”, i eletrodots apont. I prins a son une rêt in stât di gjestî e regolâ la corint in maniere discontinue e bidirezionâl. Piçui implants di rinovabilis che si judin e si incjastrin. No come chei alts traliçs che a puedin juste puartâ la corint sù e jù. Ma a cristalizin il sisteme, vincolant su di lôr la costruzion di altris centrâls”.
✒ Oscar Puntel
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +