Sfuei Mensîl Furlan Indipendent
Archivi de Patrie

La Lodre e je tornade in Friûl

Gianluca Rassati

Une specie che e mancjave di desenis di agns

La lodre (Lutra lutra) e je un mamifar predadôr che al è insom de cjadene alimentâr e che al mangje speciis che a vivin inte aghe o che a son leadis cun chê par une part dal cicli vitâl. Pal so mût di vivi particolâr (predadôr leât a fuart cun ecosistemis acuatics e di rive), pes sôs dimensions (un mascli al pues rivâ a 15 chilos), pal so aspiet (che al ispire “simpatie”) e pe grande difusion, la lodre e je un dai animâi plui cognossûts. Chest le à rindude protagoniste di contis, libris, films e altri, fasintle deventâ, sot cierts aspiets, un simbul dai flums salvadis.
◆ Dut chest no le à salvade dal om che al à simpri cirût di plasmâ l’ambient pal so tornecont, ma ancje di eliminâ lis speciis viodudis tant che competidoris.
Il Friûl nol scjampe di cheste regule. Intal timp la antropizazion si è manifestade simpri di plui, tant che cumò si è rivâts a un pont dulà che, in pratiche in ogni cjanton dal teritori, e je evidente.
Un dai animâi che al à paiât par chest e je la lodre che, une volte, in Europe e veve une distribuzion une vore grande.
◆ Secui di persecuzions, in primis pe pelice ma ancje par altris motîfs, come chel di vê cjar di mangjâ (ancje in dîs di magri, daûr di une vecje usance) e pal fat che e mangje pes (aliment ancje dal om), insiemi cu la alterazion e cu la distruzion dai ambients dulà che e viveve (che a àn compuartât ancje une diminuzion des risorsis alimentârs) e al incuinament, le àn fate sparî di buine part dal so areâl e di dute la Italie setentrionâl.
In Friûl la estinzion de popolazion vitâl e je stade intai agns 60 dal secul passât, cun cualchi individui che al è rivât fin intai agns 70.
◆ Di resint e je stade verificade une espansion de popolazion austriache che e à compuartât un principi di ricolonizazion dal Tirôl dal Sud dilunc de Drave, e dal Friûl, dulà che lis primis evidencis dal fenomen a son stadis cjatadis une dozene di agns indaûr.
L’autôr al à cussì metût adun un studi par verificâ, intal bacin montan dal Tiliment, la presince e lis dinamichis espansivis de lodre. A chest e je stade zontade une ricercje che e smirave a definî, par tant che al è pussibil, se une volte la specie e fos stade presinte e sparniçade inte mont furlane, zone dulà che scrits publicâts di int distante dal ambient de mont a sostignivin che e fos assente o pôc slargjade.
◆ Chest studi, che al à tignût in considerazion i cors di aghe dal bacin dal Tiliment a mont de strente di Pinçan, la Plâf inte zone di Sapade e i tributaris de Drave inte aree di Tarvis (Slize e afluents), al è stât puartât indevant midiant de ricercje dai segns di presince de lodre, e in particolâr dai escrements da specie che a son carateristics e che si ricognossin par cierts elements. Chescj, in cualchi part de Cjargne a son clamâts “sprots” par vie che la lôr forme, soredut cuant che a son frescs, e la presince di secrezions anâls e gastrointestinâls, ju fâs someâ tant che butâts fûr di bot e sclop, come une scjarie dal intestin: “sprot”, juste apont.
◆ Par definî la situazion di une volte, l’autôr al à doprât testemoneancis cjapadis sù dai agns 70 dal secul stât di personis che a cognossevin la lodre e il so mût di vivi e che a àn frecuentât i ambients dulà che e viveve.
Il studi al à verificât ce che al è ripuartât chi sot.
• La zone dulà che la lodre e je plui difondude e je la Valcjanâl, dulà che si è stabilît il prin nucli e di dulà che al è facil che e sedi partide la espansion in Friûl. In particolâr, la specie e vîf intai Lâts di Fusinis e di Rabil, inte Slize e tai tributaris, inte Fele.
• Ancje la Fele e i afluents a son stâts ocupâts cuntune colonizazion che e je in at intai ultins agns disot Pontêbe.
• Il bacin dal Tiliment (escludût chel de Fele che al fâs part di chel dal Tiliment) al è chel dulà che a son stâts cjatâts mancul segns di presince; dut câs, ancje la zone fra la Ledre e il Lât di Cjavaç e je risultade ben ocupade.
• La espansion e je stade ancje bande Sud e Ovest: di fat, la specie e je stade cjatade intal Arzin, dilunc dut il cors.
• La lodre si sta movint ancje viers l’Alt Tiliment (afluents comprendûts) ma, al somearès, in mût mancul svelt che viers la planure, ancje se al è masse adore par indicâ un pussibil cuadri distributîf.
• I sîts frecuentâts a son dentri dai 1000 metris s.l.m. e a presentin une grande variabilitât: di piçui riui di mont al Tiliment, passant par lâts, palûts e canâi. Un element comun al è, invezit, la vegjetazion di rive, fisse e ben struturade.
• Une volte la lodre e viveve in dute la mont furlane, cemût che al jere plausibil pensant che, di ciert, no si podeve fermâ intes planis parcè che, rivade a Ospedalet di Glemone, e viodeve che disore a son monts.
• I ultins dâts di presince, a seconde dai sîts, a son dai agns 30 ai agns 60 di chel altri secul, cuant che, a nivel furlan, si è estinte la popolazion vitâl. Intal 1972 e je stade fate la ultime osservazion inte aree indagade, intun riul tributari dal Tiliment in Comun di Soclêf.
• Tal passât a jerin frecuentâts sîts che, cumò, no esistin plui parcè che a son stâts eliminâts de azion dal om.
◆ Il studi al à, cence nissun dubi, indicât che la lodre e je tornade in diviersis bandis dal Friûl e che in chest periodi e je in espansion: in cierts cors di aghe, lis ultimis osservazions a jerin di passe 80 agns indaûr.
Chest, pûr jessint positîf, nol à di fâ pensâ che il tornâ di un animâl come la lodre al seti sempliç e che la espansion e continuarà cemût che al è stât fin cumò.
◆ Prin di dut si à di tignî in considerazion che i ambients dulà che e vîf la specie a son sot di une menace continue, par esempli par vie di intervents varis su lis rivis e intal jet dai cors di aghe, pal sfrutament par produsi eletricitât, pe antropizazion des rivis. A proposit di chest, la costruzion intal secul XX des dighis di Caprizi sul Tiliment e di La Maine sul Lumiei, e di dut l’insiemi di oparis e infrastruturis colegadis, e à vût un impat fuart sui ambients di vite di tantis speciis (che si viodi La Patrie, Dicembar dal 2021), includude la lodre. La modalitât di svicinament al ambient naturâl, di là di tantis peraulis a vueit (che si viodi La Patrie, Mai e Jugn dal 2022), in dì di vuê no je cambiade tant, considerant, par esempli, gjenar e modalitât di verifichis che a vegnin fatis par presumûts fins conservatîfs (che diviersis voltis a son ridiculis) in câs di realizazion di oparis: duncje, il pericul al è reâl.
◆ Un altri fatôr no trascurabil al è rapresentât de difusion des stradis: diviers esemplârs ancje in Friûl a son stâts cjapâts sot.
Cumò bisugne tignî di voli, midiant di oportunis indagjins sientifichis, cemût che la situazion e larà indevant, ma soredut si scuen conservâ e in cierts câs ripristinâ i ambients di vite de lodre, che a son la cjase di tantis altris speciis. Chest al passe ancje pe tutele di ambients calcolâts secondaris e di pôc interès (piçulis pocis, riuluts, piçulis paluderis e v.i.) che a puedin contribuî in mût sostanziâl ae vite des speciis leadis a la aghe.
◆ Al bisugne però che si capissi che la conservazion dal ambient di animâi e plantis e à une ricjadude sul om che e pues jessi dome che positive. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +