LA INTERVISTE. Par Menis e Bergamin, doi sindics di centriçampe, lis provinciis si puedin gjavâ

Il Friûl aial dibisugne di une sô rapresentance istituzionâl par puartâ indevant lis istancis dal teritori e no paiâ il dazi di une vôs flape? Soredut disunide devant de Regjon ma ancje di cualsisei istituzion?
E je une des domandis che a tornin a saltâ fûr cun fuarce viodude la riforme istituzionâl che – par sburt statâl ma ancje par necessitât locâl ricognossude – e varès di caraterizâ cheste legjislature. Une riforme des autonomiis locâls che e varès di puartâ in ogni câs al superament des Provinciis intune suaze istituzionâl bipolâr, ven a stâi Regjon e Comuns.
La domande no je di cumò e par altri no je solecitade dome de pussibilitât che si eliminin lis Provinciis, stant che bielzà tai agns passâts, par restâ te storie resinte, si jere metude in pîts la Assemblee des Provinciis furlanis, propit cul spirt di vê une “masse critiche” significative par supuartâ la identitât di un teritori, une identitât linguistiche, culturâl ma no dome. Une identitât intindude te sô completece e complessitât.
A ogni mût, la domande di fonde (il Friûl aial dibisugne di une sô rapresentance istituzionâl? Il fat che lis Provinciis a sparissin puedial creâ problemis di rapuarts di fuarce tra i teritoris?) e je cumò tornade di atualitât.
Une cuistion che, però, no met in pinsîr i sindics. “Par che il Friûl al vedi fuarce, la cuistion e je plui di strategjie che di istituzions che lu rapresentin”, al sintetize il prin citadin di Sant Denêl, Paolo Menis. “Il Friûl al à bielzà une sô rapresentance istituzionâl che e je la Regjon. Se o pensais, in Consei i conseîrs regjonâi dal Friûl a son une vore di plui di chei di Triest”, al continue, cence vê pôre di frontâ a clâr il teme di un confront, simpri presint tra lis riis, tra Friûl e Triest. “Nol è un probleme di numars, che chei ju varessin bielzà par vê une vôs dal sigûr significative, ni di istituzions, che a son bielzà. Se mai – al rimarche Menis – e je cuistion di convinciment personâl e coletîf”. Triest, al zonte, “si difint cui siei che a son simpri unîts e duncje, ancje se pôcs, a rivin a vê capacitât di incidi. Il Friûl, invezit, al è simpri dividût”.
Se po si ponte la atenzion specifiche su la Provincie, “no je che cheste istituzion e ecuivali a tutele de lenghe, de culture e de identitât di un popul. La identitât e je une dimension che e va coltivade, nudride, svilupade intune forme che no crôt une istituzion i puedi stai daûr”, al va indevant Menis, come che invezit a puedin fâ tantis realtâts di caratar culturâl, come la Filologjiche e altri. “Ce che al è impuartant, al è invezit che la Regjon e vedi cussience de ricjece identitarie dal so teritori e che le judi a mantignîsi”, al siere il sindic di Sant Denêl.
Se la riforme istituzionâl e les te direzion di dôs polarizazions, Triest citât metropolitane di une bande e Friûl di chê altre, “o fasaressin un model che al vûl dî la fin dal Friûl Vignesie Julie tant che regjon a statût speciâl”, al dîs il sindic di Migjee Alberto Bergamin. E dut chest biel che “i proviodiments finanziaris di Rome nus stan bielzà te pratiche gjavant la autonomie. Nô – al continue – no vin dibisugne di fâ riformis par sierâ i teritoris, ma ben par favorî il svilup economic di ogni teritori e recuperâ cussì cundizions di prospetive di doman”.
Sul superament des Provinciis, Bergamin nol à dubis: “Une robe di fâ e di corse”. Chest nol vûl dî che nol viodi cualchi pericul inte operazion, ven a stâi che “un teritori al prevanzi suntun altri”. In ogni mût, al zonte, a chest pericul al è un rimiedi clâr, ven a stâi che “si garantissin a ogni teritori rispuestis di guvier compagn”, che bielzà cumò nol è cussì. Bergamin al à plui di cualchi esempli cun se: “O fasìn la Ater uniche ma il procès si scuintre cul fat che i afits no son compagns tra lis cinc Ater; un al jes dal ospedâl e intune Aziende sanitarie al cjate la ambulance a gratis che lu puarte a cjase, ta chê altre al è un servizi a paiament….”.
La scomesse e je che “no vin dibisugne di division, ma di unitât. Si capìs che cheste e je une regjon siore di diversitâts, ma a àn di jessi une ricjece che nus fâs cressi insiemi”. Cheste ricjece “no vin di zuiâle in difese”, al siere il sindic di Migjee.
✒ Antonella Lanfrit