LA INTERVISTE. Il vivi intun paîs di mont

Un pugn di cjasis sparniçadis ca e là intai blecs di tiere subit sot des monts, ator ator dome crets che cu la lôr maestositât a somein i vêrs vuardians dai paisuts de Cjargne. Un soreli che al rive juste a scjaldâ la anime de int che e vîf achì intal ream dal cidin, de pâs, de trancuilitât, dutune cu la nature. La Crete Serniate e ponte viers il cîl i siei crets infogâts di soreli, la Tersadie di schene e mostre il so cjapiel blanc, la valade e slargje i siei braçs: une cartuline che e pas il voli e che ti gjave il flât… ma il vivi intun paîs di mont nol è dome chest.
Al vûl dî ancje fâ i conts ogni dì cun tancj problemis: dispès i paisuts no son servîts di mieçs publics e al tocje vê un mieç propi par podê movisi. No son plui buteghis di alimentârs, e cussì ancje par cjoli il pan si scuen “lâ a val”; tocje sbassâsi ancje pal miedi e pes midisinis, pe pueste e pe scuele. No ‘nd è plui ostariis e cjatâsi al divente plui dificil; la viabilitât no je des miôr, lis stradis a son spes malsestadis, strentis, plenis di curvis e un grum pericolosis. Lis aministrazions comunâls no àn simpri la atenzion juste par chestis piçulis frazions: a mantegnin un rapuart dispès distacât, tindint a meti in vore une politiche di centralizazion dai servizis. Ancje la tant nomenade gnove tecnologjie “internet” e stente a rivâ in chestis piçulis realtâts indulà che e sarès un grum util par judâ comunicazions e contats cul rest dal mont. E la liste e podarès slungjâsi…
“A Rualp e Val – e conte Irene insieme a altre int – o sin sù par jù un centenâr di personis. Al è il Comitât frazionâl che al cîr di mantignî vîf il paîs cun diviersis iniziativis vie pal an (Carnevâl, la Femenute, la Fieste dai cjarsons, fiestis religjosis…). Un pont di riferiment al è il centri sociâl pensât e volût di pre Toni Beline; un mês fa propit achì al è stât screât il “Cral” indulà che i zovins  si cjatin insieme ogni fin di setemane. La aministrazion Comunâl no rive simpri a jessi presint: tu âs pês dome se tu âs un conseîr de frazion. Almancul pai fruts che a van tal asîl e te scuele elementâr o medie – e va indenant Irene – si pues fâ cont sul traspuart comunâl, ma cuant che a van aes superiôrs a scuegnin jevâ adore e lâ, la plui part des voltis, a pît fin a Rosa dei Venti, a 3 Km di achì, indulà che al rive il mieç public. No ‘nd è plui ostariis (une volte a ‘nd jere ben cuatri), tant mancul buteghis di alimentârs (une volte a ‘nd jere dôs), e cussì par cjoli il pan o il gjornâl al tocje smontâ jù a val.”
“A Treli la sieradure, cualchi an fa, de latarie sociâl dutune cun chê de ostarie e dai doi alimentârs, e à fat pierdi il sens de comunitât. Di cualchi timp – al conte cualchi zovin – e je operative la Associazion “Treli 2000”, nassude propit in chel an, che e à metût in pîts une sorte di Cral, indulà che la zoventût tesserade si cjate insieme. La associazion e organize viaçs e fiestis di paîs. Ancje achì – mi disin – par cjapâ il mieç public o vin di lâ da pît dal paîs, al è cirche un chilometri di fâ a pît, e dome pocjis voltis in dì. Cundut achel, intai ultins agns o vin podût viodi un aument de popolazion, tantis personis che a jerin ladis vie a son tornadis dongje, e diviersis gnovis fameis a sielzin di restâ achì.”
Cheste int, come tante altre de Cjargne che e vîf in chestis condizions, e cîr di tignî dûr, e cjate la fuarce e il coragjo di lâ indevant dì par dì, probabilmentri parcè che e sint il leam strent aes lidrîs, a cheste tiere, a chestis monts. Achì nissun regale nuie! Si pues vivi distès ancje in mont, ma si podarès vivi miôr cun cualchi segnâl plui concret di atenzion.
Marta Vezzi