LA INTERVISTE. Di «Florean» al «Diari»

LA ORIGJIN_ «Florean dal Palazz», chest il non dal prin periodic in lenghe furlane, che al vignì fûr tal mês di Març dal 1883 ogni setemane fintremai al Jugn dal 1886 par un totâl di 170 numars, cuntune tiradure medie di dîs mil copiis par colp. Il tai dal gjornâl al jere une vore anticlericâl e in contrast cul guvier De Pretis in cjarie in chê volte.
Po dopo, ai 24 di Fevrâr dal 1946, al fo publicât il prin numar de «Patrie dal Friûl», in graciis di pre Bepo Marchet che al descrivè la riviste come «la vôs di tancj sudôrs, di tantis gjenerazions sclavis di cent parons e butade jù di cent invasions». Il gjornâl si fondave suntun gnûf concet di furlanetât, incentrât su la cognossince des specificitâts storichis, linguistichis e culturâls dal popul furlan, tant che te riviste si podeve lei la rubriche «Cuintristorie dal Friûl». La «Patrie» cun di plui e judâ fin dal imprin la nassite di un furlan uficiâl, unic e comprensibil in dute la regjon. Tal 1948 il periodic al deventà cuindisinâl e la direzion e passà a Lelo Cjanton, che le tignè fintremai al ’53. Dopo un periodi di sospension, a direzi il gjornâl e rivà Maria Del Fabbro, che ’ndi tignì sù la brene fintremai al Dicembar dal 1965. L’an dopo la publicazion e fo blocade fint al ’77, cuant che la direzion e le a Marco De Agostini.
Dopo «Patrie»…«La Patrie»_ «La Patrie dal Friûl»  invezit e nassè tal 1978 cu la direzion di pre Antoni Beline che al tignì la sô incarghe fintremai al Dicembar dal 1988. L’an dopo la riviste e tornà a cjapâ vite e dal 1990 il diretôr al fo Federico Rossi. Dopo vê rignuvît il gjornâl sei di un pont di viste di contignûts che te grafiche, Rossi al tignè cheste incarghe fin a dut il ’95, cuant che ae direzion al rivà Gianfrancesco Gubiani. Dal inizi dal 2001 al tornà a cjâf dal mensîl pre Beline, che al starà in cjarie fin a la sô muart tal 2007. Di chê volte e fintremai dut il 2009 la direzion e je stade tes mans di Dree Venier; dal mês di Zenâr dal 2010 al è diretôr Dree Valcic.
Tal 1962 e nassè «Int furlane», riviste dute par furlan nassude par informâ su ce che al capitave in Friûl ma no dome. Dilunc de sô durade, fint al 1987, cuant che e sierà, la anime de riviste al è stât Etelrêt Pascul.
«INT», burît fûr dal Istitût ladin-furlan «pre Checo Placerean» e direzût di Anna Bogaro, al nassè tal 2001 cuntun tai zovin e moderni frontant tematichis locâls ma ancje internazionâls. Tal 2003 l’editôr al decidè di lâ sul web par ufrî gnovis in timp reâl e cussì al nassè «Lenghe.net», simpri sot de direzion de Bogaro, on-line fint al mês di Zenâr dal 2010.
Dal 2006 al è nassût «Il Diari», cuindisinâl di informazion dut par furlan direzût di Mauro Tosoni, che al ven distribuît a gratis.
(Venusia Dominici)