LA INTERVISTE. Cressût cul bosc

Al met un dêt dentri te tace che al à denant, un tai di neri o un crichil di bire. E cussì, bagnât, al sfume il dissen che al veve fat prime cu la chine. Velu chi, l’autograf di Mauro Corona. Tes primis pagjinis dai libris di chei che a vegnin a cognossilu al piture stambecs, musis, la sô muse, cui riçots e cu la bandane.
Nassût tal 1950, fi di doi ambulants furlans, al à passât gran part de sô vite a Ert, un paisut te Val dal Vaiont, in provincie di Pordenon, dulà che ancjemò al vîf. Dal pari al à cjapade la passion pe mont. Mauro al è un alpinist valent, al à scjalât cetantis cimis in Italie e tal forest. Dal nono, invezit, al à imparât a intaiâ il len. Lis sôs sculturis a son preseadis in dute Europe. “Ma cumò no lis vent plui, lis fâs pal gno plasê e se o ai voie lis regali”, nus à contât.
Ma la notorietât, par lui, e je rivade cu la scriture. Tal 1997 al à publicât il prin romanç “Il volo della martora” e no si è plui fermât.
A son 14 i libris che al à dât aes stampis, l’ultin in Novembar, “Il canto delle manère”. Tes pagjinis, al conte la vite e lis tradizions di chei paîs sconvolts de tragjedie de dighe dal Vaiont, sucedude cuant che Mauro al jere frut, al veve 13 agns. Cumò tal scansel al à une balade par ertan che e conte di une vecje montagnare dal puest, un libri che al  fevelarà de fin dal mont e tantis flabis par fruts che a contaran il sotentrâsi des stagjons e che a trataran temis impuartants come il bulisim e la anoressie.
I libris: Il volo della martora (Mondadori, 1997), Le voci del bosco (Biblioteca dell’immagine, 1998), Finchè il cuculo canta (Biblioteca dell’immagine, 1999), Gocce di resina (Biblioteca dell’immagine, 2001), La montagna (Biblioteca dell’immagine, 2002), Nel legno e nella pietra (Mondadori, 2003), Aspro e dolce (Mondadori, 2004), Storie del bosco antico (Mondadori, 2005), L’ombra del bastone (Mondadori, 2005), Vaiont: quelli del dopo (Mondadori, 2006), I fantasmi di pietra (Mondadori, 2006), Cani, camosci, cuculi (e un corvo) (Mondadori, 2007), Storia di neve (Mondadori, 2008), Il canto delle manère (Mondadori, 2009).
Valentina Pagani