LA INTERVISTE. Biele serade, ma…

Tra il public dal teatron no si podeve no viodi la cjavelade riçote dal cjantant dai Carnicats, Dek ill Ceesa (a la anagrafe Andrea De Candido). Il so grup che al fâs rap par cjargnel (e cumò ancje par talian) al jere, duncje, tra i spetadôrs. Un di chei «che no si sintin rapresentâts dal Festival da la cjançon furlane»?
«No, no vin partecipât parcè che jo o jeri impegnât cun cualchi esam in universitât – nus spieghe Dek – e alore no vevi il timp just par scrivi un toc». Ancje se, Andrea, al fâs ancje une altre riflession: «Mi domandi parcè chè chest Festival al à vut ducj chescj finanziaments da lis istituzions e invezit – al va indilunc – manifestazions come il «Premi furlan» a restin simpri tal cidinôr?».
I Carnicats, di fat, a àn vinçût tal 2006 chest Premi che al è inmaneât di Radio Onde Furlane e che ur à dât la pussibilitât di publicâ il lôr prin cd Rap par cjargnel. Dut câs la serade, al Giovanni da Udine, i à plasût «La mê cjançon preferide e jere chê di Elsa Martin – al siere Dek – e in veretât il vôt dal public mi à smaraveât».
Valentina Pagani