Sfuei Mensîl Furlan Indipendent
Archivi de Patrie

ATUALITÂT – Voie di capî

............

Dentri dal so ufici di vie Sabbadini, i mancje dome la bale ovâl. Po o saressin a puest. Elio De Anna, di Cordenons, al è il gnûf assessôr regjonâl ae culture: al cjape il puest di Roberto Molinaro, daspò il rimpast dal president Renzo Tondo. Il passât di rugbist al fâs capî parcè che il sport, par lui, al è un model continui. O une ossession insuperabile. Sedi culture, furlan, gjestion dai rapuarts cu la Arlef, finanziaments aes associazion: la soluzion e ven in ogni câs dal sport. Il cjarnât De Anna, che al è ancje miedi, al displace subit cuntune domande: «Puedio spiegâ subit cemût che o intint la cuistion dal furlan?». Po al tire fûr de stampant un A4 e al dissegne grafics, freçutis e ûfs, cun dentri concets.
La culture furlane leade ae lenghe e à elements cierts. Il prin: la lenghe, che e à une part scrite e une orâl. Il plerumque dal furlan al è l’orâl. Une lenghe che e art tai nestris cûrs, ma che e je stade tramandade cu la confidence naturâl des maris.
La marilenghe, apont.
A cjase mê si fevele il folp, la variante dal furlan di chei di Cordenons. Mi ven plui spontani e naturâl che cjacarâ il cjargnel di Tumieç – cjargnel che lu cognòs par vie che di zovin o ai fat il liceu li.
Jo o sai za dulà che al vûl lâ a finîle.
Jo o identifichi chestis variantis tant che struments di une grande orchestre. E che a identifichin un teritori. Ducj insiemit a fasin il furlan. Cuant che si scuen insegnâlu tes scuelis, al è clâr che o varìn di doprâ la coinè. Chest al è pacific. Stes discors pai documents uficiâls, pes leçs e pes comunicazions, pai libris indreçâts a dut il Friûl. La coinè e je il superament de rigjiditât, dulà che tu valorizis ducj i struments.
Duncje, cemût indreçaraial la politiche linguistiche?
L’insegnament tes scuelis al restarà in mans a Molinaro, che al gjestirà la istruzion. Po, il Silce. Il servizi, sot di une uniche direzion, si ocuparà de lenghe furlane ma ancje di chês altris lenghis de regjon – chês di espression todescje e chês slovenis – e in plui ancje dai dialets. Al sarà di sclarî il rapuart fra Silce e Arlef. No doplons.
I dialets di competence dal Silce?
Ancje chei a fasin part de direzion de culture, in sens gjenerâl.
Par esempli?
Il venit che si fevele in Friûl.
Jo o viôt dutis chestis valorizazions dialetâls tant che un tentatîf di scjafoiâ dut ce che si à fat – e cun di plui cun grande fature – fintremai in dì di vuê pal furlan.
La norme e fevele di pandi e di insegnâ la lenghe furlane là che si le fevele. Ognidun che si cjapi sù la sô responsabilitât. No pues imponi il furlan a Triest.
Ma nancje creâ une condizion di paritât fra dôs situazions, lenghe e dialet, che no puedin stâ sul stes plan.
No si trate di meti sul stes plan. Il furlan al è une lenghe e e je tutelade par leç. Il dialet al è une altre robe. Ancje se il Consei, se al vûl, al pues valorizâ i dialets. Volìno dî che al è chest il tentatîf? Ma jo lu slontani tal mût plui assolût. La atenzion pal furlan e je massime, tant al è vêr che no esistarà mai une agjenzie pal triestin o pal venit. Mentri che invezit o vin la Arlef.
Arlef che però e je tratade piês di circul culturâl. Ma insome: no à bêçs, no à une plante organiche, al diretôr i è scjadût il contrat e «mandi-e-grazie-scusait-des-cjacaris», nancje une propueste. I parial normâl?
Jo o vûl capî. No ai intenzion di riviodi lis funzions, di stravuelzi la Arlef. Ma o vûl capî.
Saial cemût che e funzione?
O jeri dentri…
Ce avignî i prospetie?
Dipent di ce che e vûl fâ la Agjenzie. Dal sigûr, no podarà sostituîsi al Silce. Aial viodût ce che al è sucedût te sanitât? Cuistions jenfri agjenzie e direzion? Sierade la agjenzie. No volarès nancje pensâ di ocupâmi di sierâ la Arlef. La direzion di servizi e à une azion a 360 grâts e e lasse ae Arlef lis problematichis de lenghe. Ma la agjenzie no à di lâ par cont so: e à di seguî lis liniis di indreçament dal assessorât. E anzit, par rimarcjâ la impuartance che o vûl dâi al furlan i disarai di plui.
Che al disi.
O consideri la furlanetât un valôr fondamentâl e fondant de nestre Regjon, propit a pro de internazionalizazion de nestre Regjon. Mi spieghi cuntun esempli. Cualchi an fa, o soi lât a Washington Dc, intai Stâts Unîts. O jerin jo, Tondo, Scoccimarro, president de provincie di Triest, Brandolin par Gurize e Strassolt par Udin. O cjatìn un emigrant che al varà vût sù par jù la mê etât. Cuant che jo o ai dit che o jeri il president de provincie di dulà che al vignive Carnera, lui mi à dite: «Secuals!». Cul nono, al lave a viodi i combatiments dal pugjil. Mi à identificât subite. Vuê, che la emigrazion no je cambiade, ma diviersificade, vuê che i nestris zovins a van pal mont no cuntune valîs di carton ma cuntune tecnologjiche, il furlan al è ancjemò identificât pai valôrs che al puarte cun se. E la lenghe e je un di chescj.
Cuale saraie la prime mosse operative?
Imbastî une taule di «Governance». Come che o ai fat cuant che o jeri tal sport. I rapresentants no àn di jessi autoreferenziâi o puartadôrs di un specific interès, ma rapresentatîf dai ents e des lôr problematichis. La taule e cree i indicadôrs, di mût che la struture e puedi fissâ lis risorsis. O vûl fâ une taule pe marilenghe, dulà che il gno riferiment nol pues jessi che la Arlef: ma o clamarai ancje puartevôs dai comuns, des provinciis, des scuelis e dal mont associatîf. O vuei creâ la condivision di un percors, che al permet ae Arlef e al assessorât di vê un rapuart une vore strent. E no esclût di fâ i «Stâts gjenerâi» dal furlan. Un incuintri par provincie, par frontâ lis problematichis e une cunvigne finâl che e fasi sintesi. Cu la partecipazion di ducj.
Po ben, e chestis «tabelis» di riferiment pe spartizion dai bêçs aes associazions?
A varan di deventâ dinamichis. O ai viodût senis alucinantis: belançs regjonâi che si sieravin aes 3 di gnot, cuant che si dave sodisfazion aes tabelis.
Il Cencelli dai finanziaments, par fâ contents amîs e amîs dai amîs.
Mai plui. Si capìs, no si puedin scancelâ de dì ae gnot. Ma il sisteme al va cambiât. O vûl dâ doi messaçs fuarts, che za o ai dât cuant che o jeri tal sport. Dismenteaitsi il «Fâ par vie che la Regjon mi da». E po la trasparence: o stabilirìn i indicadôrs, cussì che ogni associazion e savarà se e rientre tai finanziaments e cuâl che al sarà il tet massim dal jutori.
Cuâl isal il prin inteletuâl furlan che i ven indiment, pensant ae marilenghe?
Par no fâ un tuart a nissun, o zui in cjase: Pieri Pauli Pasolini.
Aial mai let la nestre «Patrie dal Friûl»?
Ogni tant mi capite pes mans.
Cui jerial pre Toni Bellina?
Chel che al à curât la traduzion de Bibie par furlan.
Scoltial mai Radio Onde Furlane?
Le cognòs. Ancje prime mi àn intervistât.
Dopraraial une metodiche di rugbist pe lenghe furlane?
Chê no mi à mai molât.
Oscar Puntel

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +