Il concors pe gnove musiche furlane al recupere ancje la sezion «fumuts»
Ancje chest an al torne l’apontament cul Premi Friûl, il concors plui impuartant pe creativitât in lenghe furlane. Il Premi cheste volte al cjale aes sôs lidrîs. Intes sôs primis edizions di fat al jere dividût in plui sezions e duncje intai agns si è interessât di musiche ma ancje di grafiche, di gjornalisim, di radiodramis, di audiovisîfs, di leterature e vie indenant. Pe edizion 2010, in ocasion dai 500 agns dal riviel popolâr de Joibe Grasse dal 1511, dongje de tradizionâl sezion dedicade ae musiche e je previodude ancje une sezion che e rivuarde i fumuts.
LA STORIE_ Il Premi Friûl al nas intal 1982 e fin in dì di vuê a son centenârs lis produzions e lis personis che a àn partecipât intes variis sezions. Chest fat al da testemoneance dal interès che la iniziative e à simpri rivât a stiçâ. Dal 1998 il Premi si è interessât in mût particolâr e esclusîf de sezion musicâl. Ma za dai prins agns Novante la plui part dai grups furlans e à cjatât intal «Premi Friûl» un moment di prove impuartant e dispès un sburt a doprâ la lenghe furlane. Cun di plui, dongje dal Premi Friûl si è inviade ancje «Musiche Furlane Fuarte» une etichete discografiche che e à cirût di dâi spazi aes gnovis tindincis de musiche furlane.
LA SEZION MUSICHE_ L’obietîf de sezion musiche dal concors al è aromai di agns chel di produsi oparis origjinâls cun chê di rignuvî e di sperimentâ la forme cjançon in lenghe furlane. Intes ultimis edizions cheste sezion si è vierte ancje a chês altris lenghis minorizadis dal Friûl. Dopo di une prime fase di racuelte e di selezion des composizions origjinâls che si è sierade cu la fin di Otubar, une comission di esperts e à sielzût i grups e i singui che a saran invidâts a partecipâ ae part finâl dal premi dulà che ogni finalist al fasarà un conciert curt, sui 15/20 minûts, e che si tignarà inte suaze de rassegne «Musiche – pe gnove musiche furlane», inmaneade dal Assessorât pe Culture dal Comun di Udin.
LA SEZION FUMUTS_ La novitât di cheste edizion e je invezit la sezion dedicade ai fumuts che si riclame aes celebrazions pai 500 agns dal riviel popolâr de Joibe Grasse dal 1511. Par partecipâ al concors i autôrs a àn vût di svilupâ une storie origjinâl a fumuts in lenghe furlane su chest argoment.
Alore, se us à cjapât la curiositât di viodi e sintî i risultâts de edizion 2010 dal Premi Friûl no vês di fâ altri che vignî ae serade finâl che si tignarà sabide ai 4 di Dicembar li dal auditorium dal Palamostre a Udin.
Matieu Fogale