Sfuei Mensîl Furlan Indipendent
Archivi de Patrie

A torzeon pal “Cryptofriûl” di Raffaele Serafini

Walter Tomada
Raffaele Serafini, a çampe te foto

Cuarte vitorie al Premi San Simon di Codroip: un primât intes 42 edizions dal concors
Altri che “ditature sanitarie”! In Friûl e je aromai une “ditature leterarie”. E je chê di Raffaele Serafini, il scritôr che al à vinçût la edizion numar 42 dal Premi San Simon di Codroip deventant l’autôr che par plui voltis al è stât ricognossût tant che il miôr di chenti a scrivi in marilenghe. Pardabon un primât. Il piçul Oscar de leterature furlane al è finît intes sôs mans pe cuarte volte, in gracie di une racuelte di contis clamade “Cryptofriûl”, stimade de jurie – vuidade di Gabriele Zanello – tant che la plui valide des oparis presentadis al concors pe narative inte nestre lenghe. La sô afermazion e ven daûr di altris trê vitoriis otignudis cun “Soreli jevât a mont” (2015), “Contis sot spirt” (2017) e “Bisest” (2019), dopo de segnalazion che tal 2014 i jere tocjade cun “Contis di famee”.
◆ Cheste volte la atenzion di Serafini si ponte sul Nûfcent furlan; une schirie di contis nus mene ator pal Friûl a scuvierzi personaçs e vicendis che nissun si spietarès. E intant che si lei, inmagâts de “verve” narative dal autôr, si viaze vie pai agns dal Fassio, e po intal Friûl deventât “Kosakenland”; si fevele di problemis cence soluzion tant che il pericul des aluvions o lis servitûts militârs, o di int partide di chenti par lâ ator pal mont (Luigi Del Bianco) o passade di chi intant che e zirave il mont (Ernest Hemingway).
◆ In sumis, un libri dut di lei. Inte cerimonie di premiazion, come diretôr de “Patrie” o ai podût intervistâ Raffaele par capî miôr a ce pont che al è rivât il so percors naratîf, che al va simpri metût dongje – al è ben visâsal – ae sô ativitât di animadôr culturâl che, ator de ativitât dal blog “Contecurte”, al à permetût a tancj di metisi ae prove cu la scriture par furlan e di confrontâsi cun altris come lôr. Tant che si pues dî che cui che al scrîf in marilenghe vuê nol pues no fâ i conts cu la “Ostarie leterarie” di Contecurte e cul so “Ustîr”.
__
Al è un libri che al è avonde diferent di chei di prin. Ce isal cambiât te tô personalitât e tal to mût di scrivi?
I agns che o vin passâts nus àn cambiâts ducj. E ancje jo o sint che alc al è mudât. Par chest o ai sintût fuarte la bisugne di voltâmi indaûr e di  cirî te storie resinte de nestre tiere alc di biel, strani, maraveôs che al podès jessi biel contâ e che al podès stiçâ l’interès di cui che al volarà lei.
__
Parcè chest titul “Cryptofriûl”? Ce isal di platât ? Di tornâ a scuvierzi?
A son cetantis lis  robis de nestre culture e de nestre storie ancje resinte che a laressin fissadis inte memorie prin che a disparissin par simpri. Baste rindisi cont che no dut ce che o vin bisugne di cirî si rive a cjatâlu su Google, che nus somee il miôr amì e il nestri plui bon conseîr ma che nol sa dut, soredut ce che nus tocje plui di dongje. Invezit di fracâ un tast dal pc, se si à voie di savê ce che o vin daûr di nô, o varessin di scoltâ i nestris vons e lâ a tamesâ interiis bibliotechis di cognossince che a stan, par esempli, intai Strolics.
__
Inte tô opare tu âs recuperât, par screâ ogni conte, ancje bocons di poesiis di autôrs furlans dismenteâts o no valorizâts, di Pieri Corvat a Riccardo Castellani, di Nadia Pauluzzo a Giovanni Lorenzoni. Parcè cheste sielte?
Jessint il gno libri une escursion a torzeon pal Nûfcent furlan, o ai volût zontâ al inizi des contis cualchi viers che al è stât scrit propit intal stes an che si davuelzin lis vicendis che si lein. E o ai scuviert autôrs pardabon di nivel, che si adatavin al gno dissen e che magari ognidun che al lei il libri po dopo al pues lâ a aprofondî par sô cont.
__
Come che si pues lâ a cirî se a son vêrs o part de liende i animâi straordenaris che tu rapresentis intes “zooschedis” che ogni conte e puarte cun se. Cuale di chestis bestiis ti ise plasude di plui e cuale invezit ti fasie plui pôre?
La acuile e varès di jessi, ancje par resons simbolichis, la bestie che o ai plui tal cûr. Ma mi à colpît une vore la esistence di un bateri, la Modonarie, che al è fat come i furlans: al à resistût par secui ancje intes cundizions plui dificilis, ma inte modernitât i cjamps eletrics lu àn metût in crisi. Dut câs al è un esempli di creature de nature che e je in sintonie plene cul nestri “mâl dal modon”…
__
Ma secont te, sino ancjemò bogns vuê di “decifrâ” chest Friûl criptât? Sino bogns di sintonizâsi su lis frecuencis de “maravee” che tu nus mostris in chest libri?
La sperance e je chê di impiâ un lusôr suntun toc dal secul passât che forsit al è masse lontan par che sal visìn, e masse dongje par deventâ storie. Ma al è il pericul che, se nissun nol ferme su la cjarte chês storiis e chês peraulis che a àn marcât il passaç, la transizion, dal Friûl che al misurave il timp cu lis stagjons a chel di vuê, de modernitât, ae fin chest toc de nestre storie al ledi pardabon pierdût. Sino bogns di rivâ a capî che dismenteâ al è un mâl? No lu sai, par me al è cussì: stant che la scriture par furlan no je une strade par deventâ siôrs, par me e nas prin di dut di une motivazion che o ai dentri di me, che e je il plasê di contâ. Ma par contâ bisugne ancje jessi crodibii e il lavôr di studi e di preparazion al è fondamentâl par dâ interès e valôr a ce che tu contis. Il rest, a son domandis masse dificilis par cjatâ une rispueste. ❚
…………………………………………………………………………………………….
LA MOTIVAZION DE JURIE
La fuarce narative di Serafini e je descrite inte motivazion lete al moment de premiazion di “Cryptofriûl”: “La opare e propon un viaç a plui dimensions dentri dal misteri «di ce che al è râr, dismenteât, discognossût e di rimarcâ». Prin di dut un viaç dentri di vicendis scognossudis dal Friûl dal Nûfcent, li che events e personaçs storics si messedin cu la fantasie e cu la invenzion. Po un viaç gjeografic intai cjantons plui tipics e misteriôs dai ambients furlans, ma cun riferiments ancje a monts une vore lontans. Un viaç fintremai zoologjic, che al jemple di maravee denant di animâi stranis, rârs o aromai discomparîts, tant che se si fos denant des vetrinis di une Wunderkammer. E, tal ultin, un viaç ancje leterari, in gracie des poesiis che a vierzin ognidune des sîs contis proponudis tal scrit. Di dute cheste architeture, paronade cun sigurece e in mût rigorôs, a saltin fûr protagoniscj piturâts une vore ben ancje te lôr psicologjie e massime te lôr umanitât. I riferiments storics a son precîs e justificâts cun braùre e esatece tes sezions intituladis “Vêr al è”. La lenghe, rampide e sauride, e je doprade cun proprietât in ducj i diviers regjistris linguistics. Un lavôr che al cjape, parcè che al môf di un continui la curiositât dal letôr e il so plasê di cognossi”. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +