La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e à pensât di meti in pîts la aziende agricule. Lu à fat massime par vê la certificazion biologjiche. Ae passion dal ort si è metude dongje la passion pal rabarbar e pal ribis neri: coltivazions un grum raris e di nicje. Intant, jo o soi tornade in Cjargne (al jere di un pôc che o vivevi a Triest) e o ai tacât a dâi une man, cu la idee ancje di meti dongje une fatorie didatiche che, dopo tant timp – ancje “in gracie” de burocrazie – o ai rivât adore di metile in pîts. La fatorie didatiche e à cirche un an di vite. O ai ancje cjapât sù la gjestion dal ristorant. Chest an o ai dât in man la gjestion de fatorie didatiche a un educadôr che al sta puartant indevant tancj progjets cun fruts ancje autistics e disabii. La idee e je chê di sprolungjâ i laboratoris pai fruts ancje di Invier, tal doposcuele, e a son smirâts ancje a judâ i gjenitôrs che a lavorin e che a no san dulà puartâ i lôr fruts. Al è un ambient san pai fruts e une buine alternative a ducj i mateçs che ju condizionin e che ju instupidissin (televisions, computers…). E je la ocasion par stâ tal viert, a contat strent cui animâi, imparant ancje a cognossi lis plantis e a stâ insiemi par fâ comunitât. I fruts di cumò, post covid, a àn tante bisugne di chestis robis. Tal mês di Lui o vin tosât lis pioris, e i fruts a àn podût viodi, partecipâ e vivi di persone chest event (tocjant e nasant l’odôr de lane a pene taiade) e scuvierzint cemût che si rive al prodot finâl, come che al pues jessi un maion di lane! I fruts a restin incjantâts ancje dome a viodi che lis gjalinis a fasin i ûfs…”
◆ I prodots de aziende agricule si puedin cjatâ tal ristorant Borgo Poscolle di Cjavaç.
◆ Caterina e je tornade in Cjargne di pôcs agns, di fat e conte: “Jo o soi nassude e o ai vivût fin a pôcs agns fa a Triest. I miei gjenitôrs a un ciert pont a son tornâts in Cjargne. Jo, finide la universitât, o ai cjatât lavôr intune assicurazion a Triest ma o ai simpri vude la idee di tornâ a vivi in Cjargne, intal vert. A Triest no mi cjatavi mâl, ma par esempli il mudâ des stagjons tu lu puedis vivi dome stant in mont… in citât nancje tu ti inacuarzis! Jessî di cjase e pescjâ il prât, lâ in mont… a jerin dutis robis che no volevi rinunziâ! Di fat, o soi contente di jessi achì. Pôc dopo che o soi rivade in Cjargne, o ai cognossût chel che vuê al è il gno om, e o vin une frute… La idee che e puedi cressi in chest contest no à presit… a Triest no mi sarès propit plasude la idee di cressi fruts sul asfalt. Jo o soi cressude a Triest ma il fin di setemane o jeri achì dai miei nonos.”
◆ Par altris curiositâts, o segnalìn la pagjine facebook: https://www.facebook.com/profile.php?id=100057123564089 ❚
