Sfuei Mensîl Furlan Indipendent
Archivi de Patrie

Pietro Corredig e Sonia Borghese: une vite di pignatis a scufiots

servizis di Francesco Tonizzo
Sonia Borghese e Pietro Corredig

La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin

Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il pilote Pietro Corredig e la navigadore Sonia Borghese, om e femine ancje inte vite e no dome tes corsis, a àn cjapât di pôc i titui talian e european cu lis machinis storichis.
“In famee, o vin simpri vût i motôrs e lis machinis intal DNA – al conte Pieri –. Gno barbe al jere une vore apassionât, gno fradi compagn. Baste pensâ che, a San Pieri, al jere facil sintî il businôr che al rivave de Cividât – Madone di Mont. Intai dîs prime de gare, si durmive propit cul barcon viert, par tignî lis orelis pontadis su lis provis: si diseve che a rivavin i suns des pignatis a scufiots. Di cuant che o vevi 14 o 15 agns, o ai tacât a lâ ator pe Europe a viodi garis: o lassavi il paîs cul autostop e vie. O soi lât a Le Mans, in France, insiemi cuntun amì di San Pieri. Juste chest an al cole il cincuantesim di chê aventure”.
__
Cemût isal stât il svicinâsi aes competizions?
“Cul lâ indenant de etât, o ai tacât a fâ lis primis garis. I prins lavôrs a son stâts chei di dâ assistence ai pilotis intes garis di rally. Il gno amì Massimo Albano di Tarvis al vuidave la machine in cubie cul navigadôr Evelino Mattelig, ancje lui cjanalot di Ponteà. Une volte, intal 1976, al capità che al ves bisugne di sostituî Evelino, e duncje o soi montât in machine cun lui. O ai imparât di lôr dut l’abecè dal automobilisim: jessi pilote, jessi navigadôr. E jere la mê prime volte e, soredut par merit di Massimo, o vin vinçût. O ai tocjât il cîl cuntun dêt”.
__
E lis primis vitoriis di pilote?
“Intal 1977, par iniziative dal paron Cesare Fiorio, al fo istituît il trofeu A112 e jo o mi soi apassionât une vore. O ai vude la fortune di cori la prime gare, al rally dal Ciocco in Toscane, e o soi rivât diesim novesim su sessante di lôr che a partivin e une trentine rivâts insom. Par jessi la prime volte, sot de ploie, cuntun aiar di no crodi, e je stade une biele robe. Chê machine, che e jere di serie, e veve 70 cjavai, forsit alc di plui. Di bot, mi à plasût une vore, ancje parcè che o corevi cuintri pilotis di nivel: Attilio Bettega, par dî dome un non. O soi stât l’unic pilote in Italie a cori dutis lis vot edizions dal Trofeu A112. No ai rivât a partecipâ a dutis lis garis di ducj i agns. Dut câs, intal 1984, vint une sume un tic plui sostanziose, o vin rivât a vinci il trofeu a Sanremo. I numars a disin che in vot agns a àn corût il Trofeu sîscent pilotis e votcent navigadôrs, e jo o soi un dai vot su sîscent che a àn vinçût”.
__
Mai professionist: parcè?
“O ai simpri corût par passion. Di chei agns, tancj pilotis a son lâts a fâ i professioniscj e jo, invezit, o ai simpri pensât prime al lavôr a San Pieri, inte see di famee, fondade intal 1923, tant che il prossim an al sarà il centenari de ativitât metude sù di gno von. Ocasions a son stadis, ma o soi cetant content cussì. Cuissà? Se o fos passât professionist o varès vinçût alc di plui, biacemai o varès molât lis garis in curt. Cul fâ come che o ai decidût, o ai simpri tignude vive la passion e, cul jutori di ducj i miei amîs, o soi rivât fin aes vitoriis di vuê”.
__
Continus des machinis.
“O soi simpri stât afezionât aes machinis di serie, parcè che a son plui ae mê puartade. Ae fin, se tu sâs vuidâ une machine di serie, tu sâs vuidâ ancje une di corse: il contrari nol è simpri vêr. O ai corût cuntune Fiat Uno Turbo, rivant intai prins dîs almancul trê voltis. Un an o sin lâts a cori il Rally di Montecarlo, par premi dai risultâts cjapâts intal trofeu Uno Turbo. Si sin cjatâts in gare cent e setante machinis: si sin cualificâts intai prins sessante. In dut chest timp, o ai simpri corût almancul une o dôs garis ducj i agns. E, cuant che o vevi lis pussibilitâts, ancje dîs o dodis garis intun an. La uniche volte che no ai inzornade la licence al è stât intal 2020, par vie dal Covid. Dut câs, intal 2022 o vin ecuilibrât di gnûf la situazion, cun cetante sodisfazion”.
__
Rivant intal ultin, Sanremo al puarte une vore ben…
“Inte ultime gare che o ai fat, al Rally di Sanremo, o vin vinçût il titul european di machinis storichis. Un titul che al è rivât juste 38 agns daspò de vitorie dal 1984, che e jere une gare di nivel mondiâl. Cjatâsi simpri là, cetant timp plui indenant, par vinci ancjemò, e je stade une sensazion di no crodi. Si viôt che Sanremo al è intal gno destin”. ❚

::::::::::::::::::::::::::::::::::::::::::::::::::::::::::::::::::::::::::::::::::::

Dôi trofeus intun colp

Intal 1984, al è rivât il titul cu la A112 e l’amôr. E la navigadore e je stade centrâl ancje pal passaç aes machinis storichis

Sonia, che e je avocate di mistîr, e à sburtât une vore, simpri cun snait e voie di rivâ adalt. Purpûr, no dut al è tacât come che si pues pensâ.
“Cuant che si sin cognossûts, jo no savevi che lui al coreve in machine – e ricuarde la navigadore, nassude a Bolzan e cressude a Miers disore –. Une dì, al jere Setembar, lui al à metût sù une gare di corse amatoriâl a pît cuintri il timp a San Pieri: la gare si clamave “Mulin, vât, passadôr”. Inta chê volte, cun mê sûr o corevi intai cjamps, e cul tramit di sô cusine o sin ladis a competi. Insiemi cui siei amîs pilotis e navigadôrs, al veve mateât par vê il servizi di cronometri. Si sin viodûts par dut l’Invier e no mi à dite nuie: di bot, intal mês di Març, mi dîs che al veve di lâ a cori in machine”.
__
Des corsis a pît aes corsis in machine, il salt al è curt. “Cul lâ daûr di lôr, o ai imparât a fâ il navigadôr, lis tecnichis di vuide, lis peraulis di riferî ai pilotis e mi soi apassionade. A contâle juste, lui al à vinçût il trofeu dal 1984, intal an che mi à cognossude: ven a stâi che si scuen dî che al à cjapât dôi trofeus. Jo o soi simpri stade une femine sportive, si ben che mancul fature si fâs e miôr al è. Cori in machine e je stade une rivelazion positive. Ancje se, a stâ sentâts intune machine, corint un rally, si cjapin pachis a sbreghebalon e si scuen jessi une vore preparâts”.
__
Ancje achì nol è lât dut slis intal principi.
“O ai scomençât a cori come navigadôr intal 1989 e Pieri mi à subite intimât che no podevin cori insiemi. O ai spietât doi agns par lâ suntune machine cun lui: intant, o ai vude la fortune di rivâ a cori ator pal mont cun tancj pilotis, Marchiol, De Cecco, Intilia, Comelli. Jo o soi stade la prime a cori intai rally storics, intal 1997, e mi soi inacuarzude subit che al jere une vore biel. Si coreve cui ûs di une volte, cu la assistence libare. I prins agns, lui al diseve che i plaseve cori cu lis machinis modernis. Daspò, al è rivât incà, al à tacât a fâ assistence a pilotis di storichis, cundut che al seguive altre int e jo o levi cun altris pilotis. Cuant che o vin comprade une BMW 2.2, model stradâl, le vin preparade par cori intes garis storichis: cul doprâ une machine che o vevin in cjase, al è stât dut plui facil e o sin lâts a cori insiemi. Intal 2011 o vin comprât ancje la seconde BMW, che o doprìn ancjemò cumò”.
__
Insume, il navigadôr al à tancj merits.
“Si cor in doi. E si vinç cul lavôr di scuadre. La buteghe di Luigi Sartori nus prepare la machine in maniere perfete: intal 1984, a Sanremo, al jere simpri lui il mecanic. Un spetacul. Di chê volte, al è cambiât dome il navigadôr… Disìn graciis a ducj i amîs che nus dan une man. O corìn simpri sot de Scudarie Friûl dal paron Giorgio Croce, o lin ator pal mont, o viodìn puescj gnûfs, o cognossìn int: dut une vore biel”. ❚

::::::::::::::::::::::::::::::::::::::::::::::::::::::::::::::::::::::::::::

Sanremo al puarte ben

Cul sucès a Sanremo, Pieri al à vinçût il “2022 FIA EHRC Category 2”, suntune BMW imatricolade prime dal 1975. Daûr di lui, il belgjic Carlo Mylle, che al vuidave une Porsche 911 Carrera. Sonia e à cjapât ancje il titul european dai navigadôrs, denant di Giovanni Campeis.
◆ In dut, Corredig al à corût dibot dusinte garis e, des primis voltis intai agns Setante e des primis vitoriis intal 1984, al è intal mont dai rally di plui di cuarante agns.
◆ Sonia e je dentri dal circul des navigadoris furlanis: une clape di pueste par stâ insiemi e par fevelâ di corsis e di machinis. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +