Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc
O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal chef. Di profession cogo, cumò al sta deventant famôs par une biele storie di amicizie fra om e cjan, inviant un progjet dutun cul sô lôf cecoslovac di non Numb, adotât un an fa.
__
Thomas, ti vevi lassât che tu jeris un “personal chef”: ce fâstu vuê?
Finide chê esperience, daspò finît il lockdown o ai fat la stagjon estive a la Elbe, finide chê a Sapade e Siene, e cumò o fâs il chef a Livigno intun albierc a 4 stelis cun spa, a cjâf di un team di 9 personis.
__
Ma cumò tu sês in compagnie…
Eh sì: o ai adotât Numb, un lôf cecoslovac, il plui piçul di une biele covade di sîs cjanuts. Al jere restât l’ultin: nissun lu voleve parcè che si jere fat mâl intune çate zuiant cui siei fradis. Al someave adiriture che forsit nol varès mai rivât a tornâ a cjaminâ ben. Jo lu ai cjolt istès e mi àn conseât di fâi fâ esercizi par rinfuarçâi la muscoladure. In chel periodi o jeri a Sapade, la matine o fasevi alenament di corse e cussì o ai tacât a puartâmal daûr. Po dopo, o vin provât a fâ cualchi percors di mont, il prin ripâr, po dopo simpri plui adalt.
_ Parcè Numb di non? Il gno grup rock preferît a son i Linking Park e tal lôr disc Meteora la cjançon plui rapresentative si clame Numb. E duncje lu ai clamât cussì. Il biel al è che “numb” al vûl dî alc tant che “indurmidît”, e invezit o pues sigurâ che lui al è dut il contrari!
__
E duncje ti è vignût iniment di fâ un vêr e propri progjet…
Al è sucedût che a un ciert pont o jeri a Siene, e o ai viodût che Numb nol jere plui lui: si jere studât. O ai capît che i mancjavin lis monts. E cussì o ai molât chel lavôr e o ai acetât une propueste a Livigno. In chel periodi o ai seguît la storie di Nepal e Andrea, il cjan e l’om che a àn il record di un cjan puartât plui adalt, lôr a son lâts sul Monte Rosa. Mi soi studiât il lôr câs e mi è vignude la voie di provâ ancje jo cun Numb. A Livigno a àn i “Nos 3000”: 10 monts sore dai 3.000, un percors che tancj a fasin. Cuant che tu rivis insom di une, al è un QR code par regjistrâ la imprese, si vincin ancje premis… e cussì mi è vignude chê di provâ a fâlis cun Numb e inviâ il progjet Walking Wolf, un tour pes monts de Italie e cul obietîf finâl di bati il record di Nepal e Andrea, rivant insom dal Monte Bianco. In Setembar o vin finît i Nos 3000, cumò o stin fasint un tour cun Alps, Dolomitis e Apenin. Finide cheste tirade, o fâs operâ Numb ae çate, cumò che si è rinfuarçât, par cirî di risolvi une volte par dutis il so probleme.
__
Sêstu un espert di mont? Vâstu di bessôl o ti fâstu judâ?
No, o jeri te scuadre regjonâl di schi, ma la mê esperience di mont e finive cun chel. Cualchi volte o lin bessôi, cualchi volte compagnâts di une vuide: a seconde dal impegn. Mai meti sot gjambe la mont: plui di une volte o sin tornâts indaûr e mi soi studiât miôr il percors prime di fâlu ancjemò. O volarès ancje marcâ che dopo cheste esperience mi soi rindût cont che lâ in mont cul cjan no je une limitazion ma un valôr in plui: si va sù cuntun amì.
__
Ce canâi di comunicazion dopristu pal progjet?
Tal imprin o ai doprât i social, e jere la robe plui semplice. Cumò o varai di fâ ancje un sît, fra lis mil robis che o ai di fâ. Par intant o dopri Instagram, cuntun profîl dal progjet Walking Wolf Tour, il profîl “personâl” di Numb (al rît ndr) e il gno. Po dopo, o sin tant seguîts su Tik Tok, o vin passe 26.000 follower. Su Tik Tok la comunicazion e je plui gaiarine e lizere: lis robis specifichis su la mont a àn mancul like, su Instagram si fâs plui il pont su ce che o stin fasint. Dut câs, al è un biel impegn, no rivi nancje a meti sù dut il materiâl che o ai, e mi coventarà cualchidun che mi dedi une man.
__
Tu puartis simpri insom la bandiere dal Friûl…
Sigûr! E di fat a Livigno mi soi fat cognossi ancje par chel.
__
Cui ti aial judât te imprese?
La iniziative e je tacade autofinanziade e cul jutori di cualchi sponsor tecnic che mi davin materiâi. Par esempli, la bandiere che si diseve me à dade la Friûlpoint, cun ancje altre robe , come la bandane/scjaldecuel dal Friûl che o met simpri lant sù. Cualchidun mi à dât in maniere spontanie une ufierte traviers dai canâi social. Cumò si stan svicinant ancje sponsors par meti un francut par fâ la ultime part dal tour e pal record.
__
Ce rispuestis âstu vût ae tô iniziative?
E je stade une grande rispueste di bande dal “popul dal web”, e cumò ancje di bande dai media tradizionâi. Un biel sburt lu à dât un articul vignût fûr sul Corriere Milano, che mi à puartât gnûfs followers sui mei canâi social e altris intervistis di bande di altris sîts e ancje de television locâl.
__
Un grant sucès: “al tire plui un pêl di cjan…”.
Si pues propit dî (al rît). Une robe che mi à fat tant plasê e je che cumò lant ator nus ricognossin. In chei dîs ca o jerin a San Vît (dal Cjadovri, ndr) e tante int mi à fermât. Ti fasin i compliments, adiriture ti ufrissin di bevi. Propit biel.
__
Cualis sono lis prossimis tapis?
Cumò ai prins di Novembar o fâs fâ la operazion a Numb e fin in Fevrâr o starìn cuiets. Dopo o tacarìn la preparazion par tentâ il record, in Primevere. ❚
:::::::::::::::::::::::::::::::::::::::::::::::::::::::::::::::::::::::::::::::::::::
FOCUS. Record: i cjans plui vecjos
A proposit di cjans protagoniscj di record, cuâl isal il cjan plui vecjo tal mont? Propit chest an e je muarte Pebbles che e jere al moment la cjice plui vecje dal mont, daûr dal Guinness dei Primati. E jere une fox terrier toy, che nus à lassâts a cinc mês dal so vincjesim tierç complean. Lu àn anunziât i parons Bobby e Julie Gregory di Long Island (Usa). Nassude ai 28 di Març dal 2000, e à vût 32 piçui cul so compagn Rocky, che al è muart intal 2016.
◆ Il record assolût di longjevitât lu à però un australian cattle dog di non Bluey che al è rivât ae etât di 29 agns e 160 dîs, murint intal 1939. Al secont puest un beagle di non Butch muart a 28 agns; tierç un pug di non Snookie, muart in Sudafriche ae etât di 27 agns e 284 dîs.
◆ Diviers istitûts di ricercje a àn tirât dongje dâts statistics par capî cetant che al vîf un cjan vuê, concludint che la vite medie dai nestris amîs a cuatri gjambis si ateste plui o mancul tor dai 12-13 agns. In ogni câs, a son di fâ lis diferencis oportunis su la base de taie e de raze: al è confermât che i cjans di taie piçule a àn une vite medie di durade plui grande, e i cjans miscliç di razis a risultaressin gjoldi di une spiete di vite plui lungje. Il Chihuahua e je risultade jessi la raze che e vîf di plui: al passe cun facilitât i 15 agns di etât e al pues rivâ ancje fin a 20. ❚
::::::::::::::::::::::::::::::::::::::::::::::::::::::::::::::::::::::::::::::::::
LINK & LEAMS
Si pues seguî lis impresis di Numb e Thomas su Instagram cirint il profîl walkingwolf_official, numb_the_wolf e colussa_thomas. Su Tik Tok lait a cirî tommy_colussa. ❚
