La Fondazion Friûl e finanzie 20 bants pes scuelis superiôrs

La Fondazione Friuli e à fat savê i risultâts dal Bando Arricchimento offerta formativa 2017– il tiermin pes domandis al scjadeve ai 3 di Lui passât – indreçât aes scuelis secondariis superiôr des provinciis di Udin e Pordenon.
A son stâts acetâts 20 progjets scolastics smirâts a miorâ la cualitât de ufierte formative dai istitûts relatîfs. L’obietîf dal bant, rivât ae cuinte edizion, al è chel di favorî la formazion dai zovins potenziant lis lôr competencis linguistichis e sientifichis, ma ancje in materie di citadinance ative e di cognossincis digjitâls.
Fra i temis dai progjets acetâts, la valorizazion des lenghis comunitariis, comunicâ miôr cui gnûfs stumenti digjitâi, avigniments sportîfs e musicâi, iniziativis di prevenzion de dispersion scolastiche.
Dentri dai i vincj, un al à un titul (ancje) par furlan: Par gracie di diu – per grazia di Dio. Il pellegrinaggio religioso nelle terre del Friuli: dalla Romea Strata ai percorsi della religiosità popolare presentât dal Istitût Statâl di Istruzion Superiôr Bonalt Stringher di Udin.
I progjets a varan di jessi disvilupâts intal an scolastic 2017-2018.
cemût che di regolament, il risultât dai progjets singui al varà di jessi esprimût ancje di une opare di creativitât: un elaborât multimediâl, un sît web o un periodic, un spetacul o un curtmetraç. Un prodot finâl dal inzen dai arlêfs.
Il president de Fondazion Friûl Giuseppe Morandini al è content de cualitât dai lavôrs presentâts: «Ancje chest an o vin tant preseât la capacitât progjetuâl des scuelis, che a metin in cjamp iniziativis di alte cualitât che in cheste edizion si son incentradis, ancje cun soluzions inovativis, su la cognossince des lenghis, su la citadinance ative e no dome. Il nestri obietîf, condividût cu lis istituzions scolastichis, al è chel di favorî iniziativis che a puedin proponi une ufierte formative plui complete e soredut aderente aes dibisugnis efetivis di ogni istitût singul».
(Redazion)