LA FABRICHE DAI… LIBRIS. Gianni Gregoricchio, “Une vite di pôc”

«E jere la vilie di Nadâl e il «agazen popolâr» – un supermarcjât che al cjapave i cuatri plans dal palaçon di veri e ciment – al veve sflandorât di lusôrs e vetrinis fintremai dîs di gnot. Cumò, finalmentri, e jere rivade ore di sierâ. Lis cassieris a spesseavin a finî i conts e vie pai plans al jere dut un cori e un businâ. Lis fantatis plui zovinis, po, a saltavin di ca e di là come gri, dismenteonis, dut intun colp, de strache e des gjambis sglonfis».
Inte ricje e svariade produzion leterarie di Gregoricchio (teatri, narative, traduzions, senegjaturis), o ai sielt chest romanç dal 1988.
Il protagonist al è Checo Adami un sioret che al lavore inta chest supermarcjât e che o cjatìn, sul imprin dal libri, sul ôr de pension, cul cûr in disordin e cuntun marum di traviers par vie dai rapuarts dificii cun so fi Roberto. Un pôc fûr dal timp, ancje, Checo: lui al jere un «citadin di borc», propi tant che Gregoricchio al diseve di se (vâl a dî un abitant di un dai tancj paîs ator di une citât, che no jere ancjemò rivade adore a glotiju), e no le veve cjapade ben chê storie (volude dal fi) di trasferîsi intun bocon di condomini intal centri de citât.
E scomence, alore, une rivisitazion di dute la sô vite, di frut in sù, une sorte di belanç, che ognidun al scuen fâ cuant che al rive a une cierte etât. E Checo si intope ancje intune operazion tal cûr che i lasse tant timp di pensâ. Une vite di pôc, chê che al à vivude lui, ma intant le à vivude e un tic di simpatie al è rivât adore a lassâle intor di se, in gracie dal so bon cûr. No chel cûr fat di muscul, ma chel fat di sintiment.
La prose di Gregoricchio e je lizere, vualive, e va vie slisse e si le lei facile e simpri cun plasê. Une scriture adate a trasmeti contignûts che a àn a ce viodi cu la condizion umane, cu la situazion di sotanance di tancj di lôr («…un paron al vâl chel altri e nô sotans nus baste di tirâ indenant e di vivi in pâs, soredut vivi in pâs…» al fâs sentenzie il pari di Checo a un ciert pont), cul dram eterni dal om in face al so destin. E cussì i bastin pocjis pineladis par piturâ un caratar: par esempli chel di Gjeme, la cape dal repart di blancjarie di femine,  viele ingarbide di une vite cence nissune sodisfazion ni plasê, avodade a Nestri Signôr, plui par disperazion che no par convinzion. Ma Checo, stant intal so iet di ospedâl, al pensarà a clamâle par dîi une buine peraule, cuant che al ven a savê che e je muarte sô mari.
Eco: lei Gregoricchio e vâl la pene par cjatâ in ca e in là di chescj flôrs piçui e biei.
Laurin Zuan Nardin