LA FABRICHE DAI… LIBRIS. E par furlan?

A disin che in dî di vuê si lei simpri di mancul, che il marcjât dai libris al è in crisi e che i zovins no cjapin plui in man i “classics”; chest al è vêr, ma si à ancje di regjistrâ un fenomen che al fâs tirâ un pôc il flât: o fevelìn dai cors di scriture. A nivel locâl a son nassûts intai ultins agns diviers cors inmaneâts des universitâts de tierce etât o di associazions culturâls che a cjatin une rispueste positive in tiermins di partecipazion.
CUI E DULÀ_ O nomenìn par esempli chel de Bottega Errante (www.bottegaerrante.it), une associazion di zovins che, tra lis tantis ativitâts culturâls, si dedichin ancje ae divulgazion de leture e de scriture lant ator par dut il teritori regjonâl. Interessante e sarès une propueste di chescj cors ancje in lenghe furlane, par stiçâ la cognossince dai scritôrs furlans e par incentivâ l’ûs de lenghe ancje in forme scrite. In chest câs la ARLeF e à tacât di cualchi an a prontâ cors di scriture creative tes scuelis secondariis di prin grât, ma par cumò indreçâts dome a cheste fasse di etât: o auspichìn che tal avignî cheste ufierte e sedi voltade a ducj.
Concors tant che S. Simon a Codroip, il Zâl par furlan a Spilimberc, Emozions d’ingjustri a Basilian, In trê riis ai Colonos di Vilecjaze a mostrin une cierte vivarositât te produzion leterarie furlane che no à di lâ dispierdude, ma ben coltade e sburtade.
No stin a dismenteâ in fin la ostarie “virtuâl” di Contecurte, che za di mês e colabore cun nô pe rubriche omonime chi in bande. I “ustîrs” a publichin storiis di scritôrs furlans o traduzions in marilenghe di oparis forestis. Par cui che al vûl provâ a butâsi te aventure de scriture al pues mandâ il propri materiâl a contecurte@gmail.com. ■
Venusia Dominici