La Europe e va a drete e tal gnûf PE e cale la rapresentance di minorancis e nazionalitâts

Lis elezions europeanis dal 2024 a son ladis sù par jù cemût che si spietavisi ae vilie: cuntune tignude o cuntune incressite des diestris nazionalistis sei di guvier, plui o mancul euroconformistis, sei di guvier o di oposizion, cuntun profîl marcât plui a clâr di euroseticisim fuart o di antieuropeisim arût. Cussì tal gnûf PE, cun 720 components, il grup dal PPE (Partît Popolâr European, di centridiestre) si conferme il prin e al passe di 176 membris (cuant che in dut i eurodeputâts a jerin 705) a 189, intant che i doi grups plui a diestre (chel dai Conservadôrs, ECR, e chel di Identitât e Democrazie, ID) a vuadagnin eurodeputâts e a passin di 69 a 83 e di 49 a 58. Al pues stâi che chescj numars a cambiin ancjemò almancul fin a Lui, stant che a son partîts e singui elets di cheste aree politiche che a àn ancjemò di decidi la lôr colocazion. Pal rest, se i socialiscj a tegnin avonde bot (a passin di 139 a 136: mancul trê, che però a pesin di plui intal gnûf PE) e la Çampe e cjape trê eurodeputâts in plui, passant di 36 a 39, i liberâi di Renew Europe a pierdin un bon numar di rapresentants e a passin di 102 a 74. Al piert vincj eurodeputâts (di 71 a 51) ancje il grup là che si dan dongje i Verts e la Aleance Libare Europeane (ALE), il partît che al ten dongje la plui part dai partîts e dai moviments nazionalitaris e regjonaliscj.
◆ Pes fuarcis politichis di cheste fate, dispès espressions di comunitâts piçulis in tiermins numerics e di difusion gjeografiche, al è simpri plui dificil rivâ a cjapâ part aes elezions dal PE e, tra normis, sbaraments e dimensions des circoscrizions, ancje la partecipazion e la capacitât di cjapâ consens a vegnin condizionadis a fuart. Al è emblematic ce che al è sucedût tal Stât talian cul “decret elezions”, che cundut che a jerin propit elezions europeanis, al à limitât la presentazion des listis cence scugnî tirâ sù firmis dome ai partîts presints inte Cjamare o tal Senât, cence tignî cont de apartignince ai grups dal PE e cussì la ipotesi di une liste de ALE (AeA, Autonomie e Ambiente) e je lade sù pai stecs. Tal Stât francês la liste e je stade presentade, ma e je restade sot dal sbarament a nivel statâl e no à rivât a mandâ a Strasburc e Brussel nissun rapresentant (prime al jere il cors François Alfonsi). Al è sucedût compagn in Grecie, cu la liste dal partît di riferiment de minorance turche in Tracie che e à cjapât il numar plui alt di vôts tai teritoris di Rhodope e Xhanti, ma nol è stât avonde.
◆ Ur à lade miôr aes coalizions metudis adun dai partîts nazionalitaris e regjonaliscj tal Stât spagnûl. La liste Ahora Repúblicas, là che si davin dongje i bascs di EH Bildu, i catalans di ERC e i galizians dal BNG, e je stade la cuarte, par numar di vôts, inte circoscrizion uniche a nivel statâl, cun sù par jù il 5%, e cussì e à confermât i siei trê eurodeputâts (un par om: doi tal grup Verts/ALE; un in chel de Çampe). A àn cjapât un rapresentant par om chês altris dôs listis; chê catalane di Junts i Lliures, vuidade dal partît di Carles Puigdemont, e chê di CEUS, vuidade dai bascs EAJ-PNV e de Coalicion Canaria. Altris grups di Catalogne, Paîs Valenzian e Aragon a àn presentât i lôr candidâts inte liste di çampe di Sumar (che e à cjapât il 4,65%).
◆ Dongje dai europarlamentârs che a son tai grups dai Verts/ALE e de Çampe, rapresentants di minorancis e nazionalitâts si cjatin ancje ta chei altris grups, tacant dal PPE, cun Herbert Dorfmann de SVP e Loránt Vincze, espression de minorance ongjarese in Romanie, e dal ECR, là che si cjatin i trê elets dal partît conservadôr flamant N-VA. ❚