Chê di Udin e je la provincie cun plui faturât di cualitât
Cui siei 1,620 milions di euros, la Dop Economy F-VJ dal 2021 e vâl il 63% di dute la produzion agroalimentâr regjonâl (la medie taliane e je di “dome” il 21%). E je la regjon de Penisule cu la plui grande percentuâl di impat e, cun di plui, in cressite dal 25,2%. A son chescj un pôcs dai dâts dal “Rapuart Ismea-Qualivita 2022” su lis produzions agroalimentârs talianis a Denominazion. Chest risultât al fâs riconcuistâ, ae nestre regjon, il 6st puest inte classifiche nazionâl dopo che e jere lade jù al 7m puest intal 2020.
◆ Se ancjemò al ves di coventâ, duncje, cui numars in man, il Rapuart al rimarche la vocazion aes produzions di cualitât dal teritori regjonâl.
◆ I operadôrs impegnâts intes filieris di cualitât a son 3.648, cuntune riduzion di 366 unitâts. A nivel di provincie, chê di Udin e je prime cuntun valôr de produzion certificade di 687 milions di euros, cun daûr chê di Pordenon (306 milions di euros), Gurize (162 milions di euros) e Triest (6 milions di euros). A nivel talian, tra lis diviersis provinciis, Udin e je al otâf puest e Pordenon al numar 17.
◆ Inte Top Ten dai vins “nostrans” plui vendûts, tal prin puest al è il Prosec Doc cun 4.745 etolitris produsûts (+26,5% sul an di prime) e un valôr dal siolt di 887 milions di euros (+46%). Sul scjalin a pene un pôc plui bas si cjate il Pinot grîs Doc “Delle Venezie”, cun 1.829 etolitris (+0,8%) e 184 milions di euros di valôr (+19,2%).
◆ Intes primis dîs posizions dai prodots alimentârs, invezit, al è prin il persut di San Denêl Dop che si place tal puest numar 8 a nivel talian, cuntune produzion di 26.603 toneladis (+3,3%) e un valôr al consum di 851 milions di euros (+4,3%). Al contrari, il 2021 nol pâr che al sedi stât un an tant bon pal formadi Montâs Dop che al fâs regjistrâ un sbassâsi de produzion certificade (-6,1%) che si ateste su lis 6.255 toneladis. Ancje il valôr ae produzion al cale di un 5,4% (40 milions di euros) intant che al cres dal 4,8% il valôr al consum (che si ateste sui 72 milions di euros). Si sbassin dal 20,7% lis esportazions (come pûr chês, mancul marcjadis, dal San Denêl Dop: -2,7%). Stant al Rapuart, però, sui dâts cjapâts sù inte Grande Distribuzion Organizade tra Zenâr e Setembar dal 2022, il Montâs al è in recupar fuart su lis venditis cuntun +15,3% (la miôr cressite in assolût tra i aliments tutelâts) par un valôr di 18,603 milions di euros. Bogns ancje i risultâts provisoris des venditis dal San Denêl Dop che, intal stes periodi, a van sù dal 3,0% par un valôr complessîf di 151,813 milions di euros.
◆ In Italie, la produzion certificade Dop e Igp agroalimentâr e vinicule intal 2021 e rive a un valôr di 19,1 miliarts di euros e e contribuìs a realizâ il 21% di dut il setôr agroalimentâr dal Paîs: plui di 1 euro su 5 de mangjative e dal vin talian al è gjenerât di prodots tutelâts. ❚
