Sfuei Mensîl Furlan Indipendent
Archivi de Patrie

CE SUCEDEVIAL IN CHÊ VOLTE TAL MONT? Lis Flandris, tiere di libertât la che la lenghe e dissegne i cunfins

Agnul Floramo

Une regjon straordenarie. I studiôs nus contin che i siei confins gjeografics a son dissegnâts plui de lenghe che no dal paisaç, e cheste imagjin e je pardabon potente, parcè che nus fâs preseâ la fuarce di une culture che e delimite la suaze di une identitât. Ma par vê almancul une idee de sô estension, o podìn identificâ tant che confins naturâi il cors dai flums Lys e Schelda e il stret di Calais. Inte ete Carolingje e devente une Marcje, ven a stâi une tiere di confin, propit come il Friûl, e lis afinitâts cu la nestre storie a son tantis, partint propit dal fat che chest popul al è tignût insiemi plui de gramatiche che de politiche, e che par dute la sô storie al à resistût par no scomparî. Cussì al à scombatût par scjampâ dal pericul di une anession continue ai teritoris di un stât nazionâl potent, in chest câs la France, che lu varès glotût no dome di un pont di viste politic ma ancje culturâl. La aventure di une grande citât, chê di Gand, che adiriture e rive a resisti cuintri des sgrifis dai siei nemîs, e cu la fuarce visionarie di un om, J. van Arteveld, e met in pîts, intal 1337, une democrazie peade a une potence mercantîl fuarte e braurose, che e regale al paîs une forme di neutralitât pensade par difindi il marcjât. Cirint di salvâsi de prepotence francese, Gand e preferirà la protezion de corone inglese, intal 1339, e plui tart di chê asburgjiche, intal 1477. E sarà propit cheste classe inteligjente di marcjadants che e darà une fisionomie ae sô tiere, gjavant al palût e al mâr pascui bogns pal arlevament des pioris, e inviant une filiere de lane che in mancul di cent agns e puartarà i siei filadôrs a meti sù une forme di “protoindustrie” buine di jessi competitive, intal secul XV, sedi cu la Ingletiere che cun Florence e cun Prato, che jenfri il ‘300 e il ‘400 a batevin il primât inte produzion a nivel internazionâl. Sigûr il periodi plui interessant pes Flandris al è propit il ‘400, là che la monede concuistade sul marcjât de lane, trasformade in matematiche finanziarie e in speculazion rafinade (no stin a dismenteâsi che il tiermin “Borse”, là che si comprin e si vendin lis azions, al ven propit de citât di Bruges!), e devente veicul par finanziâ e par pandi intal mont il lusôr di une culture che e gjolt des sôs lidrîs, inte cussience che la ricjece cence la cussience di se e piert ogni valôr. La art pitoriche grandissime di artiscj tant che Peter Paul Rubens, Jan van Eyck e Peter Bruegel, e deventarà cussì no dome un virtuosisim dal colôr ma un mût par cjantâ cun  atenzion al particolâr la proprie int inte suaze di une patrie che si ame ancje cu la vôs dal pinel. A jerin artesans straordenaris ancje tant che stampadôrs: un di lôr, Gjerart, che al vignive propit di dongje dal flum Lys, al sarà il plui ricercjât e preseât in Friûl. O vin di ringraciâlu par vênus dade la prime edizion a stampe de nestre regjon (1480), ven a stâi il tratât di buine cusine dal Platina e ancje chel des Costituzions de Patrie dal Patriarcje Marquart di Randeck (1484). ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +