Regjon di grande bielece e cuntune storie di civiltât maraveose e apassionante, par secui e à rapresentât un puint fra Orient e Ocident e no dome dal pont di viste comerciâl – che di li a passavin ducj i trois che a colegavin sul bast des caravanis Bizanzi cun Rome e cun Praghe – ma ancje e soredut culturâl e religjôs: un laboratori là che art, antropologjie, filosofie e leterature si instrecin insiemi intune tele tant complicade che buine di inmagâ. Par solit, la sô storie e ven simpri associade al periodi de invasion turche, ma il profîl dai popui che le àn abitade al è une vore plui complès. Cun di plui, e esist une storie de Bosgne cetant plui antighe de sô islamizazion. Lis primis informazions nus vegnin dai missionaris cristians che, partint sedi di Costantinopoli che di Rome, a cirivin di convertî lis tribûs dai slâfs che si jerin insediadis in cheste tiere, siore di aghe e di risorsis de nature. Ancje osservadôrs che a vignivin dai reams di Serbie, di Cravuazie e Ongjarie nus regalin cualchi croniche interessante. Cussì o vignìn a savê che il cristianisim di chestis bandis si jere disvilupât intune forme une vore sincretistiche, ven a stâi di intersezions tra il sostrât pagan dai slâfs e il messaç dal Vanzeli. Ancje la componente ebraiche e jere fuartonone e e permeteve, massime intes comunitâts plui grandis, di vierzi un dialic fecont, responsabil di une floridure culturâl uniche. In particolâr, vie pai secui IX e X e rivà de Bulgarie une comunitât di crodints che si definive “chei che a son amâts di Diu”. In lenghe slave, i Bogumili. O savìn che a rapresentin une des plui grandis “setis ereticâls” de Ete di Mieç, ma purtrop no son mai stâts studiâts cun grande atenzion dai studiôs ocidentâi, e pûr a son la fonde dal pinsîr valdês e ancje di chel dai Catars. Segnâl de lôr presince – visibile ancjemò in dì di vuê – e je la bielece des tombis, clamadis “Stecci”, cetant sioris di simbui e di rapresentazions dal sacri che si zonte ae sublimazion de Nature. Il patrimoni di chescj documents ecezionâi al è di cuasi sessante mil esemplârs, logâts massime inte regjon di Sarajevo. La lôr presince e je testemoneade ancje dal nestri Vanzeli di Sant Marc, chel scrit in caratar unciâl, là che di une sotscrizion da pît di une pergamene o savìn che un princip de Bulgarie al rive in tiere patriarcjine compagnât di so fie Bogumila. Il ream cristian di Bosgne al durarà dal 1353, an de incoronazion di Tvrtko I Kotromanic, insediât inte citât di Jajce, fin ae decapitazion di Stjepan Tomasević, ultin re, par volontât dal sultan turc Mohammed II. Di chel moment al tacarà il procès di islamizazion e la costruzion di une societât multietniche e multireligjose: musulmane intai contescj citadins (Sarajevo, Visoko, Jajce), invezit tes regjons plui peadis a une economie agricule silvicule e pastorâl la resistence de religjon cristiane e sarà plui fuarte, peade a un ambient conservatîf. Convivence pacifiche fin ae crisi dai agns Novante dal secul passât.❚
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +