Sfuei Mensîl Furlan Indipendent
Archivi de Patrie

CE SUCEDEVIAL IN CHÊ VOLTE TAL MONT? Eremitis, iconis e torments de Grande Mari Russie

Agnul Floramo

Il secul XV al è di impuartance straordenarie pe storie de Russie e in particolâr pe citât di Mosche. Lis popolazions che si son insediadis su lis rivis de Moscove a vivin une ete di straordenarie inspirazion culturâl e, massimementri, spirituâl. La religjositât si anime di un moviment radicâl, chel definît dai eremitis: profetis, induvins, traviersâts di une esperience mistiche profonde, a pandin la idee che il mont al è dal dut impestât dal mâl e de sô presince, che si pant cu la ricjece, cu la volontât di potence e di supremazie. Chei che a vuelin salvâsi dal judizi trement di Diu a varan di slontanâsi il plui lontan pussibil dal “consorzi dai umans” e cjatâ consolazion, meditazion e dutrine inte nature plui estreme, sposant la solitudin e il cidinôr. E tache cussì une migrance bande lis regjons plui setentrionâls, chês dal Nord glaçât, taponadis dai boscs de Tajga, sù fin al mâr Blanc; o pûr a Orient, intes stepis che si vierzin ator de grande vene di aghe dal Volga, che ancjemò ore presint i rus a considerin la mari de lôr tiere. Finalmentri libars di ogni convenzion umane, disincjarnâts di ogni seduzion e tentazion, che e sedi la ricjece o pûr la voie di gjoldi il plasê de cjar, chescj eremitis a predicjavin une trasformazion radicâl dal uman inte dimension dal sacri. E cheste e je la ete che e viôt une rinassite culturâl e artistiche peade a un moviment tant radicâl, e rapresentade in maniere perfete des iconis, pituradis sul len, plenis di une simbologjie ancestrâl che e permeteve al fedêl di vierzi une puarte sul assolût. Un dai eremitis plui venerâts, Volockij, al tache a predicjâ che dome un om visionari e inviât dal Diu vivent al podarà vuidâ la Russie su la strade de sô redenzion. E lu identifiche intal princip Ivan III (1462-1505), che il mont al cognossarà tant che il Teribil. Cjapant sù l’insegnament dal so gnûf conseîr spirituâl, sigûr di jessi invistît di Diu di un podê sacrâl che nissun al varès mai podût meti in discussion, Ivan III al tache a slargjâ il teritori de Moscovie. Tant par scomençâ, intal 1472 al maride la principesse bizantine Zoe, de famee impuartantone dai Paleologhis. E je le gnece dal Imperadôr bizantin, muart combatint cuintri dai turcs sui muraions de sô citât, cuant che e fo concuistade intal 1453. Une mosse politiche furbe, chestis gnocis, che a davin a Ivan la pussibilitât di presentâsi tant che il bastion de Cristianitât cuintri ducj i siei nemîs, e ancje tant che l’erêt universâl dai imperadôrs di Costantinopoli. Mosche e devente cussì la tierce Rome, e la acuile bizantine, chê cun doi cjâfs, la sô bandiere. E lui si cjape il titul di Caesar, che par rus al devente chel di Zar. E al partìs ae concuiste dal so imperi, metint sot par prime Novgorod (1478) che, insiemi cun Kiev, e rapresentave la scune de spiritualitât dai slâfs dal Orient. Tal 1480, al ferme i mongui de Orde di Aur (1480). E si vierç la gnove vie par colonizâ la plane infinide che dopo dai monts Urâi e va a colâ sul mâr dal Gjapon. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +