CE CHE O VIN PIERDÛT. La eroiche resistence de comunitât di Prate

Cussì Vignesie e à mudât une tiere di incuintri
intal so confin periferic plui margjinâl

Jenfri dutis lis comunitâts furlanis, chê di Prate e dimostre une capacitât di resistence straordenarie, tant che ai 23 di Setembar dal 1419 lis trupis dal gjenerâl comandant dai Venezians Arcelli a vegnin blocadis propit de resistence eroiche di chest cjistiel, difindût dal cont Nicolau e dal nevôt Vielm. Dentri dai muraions e je rivade ancje une compagnie di soldâts ongjarês par puartâ il lôr jutori ae citadinance. Pe ocasion, a vegnin tirâts sù pâi di len, in maniere di rinfuarçâ il zîr de difese cjastelane. Purtrop, la nature e scombat de bande veneziane: un timpat di ploie intense al contribuìs a inagâ lis campagnis, tant che une gruesse imbarcazion cu la bandiere di Sant Marc e rive a fâsi simpri plui dongje, passant di chê altre bande dai pâi e favorint in cheste maniere la invasion de citât e dal so cjistiel. Prate, la ultime citât dal Patriarcjât ancjemò in pîts, e je obleade a declarâ la sô rese. Il cont Nicolau al rive a parlamentâ cul gjenerâl Arcelli: i citadins a podaran meti in salf i lôr bens, e ancje la int e sarà sparagnade. Ma par dâ un esempli trement, la citât che e à olsât tignî alt il cjâf cuintri dal Dôs di Vignesie e paiarà cu la distruzion totâl. Prate e ven savoltade, sdrumade, scancelade de cjarte gjeografiche dai gnûfs parons, che a mostrin dal moment cuale che e je la lôr muse. La famee nobiliâr e sarà obleade ancje a abandonâ la sô tiere, condanade ae pene crudêl dal esili. Jenfri Zenâr e Fevrâr dal 1420, ancje il Patriarcje Ludwig von Teck al bandone lis sôs posizions: no cu la intenzion di scjampâ, ma intal ultin, disperât proponiment di meti adun un gnûf esercit imperiâl e di tornâ a combati al so comant par butâ in aghe i Venezians. Inte Vierte di chel an sacramentât, i soldâts de Serenissime a rivin a tignî bot su dutis lis concuistis militârs organizant une maie strategjiche dure di sfantâ. Cun di plui, a rivin a imponi un at di ubidience e di fedeltât ancje a chê cubie di feudataris che prin si jerin simpri declarâts a pro dal Patriarcje. Un tradiment che nol podarà mai jessi dismenteât. Cussì e je propit la fin. Tristan Savorgnan, il trist Tristan, al ricêf tes sôs mans la rese definitive de citât di Udin. Si è ai 4 di Avrîl dal 1420, te zornade dal Vinars Sant. La Vie Crucis dal Friûl e coincît cun chê dal Crist. Tradide, vendude, inclaudade, ancje le Patrie e va incuintri al so destin. Doi mês dopo, ai 6 di Jugn, il Savorgnan al jentre in citât celebrant la sô glorie. Su la piche dal cuel e svintule la bandiere de sô cjasade, dongje dal Leon di Sant Marc. La Patrie dal Friûl e je muarte, colade in maniere definitive intes mans dai Venezians e dal lôr manigolt. Al è un aspiet di dute la facende che par solit nol ven mai cjapât o esaminât sot de prospetive juste, e che in cheste ocasion invezit mi plâs rimarcâ: la dominazion di Vignesie, propit come plui tart chê taliane (1866, e 1919 pal Friûl Imperiâl) e à trasformade la nestre Patrie intune tiere di confin, cuant che invezit prime e jere simpri stade une tiere di frontiere. La nestre storie, di simpri e je stade orientade intune dimension europeane, cetant siore di intersezions e di sfumaduris, cancar e cerniere di lenghis, sensibilitâts e culturis diferentis. Cumò, invezit, e ven mangjade intun bocon e glotude intune dimension diferente, che le mude – di chê posizion centrâl che à gjoldût par miârs di agns – intune perifarie estreme. La frontiere e ven scjafoiade e obleade a jessi domade, umiliade e impresonade intun confin. Al podarès someâ che confin e frontiere a sedin doi sinonims, invezit a rapresentin doi concets dal dut diferents. Parcè che se la frontiere e vîf la sô complessitât che si insiore cu la stratificazion e la diversitât, là che la cifre fondamentâl e reste simpri la pluralitât, la diference, la intersezion, il confin al contrari al è une crevadure artificiâl, volude simpri di lontan, pretindude di altris che no àn nuie a ce fâ cul popul – o miôr cui popui – che a vivin su la sô tiere feride e savoltade. O crôt di podê confermâ duncje che, se il nestri Friûl in dute la sô storie passade al à incjarnât in maniere perfete il profîl de frontiere, daspò dal 1420 al sperimente pe prime volte la tristerie dal confin. La complessitât des jurisdizions, lis competencis feudâls, lis comunitâts, i privileçs eclesiastics: dut al ven sdrumât e masanât. E tache une gnove ere. E se il bon timp si lu viôt de buinore, alore la prevision e je dome chê de tampieste. ❚