Sfuei Mensîl Furlan Indipendent
Archivi de Patrie

La Comunitât Linguistiche Furlane e fâs 100

............

Cul vôt a pro de adesion dal Consei Comunâl di Dael a son rivâts a cent i comuns che a àn aderît ae Assemblee de Comunitât Linguistiche Fur-lane. «Cu la sieradure des provinciis, la Assemblee (dongje di chês des minorancis slovene e todescje) e reste l’unic riferiment istituzionâl dal popul e dal teritori dal Friûl, dal Timau ae Livence» al spieghe Diego Navarria, president de Assemblee e sindic di Cjarlins. Intun Friûl dividût in 17 UTI, di fat, la Assemblee e rapresente l’unic strument di vision unitarie de popolazion e valorizazion de identitât. Ancje se lis sôs competencis a son definidis in mût gjeneric de leç, propit par chest e pues permetisi di jessi prin di dut une rapresentance, une vôs, no dome tal cantin linguistic ma ancje, come che e dîs la leç istitutive, pe «valorizazion e difese de coesion teritoriâl, sociâl e economiche des comunitâts linguistichis».
In dì di vuê, la Assemblee de Comunitât Linguistiche Furlane si insalde intun moment di grant moviment politic e di tant cuistionâ sul avignî de Regjon. «L’obietîf principâl che, intune cul Diretîf, o stimi che la Assemblee e vedi di puartâ indenant – al sosten Navarria – e je la difese, o miôr, il rinfuarciment de autonomie dal Friûl. Par intant o ai fat sintî la vôs de Assemblee ogni volte che no vignivin rispietâts i dirits de Comunitât Furlane, par esempli te leçs di riforme de Rai, de scuele, de editorie, te leç eletorâl Italicum. O ai chê di vosâ ancjemò plui fuart, se al covente, cumò che o sai di rapresentâ i dirits di nuie mancul che cent comuns furlans».
Navarria, in merit ae leç eletorâl, al à tornât a lançâ un apel: «si à di tornâ ai furlans il dirit ae rapresentance che cul Italicum al è sparît, par vie di une discriminazion rispiet a chês altris minorancis linguistichis. Come Comunitât linguistiche furlane, o domandìn che i nestris politics in Parlament e in Regjon no pierdin di viste, intun moment critic come chest dulà che si larà a riviodi lis normis eletorâls, la esigjence di concedi a cheste regjon une rapresentance che e deti vôs a dutis lis components dal Friûl-Vignesie Julie». Cu la leç inmaneade dal guvier Renzi, di fat si veve sparniçât i 175 comuns furlanofons in doi coleçs cence logjiche che no garantivin ni i furlans ni i slovens; pal Trentin e il Sud Tirôl invezit la tutele des minorancis e vignive garantide cun coleçs uninominâi costruîts su misure. «I nestris deputâts e senatôrs a scuegnin fâ di dut par ricognossi la stesse dignitât politiche – al reclame Navarria – secont ce che e previôt la Costituzion e la Europe. O ricuardi che la Cort Costituzionâl – cun sentence  215 dai 18 di Lui dal 2013 – e à precisât che no je ametude discriminazion tra lis 12 minorancis ricognossudis e tuteladis, cence diference, dal articul 6 de Costituzion». Il president de Assemblee si spiete duncje propuestis concretis pe garanzie dal rispiet dai dirits dai furlans. ❚
✒ David Zanirato

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +