La cicogne in marilenghe

Puartâ par man i gjenitôrs tal moment plui biel de lôr vite, la nassite di un fi, par informâju dal valôr che une educazion plurilengâl al pues vê pe cressite di fruts cun ricjece culturâl e di pinsîr.
E je cheste la idee che e sta sot de intese firmade a Dicembar passât te sede de Regjon a Udin jenfri la ARLeF – Agjenzie regjonâl pe lenghe furlane e la ASS 5 – Aziende pai servizis sanitariis “Basse Furlane”, ae presince di personâl dal Servizi regjonâl pes lenghis minoritariis.
Cul acuardi i doi ents si impegnin a meti in vore un progjet di informazion sul plurilinguisim e, in particolâr sul ûs dal furlan, indreçât a cui che al è daûr a deventâ pe prime volte gjenitôr e, daspò, tai moments de infanzie indulà che al è un contat cu la struture sanitarie (par esempli lis vacinis).
La convenzion no previôt dome la distribuzion di materiâl ai neogjenitôrs, ma ancje un percors formatîf pai operadôrs dai ospedâi e dai distrets. Il 2013 al sarà duncje l’an di partence dal progjet, cu la sperance che si slargji ancje a chei altris ponts nassite che a son in dut il Friûl.
Redazion