La Bibie pal popul

La Peraule di Diu par furlan:
une intuizion straordenarie di pre Checo Placerean
e une fature che e à durât agns e agns di pre Antoni Beline

Cuant che vinars il prin di Fevrâr il professôr Cesare Scalon, te presentazion de seconde edizion de Bibie, al à citât pre Antoni Beline disint: «La Bibie e je nassude fûr dal templi e le àn voltade doi predis segnâts tal libri neri de Curie», mi è vignût un grop tal cûr.
Cetant vere che e je stade cheste afermazion! Agns e agns di scombatiments, di incomprensions, di condanis – o volarès dî di scomunichis – morâls e psicologjichis che pre Checo Placerean e pre Antoni Beline a àn scugnût patî. No par nuie, la prime publicazion de Bibie no le à fate la arcidiocesi, ma un editôr laic: Ribis. E si tratave de Peraule di Diu, dal Libri dai libris, de Peraule di Vite eterne, no di storiutis.
Aghe passade, e je vere! Ma intant la incomprension, la pache, la esclusion e à fat sanganâ cualchidun. Mi è vignût tal cjâf il Vanzeli là che al dîs che prime si cope i profetis e po si ur fâs il monument (cf. Lc 11,47). Salacor, al sarà il destin di cui che al cjale plui lontan! Ma che a sedin i sorestants de glesie responsabii di chestis esclusions, o stenti a concepîlu. O imagjini une glesie che e sta denant, in teste a scombati pe vite, pai dirits umans e pal rispiet des diversitâts e des minorancis che la storie e à poleât tal timp, pe difese di cui che al à la vite plui dificile. Une glesie che e jude e che e scombat par che il debil al vedi fuarce, al vedi sperance. Une glesie che no met stralens, ma che e incoragje i debii, i piçui… E tra i piçui e i debii o met ancje lis minorancis linguistichis.
No isal biel sintî che Diu nol è un forest, ma un di cjase; il Pari che al scolte, che al capìs, che al jude? Li al sta il sens di tradusi par furlan la Peraule di Diu. Une intuizion straordenarie di pre Checo, e une fadie che e à durât agns e agns di pre Antoni.
O soi content di vêur dade une man, insiemi a altris amîs. O jeri presint ancje jo tal lontan 1979, in chê dì che pre Checo e pre Antoni a firmavin il contrat cul editôr Ribis par chê splendide edizion vignude fûr in vot volums cun tante iconografie sacre a ilustrâ il test biblic. Di chê volte no ai mai fermât di lavorâ intor de Bibie di Ribis, sore de prime edizion publicade dal Istitût Pio Paschini tal 1997 e in cheste ultime vore, dulà che il lavôr fondamentâl al è stât chel di meti in grafie uficiâl. E pe enesime volte, tocje passâ peraule par peraule, rie par rie, pagjine par pagjine. Ma no mi à mai displasût. Al è ce che o ai podût fâ pal popul furlan, pai nestris cristians, pe glesie. ❚
pre Roman Michelot