A àn vinçût Debora Serracchiani e Pieri Fontanini, ducj i doi par un pêl: e a Furio Honsell i son coventâts doi viaçs par bati al balotaç Adriano Ioan. Ma Avrîl dal 2013 si è rivelât pardabon “il plui crudêl dai mês” (come che al diseve T.S.Eliot) pal distac che al à pandût di citadins viers de politiche inte nestre Regjon. Si visarìn di chestis elezions come des mancul frecuentadis di simpri: un furlan su soi difat al à sielzût di restâ a cjase. Un dât che al fevele di bessôl dal marum dai eletôrs e de lôr disilusion rispiet al avignì, ma che al è util completâ cuntun ulteriôr 3 par cent di schedis blancjis e nulis, 17 mîl in dut. Un numar che al devente dopli tal câs des provinciâls, dulà che lis personis che a àn refudade la schede a son stadis cuasi 4 mil.
Parcè partî di chest par analizâ la situazion? Parcè che a vevin di jessi lis elezions dulà che si esaltave la “Autonomie responsabil” (non di une liste di Renzo Tondo) e invezit – pleâts de crisi o sfiduciâts dai esemplis romans e dai scandui nostrans – i furlans (ma ancjemò di plui i triestins, che a àn votât dome pal 45 par cent) a àn abdicât rispiet al dirit di decidi, che e je la sostance stesse de autonomie. Duncje nol è masse ce lamentâsi se ae fin inte zonte regjonâl metude dongje di Debora Serracchiani, prime femine diretamentri elete ae vuide de Regjon e buine di vinci cuintri dut e cuintri ducj, prin di dut cuintri dai pastroçs romans dal so partît, no je olme di Friûl. Lis dôs assessoris di Udin Maria Grazia Santoro e Maria Sandra Telesca a son tecnichis de Urbanistiche e de Sanitât ma no son dongje de cuistion furlane, come ancje i pordenonês Sergio Bolzonello e Paolo Panontin. E la robe piês e je che la deleghe pes lenghis minorizadis in zonte no je stade dade a nissun: e se cheste e je la atenzion pal furlan e ancje par chês altris lenghis dal Friûl, o sin pardabon a puest.
***
In consei regjonâl dut câs, jenfri dai 19 conseîrs dal Pd che a son maiorance te maiorance, al sarà cjâfgrup chel Cristiano Shaurli che al à aderît al progjet Friûl Diferent, une interessante esperience par fâ “lobbying” inte aree di çampe in spiete di rivâ a meti dongje chel partît autonomist che ancjemò nol è. Il Maf che al à sostignût Renzo Tondo e Fontanini nol à puartade a cjase nissune rapresentance ni a Triest ni a Udin, e i autonomiscj che a vevin pontât su “Un’altra Regione” di Franco Bandelli no son rivâts nancje lôr a jentrâ in consei.
Unic rai di lûs pai furlans che a vuelin un voli simpri viert su la cuestion identitarie al è il risultât dal Front Furlan in Provincie, cun Federico Simeoni che al à rivât a cjapâ une cjadree a Palaç Belgrât incassant il 5,74 par cent dai vôts, cun plui di 12 mil 500 citadins che a àn sielzût la sô opzion. E je vere che in chês elezions no jerin i grilins che cun Saverio Galluccio si son presentâts dome in Region, e si son fermâts al 19 par cent cul candidât e al 14 cu la liste. Ma la afermazion dal Front Furlan e je di cjalâ cuntun voli sul avignî. Il consens pal Moviment par cumò al è une vore inlidrisât in ciertis areis dal Friûl di Mieç: la sô cjarte di sucès e je propit cheste, parcè che slargjant il so eletorât in Cjargne, te Basse e magari tes citâts e soredut dantsi un program un tic plui complet e complès di chel di cumò, il Front al podarès pardabon cressi tai agns che a vignaran.
Intant la bandiere dal Friûl e reste tes mans di Fontanini che in Provincie al à vint al prin turni cuintri il zovin Andrea Simone Lerussi cul 50,03 per cent, evitant di lâ al balotaç par 56 vôt. Il president de Provincie al cirarà cumò une sinergjie cun Pordenon, par creâ une sorte di cuintripodê di centri-drete alternatîf al guvier regjonâl de Serracchiani. Ancje parcè che la governatore e à za dit che lis Provinciis lis fasarà sparî.
Dôs peraulis ancje su Udin dulà che Honsell al à scugnût spietâ 15 dîs in plui ma ae fin al continuarà ancje lui il so mandât par altris cinc agns. Ma cheste volte o spietìn che la sô aministrazion e sedi une vore plui atente aes cuistions de identitât.
Walter Tomada
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +