Sfuei Mensîl Furlan Indipendent
Archivi de Patrie

La ultime mode in Italie e je fevelâ di gjavâ lis provinciis: la elezion di Fontanini ise stade un referendum par mantignîlis?

............

Cun 109.334 vôts cuintri i 89.772 di Andrea Simone Lerussi, l’on. Pietro Fontanini al è stât riconfermât president de Provincie di Udin, cuntun vantaç di 19.562 eletôrs che i àn riconfermade la fiducie a prin colp. E je vere che la percentuâl che i à evitât il secont turni e je stade piçule (0,03%), ma si à di tignî cont di plui elements e tra chescj de basse afluence che e à caraterizât cheste tornade eletorâl (51,53% dai 490.005 che a vevin dirit) e de campagne mediatiche che la mode taliane e à inviât cuintri dal ent provinciâl.
Il riconfermât president Fontanini tra lis primis declarazions al à dit “Al è stât un referendum a pro de Provincie”, ma tal zîr di cualchi zornade la neo presidente Debora Serracchiani i à rispuindût a sec “Se o tignìn cont de astension, di chei che no àn volude la schede, des schedis blancjis e nulis e dal risultât des listis che a àn metût tal program la sopression dal ent di mieç, alore il referendum al dîs che la int no à voie di vêlis e o sierarìn lis provinciis”. Se e fos cussì, za te zornade de sô proclamazion a gnove presidente de regjon, e varès vût di vê su la taule lis dimissions dai presidents de provincie di Gurize e di Triest, governâts di maiorancis di centriçampe dulà che il partît di riferiment al è il Pd che al à come segretarie politiche regjonâl propit Debora Serracchiani.
Cun di plui e je vere che tante int no je lade a votâ, ma se la gnove presidente e acete di confrontâsi sul teme “isal stât o no un referendum?”, e à di cjalâ i numars e tignî cont des regulis: un referendum al è bon se al va a votâ almancul il 50% plui un dai eletôrs. Po ben, ta chest câs al à votât il 51,53% di chei che a vevin dirit e duncje il “referendum” al è valit. Di cheste percentuâl di eletôrs che a àn votât, il 50,03% al à sielt il president Fontanini. Duncje i numars a àn dât reson al candidât che si presentave in difese dal ent provinciâl.
Ma no nus somee responsabil pierdisi in considerazions di cheste fate, parcè che massime cumò che la campagne eletorâl e je finide, al è miôr meti vie i slogans e resonâ in maniere concrete sui problemis di risolvi. Duncje archiviade la peraule “referendum”, cirìn di puartâ su la taule la cuistion vere.
Il teme “provincie sì o provincie no” al è stât “soflât” di une campagne mediatiche “a talian vie”, plui par cjatâ une “vitime espiatorie” e dâ une rispueste faziose al malumôr gjenerâl. Che la int e sedi ingomeade dal sisteme politic istituzionâl in gjenerâl, lu conferme une des plui altis astensions mai regjistradis par une votazion che no sedi referendarie. E duncje tant par dî “fasìn alc”, in Italie al è nassût il “partît” di chei che a disin “Elimìn lis provinciis par sparagnâ sui coscj de politiche”, ma si son “dismenteâts” (o concedìn il benefici de buine fede…) di spiegâ che cussì si taiarès dome la spese pai orghins rapresentatîfs: il cost dal president, dai assessôrs e dai conseîrs a rapresentin une part minimâl di un belanç provinciâl. Uficis, personâl, funzions… juste par dâ dome altris 3 vôs, ,a restaressin, cun ducj i coscj che a compuartin. Ma nol è cussì che si risolvin i problemis, ven a stâi cjapant dome cualchi cjapitul di spese e fasint strumentalizazion eletorâl e demagogjiche: la riforme e va pensade in maniere struturâl.
Se in Italie dome cualchi an indaûr e jere nassude une altre mode dal dut contrarie a cheste (no si contin tropis provinciis e provinciutis gnovis che a son nassudis in pôc timp tai ultins agns), in Friûl cuant che cualchidun al proponeve di istituî la provincie di Tumieç (il guvier regjonâl al jere di centriçampe), la int e à votât un referendum (chel colp, vêr) disint a clâr che la provincie di Udin e jere avonde. E somee preistorie ma al jere dome il 2004 e cumò il puest di Riccardo Illy, sostegnidôr de eventuâl gnove provincie cjargnele refudade dal eletorât, al è di Debora Serracchiani, che vuê e propon i consorzis di comuns al puest des provinciis. In Sicilie, il president Crocetta al à ubidît a cheste mode “tipicamente italiana” e lis à tiradis vie. Ma nissun nol dîs che la alternative proponude a son i consorzis di comuns che in realtât a son altris “provinciis” cun cda e framentazion dal teritori. Un esempli similâr chi in regjon al jere stât tentât cui Aster, volûts dal guvier Illy: al è evident che no àn vude furtune. Isal pussibil che o vin la memorie cussì curte?
Un altri probleme al è il discors de rapresentativitât: se chescj consorzis a deventin ents di secont nivel, ven a stâi ents dulà che i aministradôrs no vegnin elets, la int no podarà sielzisi il so rapresentant di aree vaste parcè che a vignaran nomenâts, par esempli, tra i sindics di chel comprensori. Seont noaltris i sindics a àn za masse ce fâ a viodi di fâ ben pal lôr comun e al è just che e sedi la int a dâ la responsabilitât di guvier al president de Provincie, elezintlu e domandant a lui di rispuindi des sôs azions. Cence contâ che une soluzion dal gjenar e podarès jessi doprade par fâ une sorte di “marcjât des poltronis” cussì cjâr a une cierte partitocrazie che noaltris no condividìn: al à di jessi il popul a sielzi i siei rapresentants e chescj a àn il dovê di mostrâ la muse e rispuindi des lôr azions.
Alore no si pues menâ il mus pe glace. La Provincie, o ent di mieç, e je une istituzion ricognossude tai ordinaments internazionâi, dulà che tra il comun che al viôt de aministrazion dal paîs e la regjon che si ocupe di legjiferâ a alt nivel, e je la Provincie che e à une funzion aministrative di aree vaste (in Ingletiere e tai Stâts Unîts lis clamin “conteis”, in Francie lis clamin “dipartiments”, in Gjermanie lis clamin “circondaris”). No si pues pensâ che i nestris sindics a vedin di lâ a Triest par ogni piçule robe: la Provincie e covente par jessi plui dongje e al servizi dal citadin, dai nestris paîs.
Cun di plui che i resints scandui a proposit di bêçs straçâts dai partîts a àn propit vût sede te Assemblee Regjonâl a Triest, no li des Provincis, che jessint plui dongje a son plui controlabilis: e sarès propit biele che la onde di moralizazion e dedi ancjemò plui podê al ent che al à dimostrât cui fats di jessi esempli dal malcostum de politiche!
Cence jentrâ masse su lis cuistions tecnichis par no fâle masse lungje, une riforme costituzionâl no je cussì imediade parcè che lis provinciis che a son previodudis tal titul V de Costituzion taliane e, cun di plui, la modifiche dai confins teritoriâi provinciâi a van decidûts ancje cuntun referendum tai comuns interessâts. Alore, stant che si met man al teritori e al statût de Regjon, pe eficience e razionalizazion al sarès miôr fâ la capitâl al centri de Regjon, Udin, plui comude par ducj, no? Sintìn ce che a disin i nestris concitadins ancje su di chel, no?
Ma tornant al teme de riforme dai ents locâi, la difese dal ent provinciâl no pues limitâsi a une bataie di bandiere. Il president Fontanini, ancje lant cuintri di une buine fete des fuarcis di centridrete, cualchi mês indaûr al à fat une propueste interessante e seont noaltris condivisibile: une riorganizazion dal asset istituzionâl regjonâl cu la definizion di une provincie uniche pal Friûl di une bande e la citât metropolitane di Triest di chê altre.
Cheste struture no dome e cjatarès une fonde storiche dant une juste impostazion a la “convivence” fuarçade che e dure di passe 50 agns di dôs realtâts tant difarentis (chê furlane e chê triestine), ma e rispuindarès ancje a cuistions pratichis. Fin cumò o vin fevelât di “contignidôr”, cumò o provìn a fevelâ dal “contignût”: o sin convints che un ent di mieç tra comun e regjon al coventi par vê un interlocutôr istituzionâl a puartade di man. Miôr decentrâ che acentrâ, parcè che Triest no je propit cussì dongje. Al è clâr che a la provincie i van delegâts une serie di podês e di risorsis par meti in vore la totalitât de ativitât aministrative di aree vaste: a la regjon, slizeride des funzions aministrativis, i varessin di restâ compits legjislatîfs e di rapuarts internazionâi, par esempli. Si varès duncje di scomençâ a pensâ a “mancul regjon e plui provincie”, plui dongje ai citadins e duncje plui controlabile.
O confidìn tal fat che diviers conseîrs de atuâl maiorance a son passâts par Palaç Belgrât, comprindude la gnove presidente Debora Serracchiani, e che passade la buriane eletorâl si rivedi a dâ une rispueste al Friûl, celebrant cussì in maniere degne i 50 agns di une regjon mâl nassude e che il stes Tiziano Tessitori nol voleve cussì.
✒ Christian Romanini

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +