Sfuei Mensîl Furlan Indipendent
Archivi de Patrie

L’EDITORIÂL. La bataie dal Lusinç

............


✽✽ Il dirit ae identitât no si trate cun nissun. Il risultât al è li, denant dai voi. A son i numars a fevelâ clâr. E alore mi somee dome une forme di sflocje inteletuâl rimpinâsi su parcè e parcò. E à vinçût la Serracchiani, al à pierdût Tondo. I grilins a tornin a jessi ce che a jerin prime, vâl a dî une fuarce di critiche radicâl che no tache masse chi in Friûl; la Lega e continue a pierdi vôts e influence, il Front Furlan al dimostre di jessi plui di alc in provincie di Udin. Bandelli e compagnie al respire dome a Triest.
✽✽ Che po dopo la politiche e sedi une vore lontane de int, al ven fûr dal viodi chê metât che no je lade a votâ.
E comande duncje la Serracchiani a Triest, e la zonte nomenade e riflet il so pinsîr: cirî di no vê rognis cui rapuarts teritoriâi, doi assessôrs par ogni provincie, e soredut nissun che al puedi dâ fastidi politic ae sô dominance, dividude cun doi proconsui, Bolzonello e Cosolini, cjale ce câs, ex e sindic di vuê di Pordenon e Triest. Pe bande plui impuartante de Regjon, ven a stâi la provincie di Udin, includude la mont, e je jê “il caric” che al conte.
✽✽ Po ben, cheste e je la fotografie, la curnîs invezit e je cheste definizion di competence che a àn volut dâi, par platâ la miserie politiche de zonte.
✽✽ O vin scrit prime dal risultât eletorâl che no jere grande diference tra i programs dai doi candidâts, ma ancje che la Serracchiani, e il Pd, no podevin lâ masse cuintri di chê leç sul furlan che a vevin votât e che almancul chê su la lenghe e su la scuele no saressin stadis tocjadis. Ma ancje chi, al sarà mût e mût di impegnâsi pe lôr atuazion.
✽✽ E no saran scusis, viodût il numar di conseîrs furlans che a son tal Palaç. Di chescj, cualchidun adiriture al è li ancje par indicazion dal moviment “Friûl diferent”. O fevelìn di Shaurli, mighe dal ultin dai elets, che a chest pont al à dutis lis pussibilitâts di dimostrâ la sô furlanetât.
✽✽ Starìn a viodi: nissune sieradure, ma nancje masse ligrie: il dissen di regjon triestine al larà indenant, parcè che chest al è il pinsîr dominant dai partîts talians.
✽✽ E noaltris? O dovìn tignì dûr sui principis, che al vûl dî no molâ di une virgule cuant che o viodìn che si met man ae economie, a struturis publichis e istituzionâls de Regjon, a scomençâ dal dibatit, une vore strumentâl, su lis provinciis e la lôr fin.
✽✽ Ma ancjemò plui impuartante e je la cuistion dal dirit, viodût che propri la çampe si proclame paladine di cheste pupilance.
✽✽ Il dirit ae identitât dal popul furlan no je dome tai libris di storie e gjeografie, no à di vê la aprovazion di cualchidun. Che po dopo chest dirit al vedi la pussibilitât di esprimisi in forme organizade, istituzionâl, politiche, al sta dome inte fuarce e te cussience dai furlans.
✽✽ E sul dirit no si trate, de Livence al Lusinç.
Dree Valcic

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +