Sfuei Mensîl Furlan Indipendent
Archivi de Patrie

Jù lis mans da la aghe de Cjargne

............

No je cuistion di “fasìn di bessôi”. La bataie che a stan puartant indevant di un pâr di agns i Comitâts cjargnei pe difese de aghe e pe sô gjestion in autonomie e cjale plui in là di chel dissen, nancje tant scuindût, che al volarès il domini suntune grande multiutility in dut il nordest par fâ util sul aur blu. La perseverance di Franceschino Barazzutti e dai siei sodâi si fonde su pe cussience che tancj piçui segnâi ur stan dant rason di un pâr di agns incà.
UNE CUISTION
CHE E VEN DI LONTAN
Cuant che i sindics de Cjargne a vevin dade vite a Carniacque Spa dal 2006, si jerin metûts subit di traviers fasint capî che centralizâ la gjestion dai acuedots e varès puartât dome rognis e che al sarès stât il prin pas svendi une des risorsis plui cjaris a cheste tiere, finint te bocje dai “scuâi”. Cumò che o sin ae fin dal 2015 e che il CATO (l’Ambit de provincie di Udin) al à stabilide la fin anticipade di Carniacque pal prossim an, duncje cu la fusion imediade cul CAFC, chê prevision si sta inverant. Se po dopo, a ricuardin i Comitâts, si cjale che la decision su pes tarifis e ven fate di un pâr di agns a Milan cuntune formule che nancje ae Nasa a rivaressin a decifrâle – cence dismenteâsi de fin che a àn fat tal ordin Acegas e Amga, assorbidis de emiliane Hera -, o podìn dome crodi in ce mans che e finirà la aghe no dome dai cjargnei ma ancje di ducj i furlans.
Di chê altre bande il CAFC e gran part dai sindics cjargnei a vuelin confuartâ che invezit no son pericui, il Consorzi da la aghe dal Friûl centrâl al è fat dome di socis publics, la sô autonomie no vignarà metude mai in discussion, pe mont a saran previodudis tutelis particolârs e si cirarà di otignî une tarife agjevolade.
LA DOMANDE DI GARANZIE
“No vin bisugne di caritât ma di garanziis” – a rispuindin i Comitâts – “ancje parcè che za il president di Carniacque Luches al veve provât a domandâ di sbassâ lis boletis ma il CATO al à rispuindût di no. Il concet al è sempliç, la storie e insegne. Ancje il pui piçul comun al à une pacare e un dipendent in stât di savê dulà intervignî in câs di necessitât se si romp un tubul. Diviers al è il discors pe depurazion e pes fognaduris: in chest câs al pues lâ ben un consorzi di valade o se no la future Union che e cjaparà il puest de Comunitât montane. In Trentin o vin un model bielzà pront, che al funzione e che si podarès replicâ ancje culì di nô. Baste volêlu, cence pleâsi ai ordins di partît.”
E COVENTE UNE LEÇ GNOVE
I sindics a dan cuintri che al bisugne rispietâ lis leçs in vigôr, che no si pues tornâ a une gjestion comunâl da la aghe, che lis societâts di gjestion a devin par fuarce fondisi a nivel di provinciis e che i bêçs che a coventin par sistemâ lis rêts e i acuedots a puedin rivâ dome cu lis boletis; duncje, dome fondintsi tra plui societâts si rive a fâ economiis di scjale.
“E covente une gnove leç di riforme dal servizi idric regjonâl che e tuteli trê ambits specifics de nestre provincie – a tornin al atac i Comitâts – chel de Mont, chel dal Friûl di mieç e chel de Basse, ducj i trê diviers par carateristichis e par conformazion dal teritori. No je vere che la leç lu impedìs: a son stadis dôs sentencis de Cort Costituzionâl che a àn dade reson al Trentin, garantint la lôr specialitât. E noaltris, ce sino, i plui gnognos?”
La presidente Serracchiani, nasât il pevar, tes setemanis passadis e à anunziât che e sta par rivâ une gnove normative e che a saran ricognossudis lis specificitâts teritoriâls. Ma no à spiegât ancjemò cemût. Se tra un pâr di agns nus rivaran lis boletis di Bologne, preparìnsi a sintî che “alore Barazzutti al veve reson…” ❚
David Zanirato

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +