I risultâts des elezions in Catalogne: ise vere indipendence?

Domenie ai 27 di Setembar si son fatis in Catalogne lis elezions pal Parlament de Comunitât, in pratiche lis elezions regjonâls.
A jerin clamâts a votâ 5 milions e mieç di citadins. Il vôt, previodût pal 2016, al è stât anticipât dal president catalan e leader nazionalist Artur Mas, dopo il dinei di Madrid di concedi il referendum su la indipendence.
E cussì, “un referendum su la indipendence” al è stât il sproc che e je stade condote la campagne eletorâl.
Forsit par cheste caraterizazion e je stade une grande incressite de afluence al vôt: ae fin ai bossui a son lâts il 77% di chei che a àn dirit. Plui 9% in paragon des elezions dal 2012: un record assolût.
RISULTÂTS_I indipendentiscj catalans a àn concuistât la maiorance assolude.
La liste Junts Pel Sì di Artur Mas e à vût 62 elets e il 39,7%, i radicâi separatiscj di Cup 10 elets e il 8,2%: insiemi a rivin al 47,9%, rivant duncje a la maiorance relative di vôts e concuistant 72 elets su 135 totâi. Daûr Junts Pel Sì al rive il partît moderât anti-sisteme Ciudadanos (25 elets e il 17,9%), contrari ae indipendence.
I indipendentiscj a varan la maiorance dai deputâts al Parlament regjonâl catalan, ma cence passâ il 50 par cent dai vôts no puedin fâsi fuarts di vê la maiorance assolude dai eletôrs de Catalogne. L’obietîf declarât di Artur Mas al è di fat la proclamazion di une declarazion unilaterâl di indipendence intal zîr di 18 mês, e il vôt al coventave a rinfuarçâ la sfide trate al guvier centrâl di Madrid.
PIÊS CHE LIS ELEZIONS DAL 2012_La stampe taliane e à dât grant risalt ae concuiste de maiorance assolude dai elets de bande dai partîts che a àn fat la sielte pe separazion de Spagne, ma e jere une maiorance a vevin za. Se o viodìn i risultâts cu lis elezions di prime, i partîts che a metin la autodeterminazion tra i prins ponts dal lôr program a àn 72 elets in confront dai 74 dal 2012 (-2) e i Unitariscj 63 a pet dai 61 dal 2012 (+2).
Insume, chel de indipendence al somee un ramondin che par vê plui podê e autonomie locâl. I numars de Catalogne a son imparagonabii cul Friûl, ma e podarès jessi une lezion ancje par nô. ❚
Redazion