Sfuei Mensîl Furlan Indipendent
Archivi de Patrie

Îr valîs di carton, vuê valîs eletroniche

Christian Romanini

“Un an ecezionâl, di grande vore par tirâ di gnûf dret il tamon dal Ent Friûl pal Mont e par une sô riorganizazion funzionâl”. Cussì al sintetize Giorgio Santuz chest prin an de sô presidence.
Cualis sono stadis lis cuestions plui delicadis?
“O vin tacât cu la riorganizazion dal rapuart president e diretôr, ripuartant la centralitât de responsabilitât sul legâl rapresentant dal ent, che al è propit il president.
Cemût si sêso mots?
“O vin lavorât su 3 cuestions principâls: garantî la ativitât normâl dal ent cun cunvignis e incuintris ator pal mont par jessi dongje ai furlans migrâts; risolvi i problemis di nature finanziarie e la stesure dal gnûf statût”.
Cemût vêso risolts i problemis di belanç?
Prin di dut cuntune revision capilâr dai tescj contabii e un control di dute la gjestion: di chest grant lavôr o scuen ringraziâ di cûr i dotôrs Pezzetta e Picco che ogni 15 dîs a vegnin in sede e cence domandâ nuie e in maniere dal dut vontarie a àn viert ducj i libris dal belanç, analizant dute la situazion des jentradis e des jessudis. A chest si zontave une seconde cuestion di nature legâl: o vin rivât a sierâ a nestri favôr un contenziôs cu la regjon a proposit dai fonts pal program pal rientri in patrie dai fîs dai migrants argjentins. Ancje chi, o vin gjoldût dal jutori gratuit dal studi legâl di Giorgio Damiani di Udin. Dopo dal ricors, il conseîr regjonâl Giorgio Baiutti al à presentât un emendament ae leç finanziarie regjonâl e cussì o vin rivât adore a puartâsi fûr di cheste situazion che e riscjave di fânus sierâ: se no vessin vude reson o varessin vût di tornâ passe 300.000 mil euros”.
E intant al è rivât ancje il gnûf diretôr…
“Stant la situazion pardabon delicade, o vin sospindût par doi trê mês la ativitât dal consei di aministrazion, propit par stâ daûr a dutis chestis problematichis che o vevin di risolvi. Prime de sospension però o vin nomenât un grup che al veve il compit di esaminâ ducj i curricula che nus son rivâts e o vin nomenât il gnûf diretôr che al è Fabrizio Cigolot, une cariere te aministrazion publiche e grande esperience, che lu à puartât a vê la unanimitât pe sô incarghe”.
Ce nus disial de tierce azion: la riscriture dal statût?
“O vin nomenât un esecutîf che al à une rapresentance sedi teritoriâl des trê provinciis furlanis sedi istituzionâl fat di cinc personis: il president dal ent, un rapresentant de zone di Pordenon (Pietro Antonio Varutti, che al è ancje vicepresident vicjari), un rapresentant di Gurize (Antonio Devetag, gnûf assessôrs ae culture dal comun di Gurize), il president de provincie di Udin e il diretôr gjenerâl de fondazion Crup (i doi ents che plui a sostegnin il nestri ent). Cun di plui il diretôr al sa che ogni 15 dîs al à di riferî ancje a chest esecutîf. Magari cussì no il vecjo consei di aministrazion al à protestât, ma dute cheste riorganizazion e covente par garantî al ent plui control sedi des spesis sedi des ativitâts par evitâ gnûf problemis. Nol è pussibil gjestî e risolvi lis situazions cuotidianis clamant ogni volte tante int: o vin dade prioritât ae operativitât, ma tal rispiet dai orghins: o vin creât un gnûf unic consei di 30 elements al à di riunîsi almancul 3 voltis par an. Jo ju clamarai almancul 7 o 8 voltis, cussì a saran simpri informâts de ativitât e a podaran indicânus la strategjie dal ent”.
Cuale ise?
“O vin di rispietâ il passât, ma cumò e je ore di consegnâlu ae memorie storiche. Il gno interès cumò al è cui dissendents dai prins emigrants furlans: mi è capitât di cognossi zovins che a àn vût sucès e fate strade. O vin di rivâ a coinvolzi chestis risorsis umanis inestimabilis, che se ancje a son nassûts tal forest e magari a fevelin par inglês o une altre lenghe, a continuin a fevelâ par furlan, dimostrant che no je contradizion tal volê mantignî la identitât dal nestri popul: duncje vondê cu lis polemichis che a disin che il furlan nol è un valôr, anzit. Mantignìn la nestre lenghe e probabilmentri o impararìn cun plui facilitât ancje chês altris che nus fasaran zirâ il mont. O vin di vinci la sfide de globalizazion, stant atents al pericul de “monoculture inglese” e cu lis gnovis tecnologjiis si podarâ meti in pîts un lûc di incuintri pai furlans de diaspore massime i plui zovins: chest al è il teme dal incuintri di Pontebe di chest an. Se no rivìn a jessi un puint tra lis gjenerazions dai furlans partîts de Patrie e dai zovins nassûts tal forest, il nestri ent nol à reson di esisti e al è miôr sierâlu”!
Puedial dânus cualchi altre anticipazion?
“Fevelant simpri de fieste anuâl e di chest colegament gjenerazionâl che al à di cjalâ al doman, us pues dî che e je mê intenzion meti in pîts l’incuintri anuâl pal 2008 li che o fasarìn fevelâ dome i zovins fîs di migrants furlans e i presidents dai gnûfs fogolârs furlans che a son nassûts propit ta chescj ultins mês”.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +